Mboe 25:10-21

¹⁰Tana zin wal tau matan iŋgalŋgal sua ta ziŋan Yooba timbuk, mi titoto ka tutu na, ni iurur leleene pizin, mi imuŋaiŋai zin. Mi sua kini boozomen ta imbuk la kizin na, ni itoto.

¹¹O Yooba, nio aŋpaŋoobo kat pa zaala ku. Tamen nu zom biibi pa muŋaiŋana ku. Tana reege sanaana tio.

¹²Wal ta so timototo Yooba mi tileŋleŋ la kalŋaana, na ni ko iso zin pa zaala tabe tito.

¹³Mi ko mataana pizin ma timbot ambai. Mi lutun bizin tomini ko timbot ambai su toono ta Yooba ikam pa wal kini na.

¹⁴Wal ta so timototo Yooba mi tileŋleŋ la kalŋaana, na tiwe le gaabaŋana, mi ni izzwe leleene mi ŋgar kini pizin. Mi ni ko ipaute zin pa zaala tabe ni ziŋan tiparlup zin ma tiwe tamen pa i.

¹⁵Nio aŋurur motoŋ pa Yooba be iuulu yo. Pa ni ta itatkewe kumbuŋ pa kilis ki koŋ koi bizin.

¹⁶Yooba, nio mbesooŋo ku tau. Tana lae tio mi muŋai yo. Pa iŋgi ituŋ tamen kat. Leŋ ulaaŋa sa tabe iuulu yo pa pataŋana tio taiŋgi na som.

¹⁷Nio leleŋ ipata kat. Tana tatke yo pa pataŋana tio taiŋgi.

¹⁸Re pataŋana biibi ta ikam yo i, mi uulu yo. Pa iŋgi aŋbot ambai som kat. Mi mbulu tio boozomen ta irao pa nu motom som na, reege ma ila ne.

¹⁹Re, koŋ koi bizin na, boozo kat! Mi keten malmal kat pio mi tisombe titeege zaaba pio.

²⁰Tamen nio aŋpase pu be we ur pio mi menderkaala yo. Tana motom pio mi we seraara pa koŋ koi bizin. Kamke yo la naman. Kokena tilip pio, to koŋ miaŋ.

²¹Yooba, leleŋ be aŋkam mbulu ndeeŋeŋana men raama leleŋ. Tana aŋur motoŋ pu mi aŋpase pu be poroukaala yo.