Mbouŋ To Yes Israela 25:10-21

¹⁰Yes tau matazi kisin saveeŋ mbuaaŋ toozi tomania Yoova, ve titaghon eez tau i ighuru pa tamtamon tooni na, i loolo isaghav zi ariaaŋ ve iuluul zi itaghon saveeŋ mbuaaŋ tooni.

¹¹O Yoova, yau nagham sosor katini kat. Eemon yo ezam tiina pa ŋgar tsio tau lolom isasaghatin yei tamtamon. Tauvene ureu sosor tsiau.

¹²Tamtamon tisov tau tiroi pa Yoova ve tighe titaghon ŋgar tooni na, i pale itotoi eez pazi. Leso tiwatagh eez sindei tau yes aat titaghoni.

¹³Zeran tauvene, lepoogh toozi pale poia kat. Ve natuzŋa paam, pale tileep poia izi taan tau Yoova igham pa tamtamon tooni.

¹⁴Yes tau tiroi pa Yoova ve titaghon ŋgar tooni na, timin i zeetŋa duduuŋ. Tauvene i ivovotia ŋgar tooni yoŋgaaŋa pazi, ve ipaghazoŋai zi pa eez to yesŋa tivalupu zi timin eemon itaghon saveeŋ mbuaaŋ tooni.

¹⁵Saawe isov, yau naghurghur matag pa Yoova naghe i aat iuul ghau. I pale ipas agheg pa liis tau koiagŋa tighuru payau ne.

¹⁶Yoova, yau besooŋa tsio. Tauvene matam imuul ilam payau. Lolom isaghatin ghau, ve uul ghau pa pataŋani tsiau. Pa yau zigau kat. Leg etag eta to iuul ghau pa pataŋani tsiau tane mako.

¹⁷Lolog ipataŋan kat ve nagham ŋgar naol. Pasaa, yau leg eez eta mako. Upas ghau navot pa pataŋani tsiau tane loolo.

¹⁸Ughita pataŋani ve saghatiiŋ tiina tau ivot payau ne, ve uul ghau. Ve ureu sosor tsiau tisov tilalez.

¹⁹Ughita. Koiagŋa, yes eval. Ve atezi yavyav payau kat. Tighe le tivaghamun ghau.

²⁰Eemon yau nanumeer ghom naghe yo aat ugham mulin ghau ila koiagŋa nimazi, ve uŋgin ghau naleep poi. Yau nayooŋ ilat tsio. Tauvene upul zi tiliiv ghau sov. Ighe mako, pale mayag.

²¹Yoova, ŋgar tsiau iyaryaaŋ naghe nataghon ŋgar popoia tau iduduuŋ mon ila yo matam. Tauvene yo aat upoon ghau pa gabua sasaghati ta naol ne. Pasaa, yau naghurghur matag pa uleeŋ tsio.