Mboe 140:1-11

¹Mboe ki Dabit O Yooba, tatke yo pizin wal sananŋan. Poroukaala yo pizin wal ta tikamam zaaba pizin tomtom na. Kokena tipasaana yo.

²Zin lelen iurur pa ŋgar sananŋan bozboozo, mi tipesese zin tomtom pa malmal.

³Kwon na, kembei mooto sananŋan. Pa sua ta tiwirri na, mataanaŋana, mi ipasansaana zin tomtom kembei mooto kananŋana na.

⁴O Yooba, menderkaala yo: Kokena zin wal sananŋan tikam yo. We seraara pa zin wal ta tikamam zaaba pizin tomtom na. Pa iŋgi tirru zaala be tikam yo ma aŋtop.

⁵Zin wal ta tipakurkur zitun mi matan pasomu, ta iŋgi tiur napitpit kizin be tipasaana yo. Mi tiraara pu kizin be tikam yo. Mi tiur kilis su zaala ta aŋwwa pa, bekena tikeene yo.

⁶Mi nio aŋso pa Yooba ta kembei: “Nu ta Anutu tio! Ŋgun talŋom pa tiŋiizi tio ti mi muŋai yo.

⁷O Yooba, Merere tio, nu ulaaŋa tio mburomŋom. Indeeŋe mazwaana ki malmal na, nu poroukalkaala yo.

⁸Yooba, iŋgi zin wal sananŋan lelen iur be tipasaana yo, mi timburmbuuru pio. Tana aŋsuŋu be koto zin. Kokena ŋgar kizin sananŋana tana iur ŋonoono.

⁹Zin nin se mi tiliu yo be tipasaana yo. Mi nio aŋsuŋu be pimiili sua sananŋana ta iwedet pa kwon na, ma imiili pizin mi ipasaana zitun.

¹⁰Kam ma you keseene itoptop sala ŋwan. Mi piri zin sula kat naala ta usomŋana i. Kokena tise mini.

¹¹Zin wal ta tiŋgalŋgal sua pakaamŋana pizin tomtom na, ziiri zin pa toono ku ma tila len. Mi zin wal ta tikamam zaaba pizin tomtom na, mbulu sananŋana ko iketo zin mi ipasaana zin ma timap.