Markus 9:28-30

²⁸Me eneko wali taogti, sekogpa, Yesus eldi yubu ka'ero neleptopnangap ae lomag wa'ina, mo wamek. Sin Yesusap nhon mo wamekti, Yesusag hailamekti, “Nai, sa'a sembe nuri phia nimi kulomag ua ulamsilne neneko nuri yaglambahinep kom?” aro haibaek.

²⁹Wene aro haibaekpa, Yesusti samoro ambarelamsiogti, “Phia yonge nene saogne yag lambahinepnena, mo yubuag agha, 'Lambae,' arop tanena, yaglambanep kom. Ot Nuni Allahag molona mololapmunba, Allahri ka'ebom agha wali sele taneogna, El mikipne pere agha yag lambahinep,” seog.

³⁰Seogti, Yesusap eldi yubu ka'ero neleptopnangap mog so'o aneko laplobi agha mog so'o Galilea phiro piek. Palamekti Yesusti senelamogti, “Nari yubu ka'ero neleptopnangap mo wameberi, ot sin aghabog el nenero ambarelamsinun. Ane sembe nu tane wamapne sembe nimiri el taikag,” aro lag palamek kom. Yesusti eldi yubu ka'ero neleptopnang ambarelamsiogti, “Na imag agha mog so'oag nimi tahinge aghana, nimi nhondi na aisanang saeag nenero pankhebanelul. Pankhebaneleba, ya'ag omneik aghana, wilindip sum nen samoro kamag tanun,” aro ambatsiog.