Mark 5:11-33

¹¹Ma poro boruna ḡaeḡaena au ḡereḡere ola au adana i labalaba.

¹²Ma arua-apoapoei, Iesu i vibaḡai, “Ma paritawanelai poro au orai ana rui.”

¹³Iesu i vianina. Ma arua-apoapoei, orotona i opu-tawanei ma poro au orai i rui. Poro boruna 2,000 nanare olei i ruba ḡaira da au topa i monu.

¹⁴Ma poro taupainii i ruba nae au melagai ma au wapu; ma riwa i vibabarai. Ma rava i nei da ita inanai aiwai i tupua.

¹⁵Ma maranai i nae Iesu awarina, orotona au naona arua-apoapoei patarai au orana i mamae; tauna i kiakiala, gara i oteni ma ana nota jijimanina. Ma taui i rovo kaua.

¹⁶Ma aiwai i tupua orotona ma poro awari, taui i ʼnainanaia, rava i riwana-naiei.

¹⁷Ma dobuna ravai, Iesu i vibaḡai da dobuna ita oputawaneii.

¹⁸Iesu au waga i gerugeru ma orotona, Iesu i vibaḡai i pa, “Tau maiteni tana nae.”

¹⁹Iesu i viḡaei ma i riwei i pa, “Ma naeme am au dam. Ma Bada kaua aiwai ḡaeḡaena i kaukaueia ma ana iviaiai tam awarim, taui ma pariverei.”

²⁰Ma anina orotona, Iesu i netawanei ma i nae au Dekapolis (melagai 10) da Iesu aiwai awarina i kaukaueia, rava i riwana-naiei. Ma taui anatapui i nononoria i baiei.

²¹Iesu wagei i damana me topa au baba ḡelauna. Maranai kampa i ḡeta ma topa au adana, ma patara i rieiai.

²²Pari numana badana wavana Jairus i nei weka ma maranai Iesu i ʼnanai, tauna Iesu au aena i mae-peu

²³ma i vibaḡa-guratei i pa, “Natu guguinina e irairaḡe. Ma nei ma uram au inina ma terei ma ina lawana.”

²⁴Anina ma Jairus, Iesu maiteni i nae ma patarana i mae gariḡuruvi ma i votaḡotaḡoi.

²⁵Wavine tagogi kampa patarana au orana awarina tara-doriana i mae da madeḡa 12 i kwa.

²⁶Ana mane anataputapuna, dokedoketa maḡamaḡaui awarii i tawanei ma eḡa tagotagogina ita vilawani ma amapo da ana doria i rarata.

²⁷Tauna, Iesu nolana ma ana babani i nonori ma au orana i vinua-notanota i pa, “Mepa da ana gara ava ana vodadani ma ana lawana.” Ma tauna, Iesu murinei i nei ma ana gara i vodadani.

²⁹Maratagogi, tara-doriana i wanatuini ma malana i vaia da i lawana.

³⁰Nai maranaina, Iesu malana i vaia da ana rewapana i opu-tawanei ma i mae-tavirei patara au poui ma i riwa i pa, “Aiai au gara i vodadani?”

³¹Ana tauvotaḡotaḡo, tauna i riwei, “Ma inanai, patara i mae gariḡuruvim! Ma menanare da u riwa ‘Aiai i vodadaniu?”

³²Wate Iesu i ʼnana viravira da ita inanai aiai i vodadani.

³³Wavine i rovo kaua ma i sisisi, wate i aramanei aiwai awarina i tupua ma i nei ma Iesu au naona i raupari ma aiwai anatapui i vieḡei.