Maka 5:11-33

¹¹Esino koola mapoo esia dokodoo be hu bei mooloogoo doloso, mi nalagamo sile sibiso.

¹²Eseme bo holo oso Yesu mapoo see howaso, “Nayo iba be mapoo palame seesee pagalai soowayo?” diso.

¹³Eseme Yesuye diba be ma kulodu gasoowadee neme, bo holo odoo ma kuloduga galagasibileso see be ma kulodu soowadeeso. Eseme be bei 2,000 egesi oso esia dokodooga abei mapoo kuko meileso abei ma kulodu weidaso.

¹⁴Be gi debeli odoo oso goo hagee ogoloso kuko dulone mi toowa mapoo osoloso mi pepoko abo mapoo takomo diso. Eseme odoo susuga to hagee duloso, diba agalame sibadeeso.

¹⁵Odoo susuga Yesu mapoo sibileso mooloogoodooso, esino odoo bo holo pala see tekepo poloso, goo tekepo gooleme dugo tekepo kaloso, Yesubolo badoboome ogoloso dia ebiaso.

¹⁶Be gi debeli odoo diayo goo odoo mapoo peledapa sabolo be mapoo peledapa sabolo ogoloso odoo susuga mapoo takaso.

¹⁷Osoloso odoo mooloogoodoo susuga oso to hagee duloso, Yesu mapoo see howa see howa diso, “No hamaga peegoo di!” diso.

¹⁸Yesu dilame du mapoo topome, odoo daga bo holo polome Yesuye moodoo oso Yesu mapoo egeesee howaso, “A nobolo dilei goomogo.”

¹⁹Esino Yesuye yimapoo egeesee takaso, “Haye, no mosopoo wedi dileso, Lodeeye sooloo dolone goo tekepo namapoo moodoo nemisi dimapoo takalame di,” diso.

²⁰Eseme odoo see abaga wedi dino Dekapolisi mi mapoo mosobia 10 mapoo takomo diso. Odoo susuga yayo taka duloso dia howoogaso.

²¹Yesu o hamamee dili odoo sabolo abei dala soowaso, osoloso abei palaga mapoo odoo susuga yimapoo mooloogoodooso.

²²Mi omapoo Yu odoowo howo gisili moso mapoo wiligi odoo toba, o hu Yailas, yayo Yesu ogoloso o homo beiyopoo gawuaso.

²³Osoloso yayo see Yesu mapoo howaso, “Mo sobo holo paiye moodoolame, yo talai koola tapa, esiga nee deeso yo sigilame sibe, yo paiye wediloso, see gie badalame.”

²⁴Eseme Yesu yibolo dime odoo mooloogoodoo susuga hamamee yo pupugamo diso.

²⁵Osoloso mooloogoodoo eyo kulodu sobo aso woloma oso sawo dimili ososee dugo 12 poogooso.

²⁶Sobo yo melesenee neli odoo bei mapoo diayo pidilame dugo susuga dimiliso, esino diayo yimapoo dala toowa tenemeleeso. Osoloso yayo dimapoo melesenee talame, melesenee eyo nei magolone o molee susuga hosudooso, esino yo sawo dimili koodobilega see toowa poloso, sawo osee dimiliso.

²⁷Esino sobo yo daga Yesuye odoo tekepo moodoomo sili duloso, yo odoo mooloogoodoo kuloduga Yesuwo miligiyo hamamee sibileso o dugo sage yayo ka mapoo sigeso.

²⁸Sobo yayo goolee Yesuwo dugo sigoga yo wedilei gooleeso.

²⁹Yayo Yesuwo dugo sigime sawo dimili saga koodobiaso. Eseme yo eyo egeesee gooleeso, “Sawo dimili tekepo pa,” gooleeso.

³⁰Yesu eyo gooleeno odoo moodeli kitulugu yimaga peegoo di neme, yo odoo mooloogoodoo mapoo hodio bidi puguloso egeesee takaso, “Edebeeyo mo dugo sigo. Ayo gooleedalaiya, mo dugo odoo agayo sigoba.”

³¹Eseme o hamamee dili odoo oso yimapoo egeesee takaso, “Odoo mooloogoodoo susuga nama hodu kokosooso. Esiga nayo kasalame, ‘Edebeeyo mo dugo sigo. Ayo gooleedalaiya, mo dugo odoo agayo sigoba’ doloso ka takala? Bei odoo susuga oso nama sigoso.”

³²Yesu odoo mooloogoodoo kulodu osee esia meleeso, yo odoo agayo sigebeleeso.

³³Esino sobo Yesuwo dugo sige oso eyono moodoo goolee puguloso obulone kikilika sabolo sibileso o homo beiyopoo badebeiso, osoloso eyo goo moodoo Yesu mapoo takaso.