Mareko 9:4-16

⁴Wige dasmerdare Elaiza a Mose Iesui mir detagelei.

⁵Peterude akaidari Iesui detagri, “Erwerle, audebele ikeredi ki peki dale. Ki umele 3 mud dauridere - netat mara, netat Elaizara a netat Mosera.

⁶Peteru a neis memegle yaba geum barkidare. Ableluglam Peteru e nole umerkak dawer e nalu mir waditauti.

⁷Baz tikada bakmerikda yaba mud. Bazlam kodomir teosmeda, “Kara nasnas werem pedali. Abi asrawem.”

⁸Nade wi erkep etardare, wige dasmerdare Iesu tebteb ikeireder.

⁹Nade wi tabidare paserlam, Iesude yabi daratagerda, “Wa nole netat le detagridare nalu lu ge wawa dasmerdare.” No pe ikeredi nade ya Lera Werem eudlam wekiam wi umele ya le wadaratagerlare.

¹⁰Wige abra mir dasorda, wige no tabara batagelare nalu agekar lu ikeredi 'eudlam ekiamda'.

¹¹Wige eudige Iesui itmerda, “Naluglam Aotarlegize detauteda Elaiza kikem watatabakiamu?”

¹²Iesude yabi daratagerda, “Agekar Elaiza kikem tabakiamuda ko gair lu wadararsirare. A mipe nalu pemi etagada nako Lera Werem dali muige Zogoziawalige? Mi etageda e asiasi wadigi a abi wadituaklare!

¹³Ka wabi detagreda, Elaiza emetu tabakiamuda, ege legize abim adud tonar ikelare nalu ge wi laglag urder, able mokakalam able orwairorwair pe mimi abra ad detagreda.”

¹⁴MRK 9.14-29 Nade wi takomertidare wader memegle nardarda, wige erdardare au kub lera yabi daramuareta, a wader Aotale memeglekem basaredlare.

¹⁵Ege legize erdarda, wi bazigmuarti a korider abim bamri ko abi watigareda.

¹⁶Iesude tabara memegle nautmerda, “Wa naluglam pewa tabasardeda?”