Mareko 9:13-34

¹³Rehano eḡeꞌa ziꞌohe. Elia ai onaeha, ebu vaze nuꞌa ane mazao zeḡe ura haḡaiḡa haḡaeha, ibite buka zaḡoḡa zamaḡano tiroteꞌe teigenaꞌa.'

¹⁴Iesu zuni Petero, Iakobo ebu Ioane, zeḡe ḡazaḡaꞌa ane tahiꞌa fuꞌo tu ḡazaḡa fare mazao feuri ꞌovoiro. Vaze ḡuḡuvaḡaniꞌa, zeḡe fuꞌo tu ḡazaḡa fare edau ḡeḡezoga horoziro. Ebu Mose goro ḡoeꞌa ihozeꞌeteꞌe azaḡaniꞌa, Iesu tahiꞌa tahiꞌa teite rotetiro.

¹⁵Ebu vaze ḡuḡuvaḡaniꞌa Iesu horonirotene, zaguzaganadu, ane vaḡe dure onamiro, ebu hidadu matuꞌoharo.

¹⁶Iesuꞌa ane tahiꞌa ḡadizenaꞌa, 'Zeḡe teite nagini uꞌano roteteꞌohe?' rae ziro.

¹⁷Ebu vaze ꞌahoganiꞌa ḡuḡuva zamaḡanonoꞌo naenaeniꞌenaꞌa, 'Ihore vazeḡa, e ubudehe ḡae vaḡe tutune onaeha, mazaḡa aniꞌe vine sauꞌaniꞌa ragano radu, ḡoeroga mene idaḡa.

¹⁸Vine sauꞌaniꞌa agatiniꞌetene, rahao mae feuneꞌohe. Hebeꞌanonoꞌo busureꞌohe. Ḡonoga atiteꞌohe, ebu ahiꞌaniꞌa taiduꞌohe. E ḡae tahiꞌa tahiꞌa mazao, vine sauꞌa hegone bunoga veize ḡadimana rehano, ze hegone bunihi ra, rehano mene idaraneha.'

¹⁹Amaḡe Iesuꞌa zinaꞌa, 'O! Za Badiꞌa mazao mene fieꞌeteꞌe azaḡa! E za teite nouge daꞌo radiu onaꞌuma? E nouge ihoze onameꞌeꞌuma? Tahiꞌa kobeꞌa tutune aroꞌi eḡe vaḡe.' reiro.

²⁰Zeḡeꞌa ane vaḡe tutune ariro. Vine sauꞌaniꞌa Iesu horonirotene, tahiꞌa komeꞌa mae ketoketoniro. Rahao higau bauriro, ebu kiure ragaviro, ebu hebeꞌanonoꞌo busuriro.

²¹Iesuꞌa moga ḡadiniro. ꞌAhige reiro. 'Noꞌe madaḡano ani ugi ꞌahi meiro?' Moganiꞌa ninaꞌa, 'Ani komeꞌa madaḡano meiro.'

²²Ebu raenaꞌa, 'Iḡaiḡa ire roga zamaḡano zu vu zamaḡano, vine sauꞌaniꞌa mae feuneꞌohe, ani uraꞌe ḡaboneḡa sausaunihi raduni. Ḡa fainoga edeḡa roꞌidene, vetuḡafoꞌi ebu danafoꞌi!'

²³Iesuꞌa niro. ' “Ḡa edeḡa roꞌidene” rae ihiꞌehehe? Badiꞌa mazao fieꞌeteꞌe vazeḡaniꞌe, nagi gauḡa haḡaogaꞌe edeḡa.

²⁴Tahiꞌa komeꞌa moganiꞌa ḡarihe ḡihau niro. ꞌAhige reiro. 'E Badiꞌa mazao fieꞌohe. Rehano eḡeꞌa mene idaruꞌeteꞌe moneo, danahoꞌi!'

²⁵Iesuꞌa vaze ḡehaḡaniꞌa dure onairoteꞌe horozirotene, vine sauꞌa taꞌiroharo. 'Ḡa, vaze mae uhuneꞌeteꞌe zu mae baboneꞌeteꞌe vineḡa sauꞌa! Eḡeꞌa ḡaꞌohe. Ane mazaonoꞌo buanoꞌi! Ane ragano bare ago roꞌi!'

²⁶Vine sauꞌaniꞌa ḡihau ḡaniḡanauꞌenaꞌa, tahiꞌa komeꞌa mae ketoketonadu, buaro. Ebu tahiꞌa komeꞌaniꞌa rune teige baziro. Vaze ḡehaḡaniꞌa ani horonadu, ze ꞌane ani rudaneha reiro.

²⁷Rehano Iesuꞌa evoꞌano mae ḡihiniro, ebu tahiꞌa komeꞌaniꞌa iḡune edaro.

²⁸Iesuꞌa ne ꞌahoga diuḡirotene, tahiꞌaḡaniꞌa sifu sifu ḡadiniro. 'Nougaꞌahi emeḡeꞌa vine sauꞌa hegone bunoga mene idaraneha?'

²⁹Iesuꞌa zinaꞌa, 'Vine sauꞌa ꞌahiguḡaꞌe kuru hina daꞌo hegoze buzeꞌohe. Mene kurauneꞌe, vine sauꞌa ꞌuguḡaniꞌe hegoze buzogaꞌe mene idaḡa.'

³⁰Iesuꞌa ane tahiꞌa tahiꞌa teite eꞌe habaꞌa mode iḡunadu, Galilea habaꞌano vitau onamiro. Ebu Iesuꞌe aneꞌa noumao radiuꞌeteꞌe, vazeꞌa ederoga mene uratiro.

³¹Mazaḡa aniꞌe tahiꞌaḡa ihozeꞌenaꞌa, onamiro ꞌahine. ꞌAhige reiro. 'Eḡe, Vaze Ubuganiꞌe, vazeꞌa meꞌuma, ebu uḡuhiꞌuma. Ebu mada uḡidu zamaḡano bare ḡabode iḡuniꞌuma.'

³²Rehano zeꞌe, aniꞌa ḡoerirotaꞌaꞌe mene zamariro, ebu zeꞌa ḡadinoga riharo.

³³Zeꞌa Kaperanauma neḡano feuriro. Zeḡeꞌa ne diuḡirotene, Iesuꞌa tahiꞌaḡa ḡadiziro. 'Za ibio onaateꞌe zamaḡano, nagini ḡoꞌane onaeha?' reiro.

³⁴Rehano zeꞌe mene ḡoreniro, ibio onaateꞌe zamaḡano iniu niḡa boro raenaꞌa, zeḡeꞌa zeḡe bare ḡoꞌaziro ꞌahine.