Markus 9:13-34

¹³A I indai ong komail, Elias pwarer, o re wiai ong i, me re mauki duen a intingidi due.

¹⁴A lao koti dong tounpadak kan, a masani pokon kalaimunia eu kapil ir pena o saunkawewe kan peipeidok re irail.

¹⁵Ni ar kilangadar i, pokon o ap puriamuiki la tangado ranamau ong i.

¹⁶A ap kotin kainoma re irail: Peidok da kai, me komail idedok re ’rail?

¹⁷Amen toun pokon o sapeng i potoan ong: Saunpadak, i potoan dong komui nai putak o, me ngen lotong mi poa.

¹⁸Ari, wasa karos me a kin tiada poa, a kin kapururada; a ap kin pudopud o katekatete ngi o tongetongela. I potoan ong sapwilim omui tounpadak kan, pwe re en kausa sang i, ari, re sota kak.

¹⁹A ap kotin sapeng irail masani: Di wet meid soposon. Ia arain ai pan mimi re omail, ia arain ai pan kokoa komail? Wa dong ia i!

²⁰Irail ap poto dong i. Ni a kotin masani i, ngen o ap madang kupururada i; a ap pupedi ong nan pwel, wia pudopud taputapur sili.

²¹A ap kainoma ren sam a: Ia arain me kot et a lel? A ap potoan ong: Sang ni a seri.

²²Pan me toto a kin kasedi ong i nan iai o nan pil, pwen kamela i. Ari, ma re kotin kak ong, re kotin kupura kit ala sauasa kit!

²³Iesus ap kotin masani ong i: Ma koe me poson; meakaros me kak ren me poson.

²⁴Madang sam en kisin seri ap weriwer, sangesang, potoan: Maing, i poson. Kom kotin katinaiada sang ai soposon.

²⁵Ni en Iesus a kotin masani ar tangetang pena, a ap angiangiada ngen saut o kotin masani ong ngen lotong o salongepon: I indai ong uk, koieido sang lole! Koe depa pure wong i!

²⁶A ap weriwer, kapururada kaualap, ap koiei sang. I ari likamata a melar. Akai ap inda, a melar.

²⁷Iesus ap kotin ale pa a kauada, i ari uda.

²⁸Ni a koti dong ni im o, sapwilim a tounpadak kan ap okiok peidok re a potoan ong: Da me se sota kak kauseki sang?

²⁹A ap kotin masani ong irail: Song wet sota kin koki sang meakot kapakap o kaisesol eta.

³⁰Re ap kotila sang wasa o, weidala nan Kaliläa. A sota men, meamen en asa.

³¹Pwe a men kotin kawewe ong sapwilim a tounpadak kan ap masani ong irail: Nain aramas pan pangalang ni pa en aramas. Irail pan kamela i a murin a kamela a pan maureda murin ran kasilu.

³²A irail sota dedeki masan o; a re masak kalelapok re a.

³³A ap koti dong Kapernaum; ni a kotikot nan im o a ap kotin kainoma re ’rail: Da me komail akakamaiki nani al o?

³⁴Irail ari nenenla, pwe re akamaiki nani al o, is me pan laud re ’rail.