Mareko 10:23-34

²³Iesuꞌa tahiꞌaḡa ḡiaze ragavadu, ꞌahige rae ziro. 'Maꞌora vazeḡaꞌe, Badiꞌaꞌa ibitohauꞌeteꞌe vazeḡa rougaꞌe riḡa bagaḡa.'

²⁴Ebu zeḡeꞌa eꞌe ḡoeꞌa igirotene, zaguzagaro. Rehano Iesuꞌa bare ziro. 'Eḡe tahiꞌa tahiꞌa, Badiꞌaꞌa ibitohauꞌeteꞌe vazeḡa rougaꞌe riḡa bagaḡa.

²⁵Kameroꞌe niduru hoꞌoga diuḡogaꞌe riḡa. Rehano maꞌora vazeḡaꞌe Badiꞌaꞌa ibitohauꞌeteꞌe vazeḡa rougaꞌe ufeta riḡa.”

²⁶Ze eꞌe igirotene, zamaze niduꞌa zaguzagaro, ebu Iesu niro. ꞌAhige reiro. 'ꞌOugine, iniuꞌa daꞌo ḡabone hidiꞌuma?'

²⁷Iesuꞌa ḡiazadu, ziro. 'Vaze aneꞌa bare ḡabone hidogaꞌe mene idaḡa, rehano Badiꞌaꞌa vaze ḡaboziꞌuma. Mazaḡa aniꞌe gau niduꞌa haḡaoga idaḡa.'

²⁸Peteroꞌa Iesu ḡoreniro. 'Ḡianoꞌi! Eme tohe niduꞌa modadu, ḡae ḡaruna hegoteꞌohe'

²⁹Iesuꞌa rae ziro. 'E hubehune ziꞌohe. Vaze ꞌahoganiꞌa neḡa, negoḡa, ezeḡa, viꞌa, moga, eneḡa ga habaꞌa, eḡe uꞌano zu Badiꞌa hari manoḡa uꞌano modine,

³⁰ani izidi madaḡano ḡae sinahu eꞌe bare meꞌuma. Neḡa, negoḡa, ezeḡa, viꞌa, eneḡa ebu habaꞌa bare meꞌuma, rehano aduga zuni hidiꞌuma. Ebu mada ḡonaganiꞌa onaine, ḡabone tuḡutuḡu* meꞌuma.

³¹Rehano ibiteꞌeteꞌe azaḡa ḡehaḡaꞌe vesiꞌuma, u veseꞌeteꞌe azaḡa ḡehaḡaꞌe ibitiꞌuma.'

³²Iesu ebu ane tahiꞌa tahiꞌaꞌa, Ierusalema ibiḡano onameꞌegano, Iesuꞌa ibitiro. Eꞌe ḡianirotene, zeꞌe zaguzagaro. Hegotiroteꞌe azaḡa zuni riharo. Ebu Iesuꞌa ane tahiꞌa gaubanana aheu fare (12) bare huze onairo. Ebu naginiꞌa ane mazao fureraꞌuma, eꞌe ihoziro.

³³ꞌAhige reiro. “Ḡianoꞌi, emeꞌe Ierusalema iteꞌohe, ebu eḡe, Vaze Ubuganiꞌe dibuꞌo vazeḡa ḡihiꞌaḡihiꞌa zu Mose goro ḡoeꞌa ihozeꞌeteꞌe azaḡaniꞌa obohe tiꞌuma. Ebu zeḡeꞌa raenaꞌa, 'Ḡaꞌe rudaꞌuma,' reꞌuma. Ebu Baduꞌa aḡuꞌa azaḡa* ꞌevoreo riꞌihiꞌuma.

³⁴Zeḡeꞌa ḡirihoniꞌuma, soꞌabide vahiꞌuma, masihiꞌuma, ebu uḡuhiꞌuma. Ebuni mada uḡidu zamaḡano, bare ḡabode iḡuniꞌuma.'