MARCOS 1:7-17

⁷Yɨdeꞌen ɨdøꞌøn kyaꞌamay mayja̱a̱ꞌy agujkp: ―Ja øts ja ja̱a̱ꞌy tuꞌuk ɨxꞌoojk xpamiñ pøn møkta̱ꞌa̱ky yikutukp jaꞌagøjxp ku kutujk ja tmɨmiñ møkꞌampy, kaꞌap øts ja nmɨꞌaba̱a̱ty jadeꞌen sa̱ yikutuky, nɨjuunɨ øts ja møøt nganamyɨba̱a̱tꞌa̱tɨyɨt.

⁸Paty meets ɨxya̱m tɨy janch ndyimdyukmadøy, jøts ku øts jaꞌayɨ tø nnɨmiñ jøts meets nøø nduktanøbatt; jøts ku døꞌøn ja yja̱ꞌa̱tt pøn øts ɨdøꞌøn ndijpy ɨxꞌoojk memp, jawaanɨ øy ja tyunk ja ttuꞌunt kumɨ Espíritu Santo ja tyuktatøkɨp ja ja̱a̱ꞌy.

⁹Xjats ja Jesús wɨnet et chøøꞌñ Nazaret, jam ka̱jpkøjxp midi wyɨnaty Galileꞌɨt ja̱a̱ꞌy yꞌetjotp, jøts ja ñijkxy nøbajtpɨ møj nøøjotp midi txøøwꞌa̱jtp Jordán, ma̱ Juan ja yiknøbajtɨ.

¹⁰Xjats ku ja pyɨdsɨɨmy møj nøøjotp, wɨnets ja ojts tꞌixy ja tsa̱jp jøts ku ja yꞌawa̱ꞌa̱ch, jøts Espíritu Santo ja jadeꞌen ñɨgɨda̱ꞌa̱gyɨ sa̱m ja tsa̱pa̱k.

¹¹Xjats yikmadøøy ja Dios Teety yꞌayuujk jap tsa̱jpjøtpy, yɨdeꞌen ja wya̱ꞌa̱ñ: ―Øts me nꞌuꞌnkꞌajtpy; njanchøjkpy mets jøts njanchtajotkujkꞌajtpy mets.

¹²Wɨnets ja Espíritu Santo yiknøjkxøø jam aba̱k etjotp,

¹³jøts ja Jesús jam wɨxijkxyøøw chɨna̱a̱y. Xjats ja mɨkuꞌ ja yikpojkpɨtunwa̱ꞌa̱ñɨ, jøts ja nɨjuunɨ tkamɨmadøøy. Jam ɨdøꞌøn ja chɨna̱a̱y ma̱ ja may awa̱ꞌa̱ñ jɨyujk jam chøønɨdɨ, xjats ja a̱nkɨlɨs ja pyudøjkøø.

¹⁴Jøts ku ja Juan wyɨnaty tø yikpɨkta̱knɨ jap puxøjkjøtpy, wɨnets ja Jesús chøøꞌñ jøts ja ñijkxy Galileꞌɨt etjotp, ma̱ ja tnɨgaꞌama̱a̱y ja øgyajpxy ja ømyadya̱ꞌa̱ky, midi ñɨgajpxpy sa̱ Dios ja yja̱a̱ꞌy ttanɨtanɨt ja kyutujk.

¹⁵Yɨdeꞌen ja wya̱a̱ñ: ―Tønɨm ɨnet ja xøøw ja et yja̱ꞌa̱ty, wɨngomp ɨxya̱m ja Dios kyutujk midi ya̱ tuꞌump. Yiktɨga̱tstɨ ja mdsɨna̱a̱ꞌyɨndɨ, ja̱ꞌdyɨgøøgyøxtɨ tukɨꞌɨyɨ ja mgaꞌøyja̱a̱ꞌyꞌa̱jtɨndɨ, jøts janchja̱wɨdɨ ja øgyajpxy ja ømyadya̱ꞌa̱ky.

¹⁶Jam ɨdøꞌøn mejpyaꞌa̱m midi txøøwꞌa̱jtp Galilea, jam ja Jesús wyɨnaty ñaxy ku ja tꞌejxpa̱a̱jty namajtsk ja ja̱a̱ꞌy, ja Simón jam wyɨnaty møøt ja yꞌuch Andrés. A̱jkxma̱ktɨp ɨdøꞌøn ja tyunkꞌa̱jttɨp, xyuumy ja jam wyɨnaty ñøøwejtspajttɨp midi ja tyaꞌa̱jkxma̱ktɨp.

¹⁷Xjats Jesús ja tnɨma̱a̱y: ―Mada̱ꞌa̱ktɨ, møøt wɨdettɨk øts jøts nduknɨja̱wɨdɨt sudso ja̱a̱ꞌy ja nɨtsoꞌokꞌa̱jtɨn tpa̱a̱ty.