Mak 9:3-36

³Anuna kaenla i pil pa i kokok rakrakai kol, pa bel tik mite lapiu ir gos totoh pas ta kaen manglarning.

⁴Pa natola kakak a asaer ditol oroi pas e Elaija pa e Moses dia hanot pa ditol warwara taum o e Iesu.

⁵Pa natola kakak a asaer ditol matmataut kol pa e Pita bel i tasman asa ir atongi, pa i atai kama e Iesu mang, “Tena Asaer, i wakak ning dalar kes kama te. Mitol ar tol ir natol a turturup, takai anumi, takai ane Moses, pa takai ane Elaija.”

⁷Lamur a laukap i poroi alar pas la. Pa a elngen takai misaot na laukap i atongi mang, “Ine a Natuklik, a katnan koli. Mulor longor tana.”

⁸Aiapiap ka ditol gilam taltal, ika bel ditol oroi ulak tik, e Iesu kama kaning i tur taum on ditol.

⁹Ning la han purum amon misaot na mangir, e Iesu i sairas ditol sur gong ditol atai tar tik ana sa ning ditol ka oroi tari, tuk ning a Nat a Barsan ir kamtur ulak kusun a minat.

¹⁰Ditol mur a warwara ning, pa ditol deken artalai ditol mang, “Asa momol a kamkamtur ulak kusun a minat?”

¹¹Pa ditol deken e Iesu mang, “Asa kamkamna ning a tena asaerla tagun a warkurai la atongi mang e Elaija ir hanot nigo?”

¹²I keles ditol mang, “A momolna ot, e Elaija ir hanot nigo pa ir atostos ulak a ututnala rop. Pa asa kamkamna ning di ka tumus tari ting na Buk Tabu mang a Nat a Barsan ir kilang a galis a kankan pa bel dir mang suri?

¹³Ika onone ar atai mutol mang e Elaija ka hanot pas, pa la tol a toltol laulaula onoi, arlar ot ana nuknukinla, lar otning di ka tumus tari onoi ting na Buk Tabu.”

¹⁴Ning e Iesu taum ana natol a kaklik a asaer la han purum tetek a kakak a asaerla, la oroi a tnan kunum a taraila kaning la tur talilis pas la, pa a tena asaerla tagun a warkurai kaning la arlak ana warwara taum ana kakak a asaerla.

¹⁵Ning a tarai la oroi pas e Iesu, la kulkulan kol, pa la dun barati pa la gasgas pasi.

¹⁶Pa e Iesu i deken anuna kakak a asaerla mang, “Asa ning mulo arlak na warwara onoi?”

¹⁷Ning a barsan miting na kunum i kelesi mang, “Tena Asaer, a ben a natuk barsan tetek u, ning a mot i kas tar onoi pa bel i tolsot sur ir warwara.

¹⁸Ning a mot ne i sira umi, i sira minggen purumi ting lapiu, pa a busa na pahana i sira purum, i arngingit pa a palaona i rakrakai. A nunung anum na kakak a asaerla sur lar kepsen a mot kusuni, ika bel la tolsot pasi.”

¹⁹E Iesu i keles la mange, “Mulo na tarai tagun onone, bel mulo tortorot! Ia ka kes bongnan iau te napirim mulo. Nangse mulor tortorot? Mulor ben a kaklik ning tetek iau.”

²⁰Pa la ben pasi tetek e Iesu. Ning a mot i oroi pas e Iesu, aiapiapka i minggen purum tar a kaklik ning ting lapiu, pa i pele, pa i busa a pahana.

²¹Pa e Iesu i deken a taman a kaklik mang, “Nangse i turpasi?” Pa i kelesi mang, “I turpasi onoi ning ot i kaklik.

²²Galis a pukakiar a mot i sira minggen tari uting na iah pa uting na malum otleng sur ir umkoli. Ning ur tolsot sur ur kepsen a mot kusuni, ur maris miau, pa ur nangan miau.”

²³E Iesu i atongi tana mang, “U ot! Esining i tortorot i tolsot pas a ututnala rop.”

²⁴Pa a taman a kaklik i kukuk kapit mange, “A tortorot! Nangan iau ana nuk siklik tortorot.”

²⁵Ning e Iesu i oroi a kunum a taraila ning la dun taum, i warwara rakrakai tetek a mot mang, “U a mot, a ngat pa talnganakutkut, a atai u ur purum kusun a kaklik, pa gong ulak ma u kas onoi.”

²⁶A mot i kukuk pas, i gulen rakrakai tar a kaklik ning, pa i purum pas kusuni. A kaklik ning i arlar kama lara minat, pa galis la atongi mang ka mat.

²⁷Ika e Iesu i tong pas a kuna kaklik, pa i dat atur pasi.

²⁸Pa la kas uting na ning a rumai, pa anuna kakak a asaer la deken kumnani mang, “Sur asa ning bel mila tolsot sur milar kepsen a mot kusuni?”

²⁹E Iesu i keles la mang, “A ngas a mot larne ir purum ka ana nunung, bel ana ta utna otleng.”

³⁰La han misaot, pa la han bolos utumo ana papar Galili. E Iesu bel i mang sur tik ir tasman a pukna ning lar kes ano, anasa i mang sur ir asaer anuna kakak a asaerla. Pa i atongi mang, “Dir saran tar a Nat a Barsan uting na kuna taraila pa lar umkoli. Pa lamur tana natol a pukakiar ir laun ulak.”

³²Bel la talapor ana kamkama warwara ne, pa la matmataut sur lar dekeni.

³³La hanot utumo Kapernaum. Pa ning la kas ana rumai, e Iesu i deken la mange, “Asa ning mulo arlak na warwara ono ting na ngas?”

³⁴Ika bel la kelesi, anasa la arlak na warwara mang esi na halinla i leklek kol.

³⁵Pa e Iesu i kes pa i kabah pas anuna ning a bonot pa pisir naur a kakak a asaerla, pa i atai la mange, “Ning tik i mang sur ir leklek kol, i wakak sur ir anatarna pasi, ir tena titol ka tetek a tarai rop.”

³⁶I ben pas ning a kaklik, pa i atur potor tari tanla. Lamur i rawan pasi, pa i atai la mang,