Marcos 9:3-36

³Ontò migkepotì se kedakel te penenaktun din so ontò minanyag. Eked keinang iling kenyan se penenaktun bugsakan dini te tanà, so ontò mepotì.

⁴Penga niyan, kinità dan heman si Elias aw si Moises migbalaw-balaw doma ki Jesus.

⁵Minikagi si Pedro diyà ki Jesus, “Pengolo, mèpiya so dini kay. Ibeg day meg-inang kay den te telo balay amon doen ogpaan te teg sebad-sebad kenyo si Moises aw si Elias.”

⁶Pengkey yan se inikagi i Pedro, meneng wedà din kelebeti aw eden se inikagi din, so ontò dan nelemitan.

⁷Penga niyan, doen labon dimateng diyà kandan, aw wedà dan ebey kità kandan. Penga niyan, dinineg dan se kagi te Timanem lekat te labon, “Seini se Batà ko aw ontò dakel se pedowan ko kandin. Keilangan sikandin se penenelanen niyo.”

⁸Wedà kenamay, timengteng dan aw kinità dan olò si Jesus wedad den doma din.

⁹Pegtopang dan lekat te bontod, ontò migpunù si Jesus diyà kandan te eked kepakay aw indanan dan se doma otaw tepad te kinità dan singed aw meantay sikandin Timanem Migpekeotaw lekat te nematay.

¹⁰Timolò dan te punù din sìyan. Meneng gayed dan migpeinsaay aw eden se kedegdagan te inikagi din tepad te pegkeantay din lekat te nematay.

¹¹Penga niyan, mig-insà dan diyà kandin, “Aw agpet ka den lomowan, nengà lay egtoladà se menge menenoladà te punù ingkeliwat i Moises te keilangan domateng si Elias te eked pa lowan se Misiyas?”

¹²Timaba si Jesus, “Benal domateng onà si Elias amon megpeketagad te kedita. Meneng eneng-enengi niyo heman te doen kagi te Timanem insolat tepad kanak Timanem Migpekeotaw te ontò a elegen aw kebebeyatan a.

¹³Meneng mikagi a den diyà kenyo te dimateng den si Elias, aw medaet se ininang te doma otaw diyà kandin, aw yan se pegketoman te pakang insolat tepad kandin.”

¹⁴Pegdateng dan doton te menge doma tinoledaan i Jesus, kinità dan te ontò medita se otaw netipon diyà kandan, aw doen menge menenoladà te punù ingkeliwat i Moises migbalaw-balaw kandan.

¹⁵Pegkità te kedita te otaw ki Jesus, ontò dan nepela, aw kimagnan dan aw simongon dan kandin.

¹⁶Mig-insà si Jesus, kagi din, “Eden lay se imbalaw-balaw niyo kandan?”

¹⁷Timaba se sebad otaw, “Sir, inibing ko se batà ko amon megtabang ka kandin, so egdetengan sikandin te bosaw migpeomo kandin.

¹⁸Aw egdateng iyan kandin, egpekelias, aw egbohak se bahà din, aw egyangget-yangget se ngipen, aw egkeseg se lawa din. Nemoyò a diyà te menge tinoledaan no te ipelowà dan se bosaw lekat kandin, meneng wedà dan iyan kebatog.”

¹⁹Minikagi si Jesus, “Tay law, sikiyo menge otaw. Wedà kaw pa salig kanak. Eked den kenamay se pegdoma ko kenyo, meneng keilangan tomayod a pa pengkey eked kaw pemenal. Na, pedinihi se batà nikaw.”

²⁰Penga niyan, inibing dan se batà. Meneng pegkità te bosaw ki Jesus, impekeseg te bosaw se batà, aw impelias aw impebolaling sikandin, aw migbohak se bahà din.

²¹Mig-insà si Jesus diyà te amay din, “Kano lay ini pegtebò?” Timaba se amay din, “Lekat pa te deitek sikandin.

²²Melikit sikandin eg-elosen te bosaw diyà te apoy, aw eglemesen heman diyà te wayeg amon imetayan sikandin. Meneng aw mebatog nikaw, keidowi kay bag aw tebangi kay.”

²³Minikagi si Jesus, “Nepela a so egdowa-dowa ka te mebatog ko. Wedad palos eked kebatog te Timanem megtabang te otaw somalig diyà kandin.”

²⁴Minikagi se otaw te dakel se kagi din, “Simalig a den diyà te Timanem. Lobosi se pegsalig ko diyà kandin amon eked a pegdowa-dowa.”

²⁵Pegkità i Jesus te labi pa medita se otaw netipon, sinagda din se bosaw, kagi din, “Sikona bosaw migpeomo aw migpebingel kandin, lowà ka den lekat kandin, aw ikà palos eglikò diyà kandin.”

²⁶Penga niyan, migpuypuy se bosaw, aw ontò din impekeseg se batà, aw penga niyan limowà. Iling te wedad pedowan te batà, aw minikagi se keditaan te otaw, “Nematay den sikandin.”

²⁷Meneng inewidan i Jesus se belad din aw impeenaw din, aw yan neketindeg.

²⁸Peg-olì i Jesus aw menge tinoledaan din, dimoton dan kandin te wedad doma dan, aw mig-insà dan, “Nengà lay wedà day kebatog se pegpelowà te bosaw lekat kandin?”

²⁹Minikagi si Jesus, “Wedà niyo iyan kebatog so eked pelowai se kemolò te bosaw seini singed aw megtawal-tawal kaw.”

³⁰Nayan, nesayo si Jesus aw menge tinoledaan din lekat kidoen, aw minokit dan te probinsya te Galiliya. Meneng ibeg i Jesus, wedad metaga-taga aw kenan sikandin,

³¹amon eked keanggà se pegtoladà din te menge tinoledaan din. Minikagi sikandin, “Seini se metoman domateng diyà kanak Timanem Migpekeotaw. Metoman a itolok aw ibegay a diyà te belad te doma otaw. Penga niyan, imetayan a dan, meneng penga te telo se aldaw, meantay a lekat te nematay.”

³²Meneng wedà dan ketegahi aw eden se kedegdagan te inikagi din sìyan, meneng wedad mig-insà kandin tepad kenyan, so neyàyà dan.

³³Nayan, pegdateng i Jesus aw menge tinoledaan din doton te Kapirnaom, mig-ogpà dan diyà te balay. Mig-insà si Jesus, “Eden lay se pigdindilan niyo gina kidoen te dalan te wedà kidon pa dateng dini?”

³⁴Meneng wedad timaba, so migpedindilay dan aw sinu se ontò melangkaw diyà kandan.

³⁵Penga niyan, nenenoo si Jesus aw tinawal din se kedita te sempolò teg dowa dan, aw minikagi sikandin, “Aw meibeg se otaw megkelangkaw, keilangan megpedanà sikandin te pegkeotawun din iling te kedanà te allang.”

³⁶Penga niyan, tinawal i Jesus se sebad batà, aw impetindeg din iyan kidoen te tengà-tengà dan. Penga niyan, inolid din, aw minikagi sikandin,