Maakakuṉu 9:7-12

⁷Palulanguru yutuwaringku tjananya tjutuṉu. Katutjanya yutuwaringuru wangkangu, “Ngaatjanya katja ngayuku nyinanyi. Rawalunyurra palumpa wangka kulintjaku.”

⁸Palulanguruya pakara nyangu Yiitjunya kutju ngaranytjala.

⁹Puḻingkaya tjarukatinyingka Yiitjulu tjananya marrkuṉu yalatji, “Puḻingka katu nyurrangarri nyangutjangku wiya yaṉangu kutjupa tjuṯangka tjakultjunkunytjaku.” Piyuku tjananya watjaṉu yalatji, “Ngula palyanyurra tjakultjunkunytjaku, kuwarrinyurra puḻingka nyangutjangku, ngayuluṉa yaṉanguku katja mirringuru pakara kutju yananyingka, ngaṉṯinyurra palya tjakultjunkunytjaku.”

¹⁰Paluru tjana tjakultjunkunytjawiya nyinangu. Tjana tjungurringkula wangkarra puṯu kuliṉingi, “Yaalytjiyaalytji ngaangku watjaṉi?, ‘Mirringuruṉa pakara yanku.’” Puṯu kuliraya wantingu.

¹¹Palulanguru Yiitjunyaya wangka kutjupawanangku tjapiṉu, “Nyaakuya Muutjaku wangka nintilpayi tjuṯangku watjalpayi yalatji?, ‘Yirriṯi nyinangutja Yilaatjanya yurrunpa ngalya yanku, Kurayitjanya ngaṉṯi ngalya yanku.’”

¹²Yiitjulu tjananya watjaṉu, “Yilaatjanya yilta yurrunpa ngalyanu, yaṉangu tjuṯa nintira tjukarurru nyinatjunkunytjaku. Yilaatja paluru yini Tjaananya yilta ngalya yanu. Ngalya yankula tjakultjunkunytjala, yaṉangu tjuṯangkuya palumpa wangka kulira wantipayi. Yalatji Katutjaku wangka yirriṯi tjunutja yiltarringu, ‘Yilaatjakuṉu wangkaya kulira wantiku.’ Katutjaku wangka kutjupa yalatji ngaranyi, ‘Kurayitjanyaya kulira wantiku.’ Yilta Tjaana palunya nguwanpaṉiya yaṉanguku katja kulira wantiku. Palulanguruṉiya kulintjawiyangku pungku.”