Luuka 19:2-48

²Ottuukho aariwo mwinyi mmote aari wiitthiwaaye Zakewu, nttunkhulu wa anamariphisa lumpuru na aari thaajiri.

³Ye aari otakha omoona Yinsa, ila khuhisala awahi mwaasa woofupheya channu na atthu aari enkeene.

⁴Aphano khutthira khulokoza khulawa khuwela mmutthi yoori awahi omoona, mwaasa yoori Yinsa aari weettela ovira attaaphale.

⁵Yinsa n'oofiya puuro etile, khweekesa otulu khumoona khumuuza yoori: “Zakewu, waakuve wiishukhe, leelo kinttela omaka vaje vawo.”

⁶Attaaphale, ye khwiishukha wa waakuvavo khumpokherela Yinsa na furaha.

⁷Atthu apale akinoko aari woonaaye vitthu epile, khwaaza ottettha araka: “Nka mooneni otu onttela omaka vaje wa natwampi!”

⁸Zakewu khulankha khweemela khumuuza Mbwana yoori: “Woone Mbwana! Kintta owenkha asikhini phantte moote ya maali zaka na apale kaari oweeyelaaye, kintta owaarutisela swaafu nne.”

⁹Aphano Yinsa khulupa yoori: “Leelo vaje apha yafiyavo nusura maana otu na-ye peewu ya Eburahiima.

¹⁰Mwaasa yoori Mwaana wa Pinaatamu ateela oweekesa apale aashikhiiyeeyo awoosuru.”

¹¹Yinsa aattameliyeevo Yeruzaleemu, atthu khusala oopuwela yoori Ofwalume wa Nnyizinku waari oteela orettikhana nasaapiru. Aphano Yinsa khulupa nlikaniso opu araka:

¹²“Nlume mmote w'oojama wootafikhana, aasaafiriye khulawa nti woolepawo yoori athawaziwe ofwalume nawiisha aruti.

¹³Ahinalawe khuwaakhuwela akarumeya awe khumi, wakhula mmote khumwinkha nzurukhu wa feeta khuwooza yoori: ‘Mwirettele zanshara mpakha miiyo oruti.’

¹⁴Ila atthu a mmuti mwawe khwiiya awiiphiiriwa, khunruma waziri onlotta olawa olupa yoori: ‘Khanimweepu wiiya mfwalume etthu.’

¹⁵N'oothawaziwa ofwalume khurutela owawe, khulawa khuwaakhuwela akarumeya awe apale aawenkhiyeeyo nzurukhu wa feeta yoori ajuwe fwayita apattheliyeeyo wakhula ntthu.

¹⁶Khuta otule wamwanzo khulupa yoori: ‘Mbwana, nzurukhu opule mmote mwaakinkhiyeeyo kapatthela fwayita, wafiya khumi.’

¹⁷Mbwanaawe khunjipu yoori: ‘Waretta saana, o karumeya wa waamineya. Mwaasa yoori weeyo waamineya khwa vitthu vattitthiiru, apho onttela wiiya mfwalume wa sitati khumi.’

¹⁸Otule waphiiri khuta khulupa yoori: ‘Mbwana, nzurukhu enu opule mwaakilikheliyeeyo, kapatthela fwayita wafiya mithaanu.’

¹⁹Khumuuza yoori: ‘Kemaani, weeyo onttela wiiya mfwalume wa sitati thaanu.’

²⁰Otule wa wiishela khuta khulupa yoori: ‘Mbwana, nzurukhu enu opu, miiyo kaatthiiye mmufukho khuthokorela.

²¹Miiyo keetta owoovani mwaasa woojuwa yoori mweeyo mwa awoopisa, mwinthuula etthu mwihithokoreleeni na mwinuurula mwihizaleeni.’

²²Mbwana otule khuri: ‘Karumeya wootakhala rooho! Kintta wuuphuka khwa mattakhuzi awo atthaapo! Weeyo waajuwiye yoori ki ntthu wa woopisa, kinthuulavo etile kihithokoreleeni na kinuurula etile kihizaleeni.

²³Khi wahaathuuliye nzurukhu aka ottha mpanko n'ooruti kisikana ottheerelaniye?’

²⁴Khuwooza apale aari attaaphale yoori: ‘Mwinnyakanye nzurukhu aya opo mwimwinkhe otule ariina khumi.’

²⁵Yo khujipu yoori: ‘Otu aya mwinlupaaye yoori nimwinkhe onaaye nzurukhu khumi!’

²⁶Mbwana khulupa yoori: ‘Kiniwuuzani khweele yoori otule ariina ontta weekezeliwa, otule ahina hatha etile ariina ontta onyakanyiwa.

²⁷Maatuwi aka apale ahaari okitakhelaaye ofwalume, mwiwaatiise apha ooliiwe kiwoonaka.’”

²⁸Paata ya wiisha olupa mattakhuzi apale, Yinsa khusala avira awelelaka eettaka Yeruzaleemu.

²⁹Asaleelaka ofiya nti wa Betifwaye na wa Betaaniya kharipu ya mwaako Oluveera, khuwaalokozisa anakhiyoni awe awiri.

³⁰Khuwooza yoori: “Mwilawe mmuti mphule, mwifiyaka mwinlawa mwansikane mwaana wa puuru afukeleliwe woohaazi opakhiriwa. Mwimfukule mwintiise.

³¹Amana apuwa ntthu awuuzelani yoori: ‘Mwinimfukulela-ni?’ Mwinjipu yoori: ‘Mbwaneetthu ti ye anintakhaaye.’”

³²Apale aawaarumiyeeyo khulawa khusikana nkhama etthiipile aalupiyeezo Yinsa.

³³Wakathi aari omfukulaavo mwaana wa puuru otule, ennyewe khuwoozela yoori: “Mweyo! Mwaana wa puuru oto mwinimfukulela-ni?”

³⁴Yo khujipu yoori: “Mbwaneetthu ti ye anintakhaaye.”

³⁵Aphano khuntiisela Yinsa, yo khuttattikhavo kuwo zaya vapuuru Ye khupakhiravo.

³⁶Ataaka Yinsa, atthu khusala attattikha kuwo zaya ntarikhi.

³⁷Wakathi aattameliyeevo vamwiishukhelo wa mwaako Oluveera, khuntti ya anakhiyoni ooshi khwiiya oofurahi khwaaza onyakula ansifwaka Nnyizinku khwa minjuza epile ooniiyeezo,

³⁸araka: “Attottopeliwe mfwalume antaaye khwa nzina la Mbwana. Yiiyewo heeri pinkuuni na siifwa otulu.”

³⁹Mafwarizeewu apale aari vakatthi wa atthu apale khusala amuuza Yinsa yoori: “Mwanliimu, owooze anakhiyoni awo anyamale.”

⁴⁰Ye khuwooza yoori: “Atthu apa amana anyamala, mawe pi anttelaaye onyakula.”

⁴¹Wakathi Yinsa afiiyeevo Yeruzaleemu, nawoona sitati etile khulila,

⁴²araka: “Oo! Yeruzaleemu, eriwaka waari onjuwa otule aniwinkhaaye heeri leelo! Ila apho epo zaya zavitheya khwa weyo.

⁴³Onlawa wafiye wakathi maatuwi enu anttelaaye wuukukuttelani phantte zooshi ari mmaphotto mwaya.

⁴⁴Onttela ophwantteliwa vamote weeyo na aanaawo, khalinlawa osala hatha liwe vatulu wa liwe nzaaya, maana weeyo khumpokhereleeni Nnyizinku wakathi aateeliyeeyo owuusuru.”

⁴⁵Yinsa khuvira Nnyupa wa Nnyizinku khusala aweekara apale aari wuuzanyisaamo,

⁴⁶awoozaka yoori: “Yaatikhiwa yoori: ‘Nyuupa yaka enttela wiiya nyuupa yoolompiwamo, ila mweeyo mwarettisa wiiya puuro ya malatarawu.’”

⁴⁷Wakhula siikhu Yinsa eetta onozela Nnyupa wa Nnyizinku, ila attunkhulu a mahaakhimu a tiini, anamanozela a kano na anamalokozela a atthu aari weekesa shawuri zoomuula,

⁴⁸ila khuhisala apattha nanna yooretta, maana atthu ooshi aari omwiitaalela Ye n'onsiileza.