Luke 19:2-48

²Ma bay be’ ni pilungen e tamukun tax u rom, ni Zakeus fithingan, nib pire’ ban’en rok;

³ni be guy rogon ni nge guy ko mini’ Jesus, machane re mo’on nem e be’ nib ngoch, ndabiyag ni nge guy Jesus ni bochan e pi girdi’ ni ba’aram nib pire’.

⁴Ma aram me mil nge yan i m’on rok fapi girdi’ ni pire’ me yan nga l’ugun ba ke gek’iy ni sycamore ni fan e nge yag ni guy Jesus ni bay yib nge yan ko gin’em.

⁵Ma fa’ani yib Jesus ko re gin’em me sap ngalang me ga’ar ngak Zakeus, “Zakeus, mu gur nigem ngam luw nga but’, ya thingar gu par u tabinaw rom e daba’.”

⁶Me gurnag Zakeus ir nge luw nga but’ nge yib ngak ni kari felfelan’.

⁷Ma urngin e girdi’ nra guyed ni aram rogon e ra tababgad ko gun’gun’ ni be lungurad, “Re mo’on ney e ke yan nga tafen be’ nib tadenen!”

⁸Me sak’iy Zakeus ngalang nge ga’ar ngak Somol, “Somol, mu tiyilim! Bay gu pi’ baley ko tin ni bay rog ban’en ngak e pi’in gafgow; ma fa’anra kug bannag be’ kug fek e tirok’, ma bay gu fulweg ngak ni aningeg yay e ke mun ngay.”

⁹Me ga’ar Jesus ngak, “Kanawo’ ni nge thap e girdi’ riy ngak Got e ke taw ko re naun ney e daba’, re mo’on ney e ku errogon ni ir be’ ni owchen Abraham.

¹⁰Ya en ni Fak e Girdi’ e ke yib ni nge gay ma nge thapeg ngak Got e pi’in kar maloggad.”

¹¹Ma aram me weliy Jesus ba fanathin ngak e pi’in nrung’aged ni yog e re bugithin ney. Re ngiyal’ i n’em e ke chugur ni nge taw nga Jerusalem, ma yad be finey ni gagiyeg rok Got e kari chugur ni nge m’ug.

¹²Ma aram me ga’ar, “Immoy be’ nib tolang ni yan nga ba nam nib orel ni ngan pilungnag riy nge mu’ me sul nga tafen.

¹³Ma dawori yan me kunuy e tapigpig rok ni yad ragag, me bagayad me pi’ reb e salpiy ni gol ngak, me ga’ar ngorad, Mu guyed rogon ngam maruwelgad ko chi salpiy ney ngam thog niged e salpiy riy ko ngiyal’ nda kug moy romad.

¹⁴Ma fanenikan e girdi’ ko nam rok daken, ma aram miyad l’oeg boch e girdi’ ngar leked ni ngranod rogned ni nge lungurad, ‘Dabumad e re mo’on ney ni nge mang pilung romad.’

¹⁵“Min yan ni pilungnag fa’anem nib tolang nge sul. Ka chingiyal’ nem me yog ngak e pi tapigpig rok ni yad faram e pi’ e salpiy ngorad ni ngarbad nga p’eowchen ni fan e nge nang ko uw urngin e salpiy ni kar thog niged ko fapi salpiy nra maruwelgad ngay.

¹⁶En nsom’on e yib ngak me ga’ar, ‘Fa binem e salpiy ni mpi’ ngog e kug maruwel ngay ma nga ragag e salpiy ni gol ni kug thognag riy.’

¹⁷Me ga’ar, ‘Bfel’ e maruwel ni kam tay; i gur reb e tapigpig ni gab fel’! Bochan e kam yul’yul’ ko tin ni ba’achig ban’en, ma aram e nggu tiyem ni ragag e binaw e nge milfan ngom ngu’um gagiyegnag.’

¹⁸Ma bin migid e tapigpig e yib me ga’ar, ‘Fa binem e salpiy ni mpi’ ngog e kug maruwel ngay ma nga lal e salpiy ni gol ni kug thognag riy.’

¹⁹Me ga’ar ngak fa’anem, ‘I gur e lal e binaw e nge milfan ngom ngu’um gagiyegnag.’

²⁰Me yib bagayad fapi tapigpig me ga’ar, ‘Ba’aray fare salpiy rom ni gol; gu mithag ngalan bangi mad.

²¹Ug tamdag ngom, ni bochan e gur be’ ndamur runguy be’. Ya ga ma fek e tin ni gathi tirom ban’en, ma ga ma fek e tin ni gathi gur e mu yung.’

²²Me ga’ar ngak, ‘I gur reb e tapigpig ni gab tagan! Thin ni kamog e ir e bayi turguy e gechig rom! Ga manang ni gag be’ ndagur runguy be’, ma gu ma fek e tin ni gathi tirog ma gu ma fek e tin nda gu yung.

²³Ere mang nda mu tay e salpiy rog ngalan e bank? Nggu sul mu gu fek nike yib e win ngay.’

²⁴Ma aram me ga’ar ngak e pi’in yad ba sak’iy u rom, ‘Mfeked fare salpiy ni gol rok ngam pi’ed ngak fare tapigpig nragag e salpiy ni gol ni bay rok.’

²⁵Me lungurad ngak, ‘I ir e nga ragag e salpiy ni gol nike yag ngak!’

²⁶Me fulweg ngorad ni ga’ar, ‘Nggog ngomed ni en ni bay ban’en rok e kab pire’ e tin bay ni pi’ ngak; ma en ndariy ban’en rok e mus ko chu’uw i n’en ni bay rok e bay ni fek rok nge chuw.

²⁷Ere pi cha’ney ni to’ogor rog ndaburad ni nggu mang pilung rorad e ngam feked yad i yib iray ngam li’ed yad ngarm’ad u p’eowcheg!’”

²⁸I yog Jesus e re bugithin ney ngorad nge mu’ me yan nga Jerusalem ni be m’on rorad.

²⁹Ma fa’ani chugur nga Bethfage nge nga Bethany ko burey nu Olive, me l’oeg l’agruw i gachalpen ngar m’onow

³⁰nike ga’ar ngorow, “Mmarow ngalan e re binaw ni ba’aram ngam’on romew; ma nap’an ni gimew ra yan ngalan binaw ma bay mpir’egew ba pifak e dongki ni kan m’ag gafan ndawori af be’ nga daken bi’id. Mi gimew pithig gafan ngam fekew ngaray.

³¹Ma fa’anra fithmew be’ ni ga’ar, ‘Mangfan e binir ni gimew be rin’?’ me lungumew ngak, ‘Bay e tin nge rin’ Masta ngay.’”

³²Mranow miyow pir’eg urngin ban’en ni bod rogon ni fa’ani yog Jesus ngorow.

³³Ma nap’an ni yow be pithig gafan fare pifak e dongki, me ga’ar e pi’in fakrad fare dongki ngorow, “Mang ni gimew be pithig gafan?”

³⁴Miyow fulweg ni lungurow, “Bay e tin ni nge rin’ Masta ngay,”

³⁵mra fekew fare pifak e dongki i yib ngak Jesus. Ma aram miyow yin’ wuru’ e mad rorow nga daken fare gamanman miyow ayuweg Jesus nge af nga daken.

³⁶Ma nap’an ni be yan ni bay u daken fare gamanman, me filath e girdi’ wuru’ e mad rorad nga daken e kanawo’.

³⁷Ma fa’ani chuchugur nga Jerusalem, ko fa gin’en ni yan e kanawo’ riy ko burey nu Olive nga pe’ning, ma fapi girdi’ ni pire’ ni pire’ ni pi gachalpen e ra tababgad i pining e magaer ngak Got, ma yad be yog e sorok ngak ni ba ga’ lungurad ni bochan urngin fapi maang’ang ni kar guyed ni be lungurad,

³⁸“I Got e nge ayuweg e en ni pilung ni ir e ke yib ni owchen Somol! Gapas e bay u tharmiy, mi Got e ke sorok!”

³⁹Ma aram me non boch fapi Farise u fithik’ fapi girdi’ ni yo’or ngak Jesus ni lungurad, “Tamchib, mu non ngak pi gachalpem ngar th’abed gulungrad!”

⁴⁰Me fulweg Jesus ni ga’ar, “Nggog ngomed ni fa’an yad ra th’ab gulungrad, mra mang malang e tolul.”

⁴¹Me chuchugur i yib ko fare binaw, ma fa’ani guy me yornag,

⁴²ni be ga’ar, “Fa’an mang e aray rogon ma kamnang e daba’ e n’en ni ir e ra fek e gapas i yib ngom! Machane chiney e dabiyag ni ngam guy!

⁴³Ya bayi taw nga boch e rran me yib e to’ogor rom ngar cholngobiyed gur ko yoror ni but’ nge malang, mu ur bad i yib ngom u gubin yang.

⁴⁴Ma bay ra kireb niged gur nge girdi’ ni bay u lan e yoror rom; ma dariy ta’reb e malang ni yad ra pag u tagil’, ni bochan e de pow rom e ngiyal’ ni yib Got riy ni nge thapegem ngak!”

⁴⁵Me yan Jesus ngalan e Tempel me tabab i tuluf nga wean e pi’in yad be folchuway’,

⁴⁶ni be ga’ar ngorad, “Bay ni kan yoloy u lan e babyor nib thothup nike ga’ar Got, ‘Naun rog e bay nog nib naun ntafen e meybil.’ Machane kam thiliyeged kam ted nike mang bangi n’en nma mith e moro’ro’ riy!”

⁴⁷Ma aram mi i machib Jesus u lan e Tempel ni gubin e rran. Ma pi tolang ko prist, nge pi tamchib ko Motochiyel, nge pi’in yad ma yog e thin e ra fineyed ni ngar li’ed Jesus ngem’,

⁴⁸machane de pat ngorad rogon ni ngar rin’ed, ya urngin e girdi’ ni kar pired ni yad be motoyil ngak Jesus, ndaburad ni nge yan ta’ab bugithin nike yog ndar rung’aged.