Luke 23:40-48

⁴⁰Machane bagayow e puwan’ ngak fa’anem ni yow ni ga’ar, “Mog, damur tamdag ngak Got? Ya gadad gubin ni ta’reb rogon e gechig rodad ni kan pi’.

⁴¹Machane gechig rodow e bmat’aw ni kan pi’ ngodow, ya ba’ tapgin ni ngan pi’ ngodow ni bochan e tin nib kireb ni kad rin’ew; me ir e dariy ban’en nib kireb nike rin’.”

⁴²Me ga’ar ngak Jesus, “Ri ga ra leam nigeg ko ngiyal’ ni ga ra yib ni gur e kam mang pilung!”

⁴³Me ga’ar Jesus ngak, “Nggog ngom, ni daba’ e ga bay rog u tafen e fla’ab.”

⁴⁴Gonap’an e ragag nge l’agruw e kolok me m’ay ram’en e yal’ ngabang me neap’ u daken e re nam nem ni polo’ nge yan i mada’ ko dalip e kolok ni mithig yal’;

⁴⁵ma fa gi mad ni kan pag u lan e Tempel e mogchoth nge ruw yang.

⁴⁶Me non Jesus nri ba ga’ laman ni ga’ar, “Chitamag! Kug pag fag ngom!” I yog e re bugithin ney me aw e fan rok.

⁴⁷Ma en nib tolang ko salthaw e guy e ren’em ni aram rogon, me yog e sorok ngak Got ni ga’ar, “Riyul’ ni cha’ney e be’ ni bfel’!”

⁴⁸Ma girdi’ ni kar mu’ulunggad ngaram ni ngar guyed e n’en ni yibe rin’ e fa’anra guyed ni aram rogon, ma yad gubin nra sulod nga taferad ni yad be pirdi’iy pa’rad nga daken ngorongorrad nike kireban’rad.