Lukas 14:3-32

³Iwe, Jesus a aisini ekewe Sensen Allük me ekewe Farisi, “Ifa usun, allükün ach lamalam a mwütätä ach sipwe apöchöküla aramas lon ränin sapat ika sisap?”

⁴Nge ir resap apasa och. Iei mine Jesus a amwochatä ewe mwän, a apöchöküla o tinala.

⁵Mürin Jesus a üreniir, “Are eman leimi a wor eman nöün ät ika eman nöün kow, a fis ngeni pwe a turulong lon eu chönüttu lon eu ränin sapat, ifa usun, ousap müttir le efietä seni lon ewe chönüttu, inamwo ika a sereni ewe ränin sapat?”

⁶Nge ir resap tongeni pölüeni och usun kei kapas.

⁷Iwe, Jesus a küna pwe ekoch wasöla mi fiti ewe mongö ra chök fili ekewe lenien mot än ekewe aramas tekia, iei mine a üreniir meinisin ei pworausen awewe:

⁸“Lupwen eman a köruk om kopwe fiti eu kametipen apwüpwülü, kosap mottiu won ewe lenien mot än ekewe aramas tekia. Pun a tongeni fis, pwe eman aramas mi tekia senuk a pwal kö ngeni ewe kametip.

⁹Iwe, mürin ewe mi kökkörikemi me ruoman epwe feito o apasa ngonuk, ‘Kopwe tötiu seni ei lenien mot, pwe ätei epwe mot won.’ Mürin kopwe säw o mottiu won eu leni mi tekison.

¹⁰Ina mine, lupwen om kopwe kö, kopwe feila o mottiu won eu lenien mot mi tekison, pwe ewe mi köruk epwe feito o ürenuk, ‘Pwii, kopwe tötä won eu kei lenien mot mi tekia.’ Ren ei epwe wor iteüöchum fän mesen ekewe chon kökköto meinisin.

¹¹Pun eman aramas mi püsin atekiatä, epwe tekisonotiu, nge eman mi püsin atekisonatiu, epwe tekiatä.”

¹²Mürin Jesus a üreni ewe mwän mi köri, “Lupwen ka föri eu mongön leoloas are lekuniol, kosap köri chiechiom kewe ika pwiüm kewe ika aramasom kewe ika chon arum kewe mi pisekisek, pun mürin repwe pwal kökköruk o aliwini ngonuk mine ka fen föri ngeniir.

¹³Nge lupwen ka föri eu kametip, kopwe köri ekewe chon mwelele, ekewe chon ter, ekewe chon pechemä me ekewe chon chun.

¹⁴Iwe, ren ei kopwe feiöch, pun resap tongeni aliwini ngonuk mine ka föri ngeniir. Kot epwe liwini ngonuk lon ewe ränin manausefälin ekewe chon pwüng.”

¹⁵Iwe, lupwen eman lein ekewe mwän mi mot ngeni chepel a rong ekei kapas, a üreni Jesus, “Ra feiöch chokewe mi mot ngeni ewe kametip lon Mwün Kot!”

¹⁶Nge Jesus a üreni, “A wor eman mwän a föri eu kametip mi watte o köri chomong aramas pwe repwe eti.

¹⁷Lupwen a tori fansoun ewe kametip, a tinala nöün kewe chon angang pwe repwe asile ngeni ekewe chon kökköto, ‘Oupwe etto, a molotä meinisin.’

¹⁸Nge ir meinisin ra popuetä le künetipingen, eman mürin eman. Ewe aemanün a üreni ewe chon angang, ‘Üa fen möni eu fanü, nge iei üpwe feila o nenengeni. Kose mochen kopwe amusaeila.’

¹⁹Pwal eman a apasa, ‘Üa fen möni engol kow, nge iei üpwe feila o sotuniir. Kose mochen kopwe amusaeila.’

²⁰Nge pwal eman a apasa, ‘Üa kärän angei eman pwülüei, iei mine üsap tongeni feila.’

²¹“Iwe, ewe chon angang a liwinsefäliti an we masta o apworausa ngeni meinisin mine a fis. Mürin ewe masta a fokun lingeringer o üreni nöün we chon angang, ‘Kopwe müttir le feila ngeni ekewe alelap me ekewe alekis lon ewe telinimw o emwenato ekewe chon mwelele, ekewe chon ter, ekewe chon chun me ekewe chon pechemä.’

²²Mürin ewe chon angang a üreni, ‘Ai samol, mine ka allük ngeniei a pwönüetä. Nge a chüen wor leni.’

²³Iei mine ewe masta a üreni ewe chon angang, ‘Kopwe feila lükün ewe telinimw won ekewe al me ünükün ekewe tit o pese ngeni ekewe aramas pwe repwe feito, pwe imwei epwe ur.

²⁴Pun üa ürenikemi, pwe esap eman ätekewe mi kö repwe neni mongön ai kametip.’”

²⁵Lon eu rän, lupwen eu mwichen aramas mi chomong ra eti Jesus le fetal, a sap ngeniir o üreniir,

²⁶“Iö a feito rei esap tongeni nei chon kaiö, are esap echeniei lap seni an echeni saman me inan, pwülüan me nöün kana, pwiin me fefinan kana, pwal mwo nge püsin manauan.

²⁷Iö esap mwärei püsin an iräpenges o tapweto müri, esap tongeni nei chon kaiö.

²⁸“Are eman leimi a ekieki an epwe aüetä eu imw tekia, epwe akomwen mottiu o kütta fite ükükün liwinin pisekin, pwe epwe silei are a naf nöün moni an epwe tongeni awesala ewe angang.

²⁹Are esap föri iei usun, esap tongeni awesala ewe imw tekia mürin an föri longolongun. Iwe, aramas meinisin mi küna met a fis repwe popuetä le takiri ewe aramas

³⁰o apasa, ‘Ei mwän a popuetä le aüetä eu imw tekia, nge esap tongeni awesala.’

³¹“Are eman king me engol ngeröü nöün sounfiu ra feila pwe repwe maun ngeni pwal eman king me rüwe ngeröü nöün sounfiu, ewe king epwe akomwen mottiu o ekieki are epwe naf an pöchökül an epwe tongeni maun ngeni pwal ewe eman king.

³²Nge are a mefi pwe esap tongeni maun ngeni, epwe tinala nöün chon künö ren pwal ewe eman king o tüngor ngeni won met epwe wor ren kinamwe lefiler me mwen an epwe feito.