LUKA 14:3-32

³Ndipo Jezu adabvundza apfundzisi wa mtemo na afalizeu kuti: “Kodi mtemo umbabvumiza ayai umbabvumiza lini kulimbisa munthu pasabudu?”

⁴Tsono iwo alibe kutawira. Ndipo iye adatenga munthu ule acimulimbisa acimuwuza kuti ayende.

⁵Na tenepo Jezu adawabvundza kuti: “Mbani wa imwepo acikhala ana mwana ayai ng'ombe yace penu ikagwera mum'godi pasabudu, kodi iye angaleke kukanula?

⁶Tsono iwo alibe kutawira cinthu.

⁷Ndipo Jezu adawona wanthu omwe akhadacemeredwa pacikondweso acimbasankhula mipando yakulemekezeka, ndipo iye adawatsikira matere aciti:

⁸“Penu iwepo wacemedwa pacikondweso ca malowozi, leka kusankhula mpando wakulemekeza. Nakuti pan'dzakala pacemeredwa munthu wakulemekezeka kuposa iwepo.

⁹Ndipo nyakukucemera an'dzakuuza kuti: 'Coka pampando omweyu akhale nguyu.' Tsono iwepo na manyazi un'dzayenda ucikakhala pampando wakumalizira.

¹⁰Na tenepo ukacemeredwa, ndoko ukakhale pampando wakumalizira. Ndipo nyakukucemerayo acite kudzakuuza kuti: “Xamwali, ndoko ukakhale pampando wakulemezeka ule.” Ndipo iwepo un'dzalemekezeka pakati paalendo wentsenewo.

¹¹Thangwe munthu ali wentse omwe an'bzitumbiza, iye an'dzanyazidwa. Na ule omwe an'bzicepsa an'dzalemekezedwa.

¹²Ndipo adawuzambo pomwe ule omwe akhadamucerayo kuit: “Iwepo ukacemera munthu kuti adzadye masikati ayai kudzalalira, leka kucemera axamwali wako, abale wako, na adzindza wako ayai anyapafupi wako wakudala. Kuti iwo adzaleke kukucemerambo acikubwezera bzomwe adadyabzo.

¹³Tsono ukacita cikondweso, cemera anyakusauka, anyakulemala, anyakupunduka na azimola.

¹⁴Na tenepo un'dzasimbidwa thangwe iwo alibe cinthu cakukubaira naco. Maka Mulungu ndiye an'dzakubaira panthawe yomwe anyakulungama an'dzamuka paimpfa.

¹⁵Pamwepo munthu m'bodzi omwe akhali patsantsali la kudyerapo pomwe iye adabva bzimwebzo adalewa kuti: “Wakusimbidwa ni munthu omwe an'dzadya mkate mu umambo bwa Mulungu.”

¹⁶Tsono Jezu adatawira kuti: “Munthu m'bodzi adacita cikondweso cikulu kwene-kwene ndipo iye adacemera wanthu azinji.

¹⁷Pomwe nthawe yakudya idakwana adatuma nyabasa kuti akawuze anyakucemeredwa kuti: “Bwerani! Bzakudya bzatokota bzentse!”

¹⁸Tsono wentse m'bodzi na m'bodzi adayamba kunyang'ana mathangwe yakulamba nayo. Ndipo wakuyamba adamutawira kuti: “Ndagula thengo kuti nditeme munda wangu, ndin'funa kutoma ndakaliwona. Na tenepo ndikhululukirenimbo mtima.”

¹⁹Ndipo mwinango adalewa kuti: “Ndagula midzombe khumi. Na tenepo ndin'funa kutoma ndakaiyezera. Ndiri kukumbira kuti undikhululukirembo mtima.”

²⁰Ndipo mwingambo adati: “Ndalowola tsapanopa, na tenepo ndinibwera lini.”

²¹Ndipo mwenekaciro nyumbayo adakalipa adamuwuza kuti: “Ndoko kankulumize m'miseu, m'mankhunde mwa wanthu ukacemere anyakusauka, anyakulemala, azimola na anyakupunduka.”

²²Ndipo nyabasayo adalewa kuti: “Mbuya! Ine ndakacita bzentse bzomwe mwandiwuzabzire, tsono mbuto ikalipo basi.”

²³Pamwepo mbuya waceyo adamuwuza kuti: “Tsapano ndoko pomwe munjira na munkhunde ukawakakamize wanthu wentse abwere kuno kuti nyumbai idzale.

²⁴Na tenepo wanthu wentse omwe ndatoma kucemera wale an'dzalawa lini cinthu pacikondwesoci.

²⁵Na tenepo wanthu azinji akhamutewera. Ndipo iye adacewuka aciwauza kuti:

²⁶Penu munthu an'funa kunditewera ndipo iye akasaya kuwengana na babace, na mamace, na mkazace, na wana wace, na abale wace, wacimuna na wacikazi na iyembo kubodzi, ndipo iye angakhale lini mteweri wangu.

²⁷Na ulembo omwe an'saya kutakula mtanda wace acinditewera, iye angakhale lini mteweri wangu.

²⁸Kodi mbani m'bodzi wa imwepo akafuna kumanga cinyumba cace, ambasaya kutoma kulewenga kobiri zace kuti awone penu zin'kwana kukondzera cinyumba caceco.

²⁹Kuti bzidzasaye kucitika kuti akamala kuimisa majomicomi acisaya kumaliza, ndipo wanthu akadzawona an'dzamuseka,

³⁰acilewa kuti: “Munthuyu, wayamba kukondza cinyumbaci, tsono alibe kukwanisa kucimaliza.”

³¹Ayai ni mambonyi omwe ambayenda kukamenya nkhondo na mambo mwandzace, iye ambasaya kutoma kulewenga acikunda wace kuti awone kuti na bzulu khumi an'kakwanisa kukamenya nkhondo na mwandzace omwe ana bzulu makumi mawiri ya acikunda?

³²Tsono akakhala an'kwanisa lini ndipo iye an'tumiza muimikiri wace kuti akakumbire mtendere.