Lucangundru 14:3-32

³Ja Jesujeli kalabana wonti ja jirijiribani jauraia nguja ngujara jinkinietjani ja Pharisaiani jatana wonti: Jenia talku nganai, Sabbat ditjini tepi ngankala kara, pani kara?”

⁴Tana ngapurina wonti. Ja Nulu nina patana wonti ja tepi ngankana wonti ja nina jinpana wonti.

⁵Ja Nulu kalabana wonti ja tanangu jatana wonti: “Warle jurangundru, ngatamura nunkani kara nganti kara ngapa kutuni purinani, nulu nina wata nurujeli dukarala nganai Sabbat ditjini?”

⁶Ja tana ngandandarina wonti nina jendrangundruja kalabala,

⁷Nau jeribaka jaura jatana wonti kurlia kamanelini, ngangau Nulu najina wonti, worderu tanali piri ngopera kalkalkanani, ja tanangu jatana wonti:

⁸“Kana kulnujeli jidna karkanani noa patamalini bukaia, wata piri ngoperani ngamana ngariau, nulu kara kulno morla pirna jinkangu karkana warai;

⁹Ja nau wokaranani, nulu jidna ja nina matja karkana, nau jinkangu jatala nganai: Jerrariau; ja jidni wonila nganai mudani pirini ngamala.

¹⁰A-ai, kulnujeli jidna karkanani, wapau ja mudani pirini ngamana ngariau; ngangau nau wokaranani, nulu jidna matja karkana, nau jinkangu jatala nganai: Kamaneliai, jera tarau! ngadani jundru pirnaia ngamalkala nganai tanangundru tana jinkangu jela kurlini ngamai.

¹¹Ngangau warle pirna ngankateriai, nau waka pantjila nganai; ja warle waka ngankateriai, nau pirna pantjila nganai.”

¹²Nau nunkangu, nulu nina matja karkana, jatana wonti: “Jundru manamuka kara, buka pirna kara ngankinganani, wata kana kamaneli jinkani karkau, bakana wata neji worana jinkani, bakana wata kamaneli jinkani, bakana wata jenimalinietjaia kana poto pirna; ngangau tanali jidnana nakaldra karkaiati ja jinkangu kalala pantjiati.

¹³A-ai, jundru buka pirna ngankinganani, jeruja karkau kana wangiwangi, dupudupu, tjunduru, butju.

¹⁴Ja murlali pirna jidni nganala nganai, ngangau tanali wata ngamalkai jinkangu kalala jinkila; ngangau jundru kalala manila nganai kana talku ja jiritjini ditjini.”

¹⁵Kurlaia kamaneli kulnujeli jenia ngaranani, nau nunkangu jatana wonti: “Murlali pirna, warlenulu buka tajila nganai Godaia mililani.”

¹⁶Nau nunkangu jatana wonti: “Kana kulnujeli buka pirna ngankingana wonti ja marapuni jatingana wonti.

¹⁷Ja nulu mili nunkani jinpana wonti bukaia ditjini, tanangu matja karkana, jatala: “Kaparanau, ngangau pratjana matja ngankingana warai.”

¹⁸Ja tanali pratjanali wonina wonti kulnukulnuni delkila. Ngoperala nunkangu jatana wonti: “Ngato mita kulno burungankana warai, ja ngani morlalu wapananto nina najinajibala; ngani jinkangu ngatjiai, manju jatamai ngakangundru.”

¹⁹Ja kulno jatana wonti: “Ngato nganti marapratjana burungankana warai, ja ngani wapai tanana wontjala; ngani jinkangu ngatjiai, manju jatamai ngakangundru.”

²⁰Ja kulno jatana wonti: “Ngato noa patana warai jendralia ngani ngandandariai wokarala.”

²¹Ja mili tikana wonti ja jenia kaparani nunkanani kaukaubana wonti. Jendranguta pungaia kapara tiri pantjina wonti ja milini nunkanani jatana wonti: “Nurujeli wapamai nguraia palto pirnani ja wakani, ja wangiwangi, ja dupudupu, ja tjunduru, ja butju wirilkamai.”

²²Ja mili jatana wonti: “Kaparajai, jenia matja pantjina, worderu jundru jirijiribana warai, ja morla piri parai.”

²³Ja Kapara milini jatana wonti: “Wapamai paltuni ja wondirani, ja tanana mararibamai wirinanto; ngangau pu nga ngakani manamiri pantjinanto.”

²⁴Ngangau ngani jurangu jatai: Wata kana kulnujeli tanangundru, ngani matja jatingana, buka ngakani wontjala nganai.”

²⁵Kana wolara marapu nunkangunto wapana wonti ja Nau karitjina wonti ja tanangu jatana wonti:

²⁶“Kulno ngakangu wokaranani ja wata kalakalarinani ngaperani nunkanani ja ngandrini ja noani ja kupani ja neji marani ja kakuni, ja bakana mungarani nunkanani; nau ngandandariai mili ngakani nganala.

²⁷Ja warlenulu wata kunarku nunkani mandrai ja ngakangu karipateriai, nau ngandandariai mili ngakani nganala.

²⁸Ngangau warlenulu jurangundru ngantjai pungu wutju wotila, nauja wata ngopera ngamana ngarinani wintamala, nulia pratjana ngamalkai nina mudala?

²⁹Ngangau, nulia marda kapara matja kurana kara, ja ngandandarinani nina mudala, pratjanali nina najmani, woniati ninaia ngirkibala,

³⁰Ja jatala: “Nulupini kanali wonina warai wotila, ja ngandandarina warai mudala.”

³¹Worana mitaia kapara nganai kara, nau palkanani mitaia kapara kulnuni tirimalila, nau wata ngopera ngamana ngarinani ja munta warawarabanani, nau ngurunguru nganai kara 10,000 kananto nunkangu mandurila, nau nunkangu manduriai 20,000 kananto?

³²Pani kara, nulu mili nunkani jinpala nganai, nau worita ngananani, nunkangundru murla ngatjila.