ሉቃሳ 14:3-32

³ዬሱሲ ሂጊያ ታማሪሲያዋንታኔ ፓሪሳዋቱዋ፥ «ሳምባታን ፓꬃናው ዳንዳዬቲ ዳንዳዬቴኔ?» ጊዴ ኦቼዳ።

⁴ኡንቱንቱካ ጮዑ ጌዲኖ። ኢ ሄ ቢታኒያ ቦላ ቦቺ ፓꬂዴ ኣ ሞዪዜዳ።

⁵ዬሱሲ ኡንቱንታ፥ «ሂንቴንቱፔ ሃሪ ዎይ ቦራይ ኦላን ኩንዲንቶ፥ ሳምባታ ጊዴ ኤሌሊ ኬሴናዌ ኦኔ?» ጌዳ።

⁶ኡንቱንቱካ ሃ ዬዉዋሲ ኢቲ ዛሩዋኔ ኢማናው ዳንዳዪቤይኪኖ።

⁷ዬሱሲ ሾቤቶዋንቱ ቦንቾሳ ዶሪያ ዎዴ ፄሊዴ፥

⁸«ኦኒኔ ቡላቻ ፄሶፔ፥ ቦንቼቴዳሳን ኡቶፓ፤ ኦኒ ኤሪ ኔፔ ኣꬂዴ ቦንቼቶዌ ፄሴቴዳዋ ጊዳናዋ።

⁹ኔናኔ ኣኔ ፄሳዌ ዪዴ፥ ‹ሃዎ፥ ኡቱዋ ኣው ዬዳ› ያጊና፤ ሄዎዲያን ዬላታዴ ፃዴና ዴዒያሳን ኡቱዋ ዶማሳ፤

¹⁰ዬዉዋን ቃሲ ኔኒ ፄሴቶ ዎዴ ኔና ፄሶዌ ዪዴ፥ ‹ታ ላጌው፥ ኪሊ ꬎቃሳን ኡታ› ጋና ማላ፥ ባዴ ኡባፔ ሆካሳን ኡታ፤ ሄ ዎዴ ኔናና ኢቲፔ ኡቴዳዋንቱ ኡባቱዋ ሲንꬃን ኔው ቦንቹ ኢሜታናዋ፤

¹¹ባሬ ሁጲያ ꬎቁ ኡዲያ ኡባይ ቶሼታናዋ፤ ባሬ ሁጲያ ቶቺያዋንቱ ꬎቁ ጊኖ» ያጊ ሌሚሱዋ ኡንቱንቶ ኦዴዳ።

¹²ዬሱሲ ባሬና ፄሴዳዋ ዛሪዴ፥ «ኔኒ ላፃ ዎይ ካዉዋ ጊጊሴዳ ዎዴ፥ ኔ ላጌꬃቱዋ ዎይ ኔ ኢሻቱዋ ዎይ ዱሬ ኔ ሾራቱዋ ፄሶፓ፤ ኣያው ጎፔ፥ ኡንቱንቱ ኔና ባሬንቱ ታራን ፄሲዴ ኩሺያ ጪጋና ዳንዳዪኖ።

¹³ሺን ኣታሊያባ ጊጊሴዳ ዎዴ፥ ሂዬሳቱዋ፥ ጉንዳቱዋ፥ ዶማቱዋኔ ቆቃቱዋ ፄሳ።

¹⁴ኡንቱንቱ ኔው ኩሺያ ዛራናው ዳንዳዬናዋንታ ጊዲያ ዲራው፥ ኔኒ ኣንጄታናሳ። ፂላቱ ሃይቁዋፔ ዴንዲያ ዎዴ ፆሳይ ኔው ኩሺያ ዛራናዋ» ያጌዳ።

¹⁵ዬሱሲ ሃሳያ ዉርሲያ ዎዴ፥ ቁማ ማናው ኡቶ ኣሳፔ ኢቱ ሃዋ ሲሲዴ፥ «ፆሳ ካዉቴꬃ ጋዪታን ኡቲያዌ ኣንጄቴዳዋ» ጌዳ።

¹⁶ዬሱሲካ ሃዋዳን ጌዳ፤ «ኢቲ ቢታኒ ዳሮ ሎዖ ካዉዋ ጊጊሲዴ፥ ጮራ ኣሳቱዋ ፄሴዳ።

¹⁷ካዉዋ ዎዲ ጋኪና፥ ካሴ ፄሴቶዋንታ፥ ‹ሃዒ ካዉ ጊጌዳ፥ ሃዪቴ› ጊዴ ፄሳና ማላ ባሬ ጎሌን ኪቴቲያ ቆማ ኡንቱንቱኮ ኪቴዳ።

¹⁸ሺን ኡባቱካ ኢቲፔ፥ ቤናዳን ኣጋና ማላ ዎሴዲኖ፤ ኮይሮ ቢታኒ ቆማው ኦዲዴ፥ ‹ታኒ ቢታ ሻሜዳ ዲራው ባዴ ቤዓናው ኮሼ፤ ሄዋ ዲራው ሃያ ጎዶ ታው ሃንቄቶፓሪኪ› ጌዳ።

¹⁹«ላዔꬂያዌ ቃሲ፥ ‹ታኒ ኢቼሹ ዋꬃ ቦራቱዋ ሻሜዳዋንታ ዋፃ ቤዓናው ቢያ ዲራው፥ ሃያ ጎዶ ታው ሃንቄቶፓሪኪ› ጌዳ።

²⁰«ሃራይ ቃሲ፥ ‹ታኒ ማቻቶ ኣኬዳ ዲራው፥ ያናው ዳንዳያቤይኬ› ጌዳ።

²¹«ቆማይካ ዪዴ ባሬ ጎዳው፥ ሃኖዋ ኡባ ኦዴዳ። ሄ ዎዴ ጎዳይ ዳሮ ሃንቄቲዴ፥ ባሬ ጎሊያን ኪቴቲያ ቆማ፥ ‹ሂኒ ካታማ ኦጊያኔ ሎሶ ኦጊያ ኤሌላዴ ኬሳ፤ ማንቃቱዋኔ ጉንዳቱዋ፥ ዶማቱዋኔ ቆቃቱዋ ሃ ኣካዴ ያ› ጌዳ።

²²«ኣ ቆማይካ፥ ‹ጎዳው፥ ኔኒ ታና ኣዛዞዋዳን ኦꬃዲ፤ ሺን ሃዒካ ሃራ ኣሳ ኣኪያሳይ ዴዔ› ጌዳ።

²³ጎዳይካ ባሬ ቆማ፥ ‹ታ ጎሊ ኩማናዳን ሂኒ ኦጊያፔ ካሬ ባጋኔ ዲርሳ ጋፃ ኡባ ኬሳዴ፥ ኣሳ ታ ጎሌ ኣካዴ ያ።

²⁴ኣያው ጎፔ፥ ኮይሮ ታ ጎሌ ሾቤቴዳዋንቱፔ ኢቲ ኣሳይኔ ታ ቁማ ሜና› ጌዳ» ያጌዳ።

²⁵ጮራ ኣሳይ ዬሱሳና ኢቲፔ ቢዴዒያ ዎዴ፥ ኢካ ኣሳኮ ጉዬ ሲሚዴ፥

²⁶«ኦኒኔ ታኮ ዪያዌ ዴዖፔ ባሬ ኣባኔ ኣቶ፥ ባሬ ማቻቶኔ ባሬ ናና፥ ባሬ ኢሻቱዋኔ ሚቻቱዋ፥ ባሬ ዴዑዋ ኣሼናን ታፔ ኣꬂ ዶሶፔ፥ ታና ካሊያዋ ጌቴታናው ዳንዳዬና።

²⁷ኦኒኔ ባሬ ማስቃሊያ ቶኪዴ፥ ታ ጌዱዋ ካሌናን ꬋዮፔ፥ ታና ካሊያዋ ጊዳናው ዳንዳዬና።

²⁸«ሂንቴንቱፔ ኢቱ ሹቻ ጎሊያ ኬፃናው ኮዮፔ፥ ኪታ ዉርሳናው ጊዲያ ሻሉዋ ካሴቲዴ ኡቲ ሄቴናዌ ኦኔ?

²⁹ሄዌ ꬋዮፔ፥ ጎሊያ ዶሚዴ፥ ኪታ ዉርሳናው ዎልቃይ ኢፆፔ፥

³⁰ቤዔዳዋንቱ ኡባይ፥ ‹ሃ ቢታኒ ኬፃናው ዶሜዳ፤ ሺን ኪታ ዉርሳናው ኢፄቴዳ› ጊዴ ቂሊጪኖ።

³¹«ዎይ ታሙ ሻዓ ኦላንቻቱዋ ኦይቄዳ ኢቲ ካቲ፥ ሃራ ላታሙ ሻዓ ኦላንቻቱዋ ኦይቄዳዋንቱና ኦሌታናው ዳንዳዮፔኔ ኮይሮና፥ ታኒ ፆናኔ ፆኒኪታሻ ጊዴ ኡቲ ቆፔኔ?

³²ባሬው ዳንዳዬቴናን ꬋዮፔ፥ ኦላው ዪያ ዮኮ ካቲ ሃኩዋን ዴዒሺን ኪቲዴ ሲጌታናው ዎሴ።