Lukaj 9:3-30

³O a kotin majani on irail: Komail der wala meakot pon al o: Jota jokon, de ed, de prot, de moni, amen pil jo pan wa jakit riau.

⁴O waja kij me komail pan pedelon on nan im eu, komail pan mimieta waja o, komail lao kowei jan ia.

⁵O meamen kan kajamo komail, komail japalewei jan kanim o, o jipede jan pwel ni nä omail, pwen kadede on irail.

⁶Irail ari kokola, kakan jili nan kijin kanim akan, padaki ronamau o kakelada me jomau kan waja karoj.

⁷A nanmarki Erodej lao mani duen meakan, me wiauiki i, ap pinidar, pweki akai katitiki, me dene Ioanej iajadar jan ren me melar akan.

⁸A akai indada, me dene Eliaj pwarado, o akai me inda, me dene jaukop en kaua men iajadar,

⁹A Erodej majani: Ioanej, i me i lepuke jan mon a, a ij men et, me i kin roneron due? A ap men udial i.

¹⁰A wanporon akan lao pure doer, ap kaireki i karoj, me re wiadar. I ari kotin uk irail ada, kotilan waja rir, nan kanim eu, me ad a Petjaida.

¹¹Toun jap o lao ajaer, rap idauenla i, i ari kotin kajamo irail, o kotin padaki on irail duen wein Kot, o kotin kakelada me mau on.

¹²A lao pan waja ponier, ekriamen potodo potoan on i: Re kotin kadar pajan pokon en, pwen kola nan kijin kanim akan o nan jap, en rapaki wajan pweidi o kan ar kijin mana, pwe kitail kotikot nan jap tan wet,

¹³A a kotin majani on irail: Komail pan ki on irail kan ar mana! Re potoan on: Lopon prot eta limau o mam eta riamen mi re at. De je pan kola netie don pokon kalaimun wet mana?

¹⁴Pwe irail me ol impan limekid. A a kotin majani on japwilim a tounpadak kan: Komail pwini ir pajan wad limek o limek!

¹⁵Irail ari wiada o kamod irail edi.

¹⁶A kotin limada lopon prot limau o mam riamen, majanda nanlan, laolaoki, pilitiki pena, kotiki on japwilim a tounpadak kan, pwe ren nene on pokon o.

¹⁷Irail jak, o karoj medier, ap rikada dodo eijokriau luan kamadip o.

¹⁸Kadekadeo ni a kotin laolao kelep, japwilim a tounpadak kan ian i. A kotin kainoma re ’rail majani: Ij me aramaj kin inda me nai?

¹⁹Irail japen potoan on: Ioanej jaunpaptaij, a akai me inda Eliaj, o pil akai kin inda, me dene jaukop en kaua men iajadar.

²⁰A kotin majani on irail: A da me komail kin inda ij nai? Petruj ap japen potoan on: Ir me Krijtuj japwilim en Kot.

²¹A i me kotin padik inapwiedi irail, ren der indan meamen mepukat,

²²Majani: Nain aramaj pan kalokolok laud, o lokidokila ren jaumaj, o jamero lapalap, o jaunkawewe kan, o a pan kamela, o ni ran kajilu a pan maureda,

²³Ap kotin majani on irail karoj: Meamen men idauen ia i en tonmeteki pein i o ale a lopu ni ran karoj, o idedauen ia do.

²⁴Pwe meamen kanakanai on maur a, pan pupe jan. A meamen kajela maur a pweki nai, pan diarada.

²⁵Pwe da me pan mau on aramaj amen, me aneki pena jappa karoj, ap kajela pein i o kajapokela pein i?

²⁶Pwe me kin namenok kin ia o ai padak kan, i me Nain aramaj pil pan namenokki, a lao kodo ni a linan, o linan en Jam a, o na tounlan jaraui kan.

²⁷A melel I indai on komail, akai irail, me mi met, jota pan mela, irail lao udial wein Kot.

²⁸A kadekadeo murin pon walu pon murin majan pukat i ap ukada Petruj, o Ioanej, o Iakopuj kotidala pon nana o pwen laolao.

²⁹A ni a kotin laolao mom en jilan i ap wukila o japwilim a likau puetepuetela o linalin.

³⁰A kilan, ol riamen ian i majan pena! Ira me Mojej o Eliaj.