Lukaj 11:37-48

³⁷A ni a kotin kaparok, Parijär amen luke i, en konot re a. I ari kotilon kotidi nin tepel.

³⁸A Parijär lao udial, ap puriamuiki, me a jota kotin omiom mon konot.

³⁹A Kaun o kotin majani on i: Nan komail Parijär akan kin widen likin dal o plet, a lol omail me dir en me re kuliada o me jued.

⁴⁰Nan pweipwei komail, kaidin i me wiadar pali liki, pil wiadar pali lole?

⁴¹A kijakij weita duen komail kak on! A kilan, karoj pan makelekel on komail.

⁴²Juedi on komail Parijär akan, pwe komail, kin maironki eijokkij eu en minje, o raute o jon en kijin tan tuka kai, ap jota injenoki kadeik o limpok en Kot! Wiada mepukat ap pil kapwaiada me tei kan.

⁴³Juedi on komail Parijär akan, pwe komail men mondi leppantam nan jinakoke kan o mauki, ren ranamau on komail nan waja en netinet akan.

⁴⁴Juedi on komail, pwe komail rajon joujou kan, me jo janjal, o aramaj alialu poa, ap jaja ir!

⁴⁵Jaunkawewe men ap japen potoan on i: Jaunpadak, komui pil kin juede kin kit majan pukat.

⁴⁶A i kotin majani: Pil juedi on komail jaunkawewe! Pwe komail kin katoutou kila kapwa en wijik toutou aramaj akan, ap jota jairki jondin pa omail.

⁴⁷Juedi on komail! Pwe komail kin apapwali joujou en jaukop akan, a jam omail akan kame ir ala.

⁴⁸Komail ari kin kadede o peren kida wiawia en jam omail akan. Pwe re kame ir ala, a komail apapwali ar joujou kan.