Luka 22:7-68

⁷Bai, Lisu'ba lya Makati Gangalu'la ngaliika. Na alyo nga lisu'ba lyo sinjilwa Mwana wa Ngondolo ywa Pasika.

⁸Apo Yesu ngaatuma Petili na Yoani, ngaabakia, “Muyende mukatubi'ki wiso si'li'ku'si'li'ku' li'nga tulye Pasika.”

⁹Nabembe ngabannaluya, “Upala tukakubi'ki wiso kwaku'?”

¹⁰Ngaabakia, “Pi'kani! Pamwalu'a yenda kukilambo, mwakwembana na nnalu'me ywapu'twi kibi'ga sa masi'. Mwanki'ngame mpaka nnyumba ya nyumba yaayingya.

¹¹Mwammakie mwene nsengo, ‘Mwalimu endakulaluya, kubi kwaku' kuswi kwoli'lya Pasika nenga na banamasi' bangu'?’

¹²Naywembe aannangya sumba kiku'lu' kugolopwa sakibi'kilwe wiso, na mwenga mukabi'ke wiso ilyo.”

¹³Bai, ngabayenda, baakikoli kila kili'be kibi kati mwaabakie Yesu, ngababi'ka wiso Pasika.

¹⁴Saa payikite, Yesu ngatama lya na atumilwe bake.

¹⁵Ngaabakia, “Ndeminyikia muno lya Pasika yi'no pamope na mwe, ku'no kaiegelya saa yo teselwa kwangu'.

¹⁶Kwa mwanjaa nimmakianga panga nailyali kai' mpaka palu' panailya yi'lu' yaitimile pawaika Ukulungwa wa Nnu'ngu'.”

¹⁷Bu'kapo ngakitola kikombe sa lipwai no sukulu, ngabaya, “Mupokyange, munywe pamope.

¹⁸Kwa mwanjaa bu'ka nambi'yambi' nimmakianga, nainywali kai' lipwai ya njabibu mpaka pawalu'a isa Ukulungwa wa Nnu'ngu'.”

¹⁹Bu'kapo ngaatola likati, ngasukulu, ngalimetwana na kwapeya kabaya, “Yi'no nga yi'ga yangu' yaipiyilwa kwa mwanjaa ya mwe. Mwapange nyo kwa kuniku'mbu'kya.”

²⁰Ngapanga nyinyonyo na kikombe sa divai bu'ka pa kilyo, kabaya, “Kikombe si'no nga lilagano lyayambi' lya myai yangu' yaiyitanika kwa mwanjaa mwenga.

²¹Lakini, mulolange! Yu'lu' ywanisongya ai pamope na nenga pano pamesa.

²²Kakape Mwana wa Mundu ayenda bulagilwa kati mwabini Nnu'ngu', lakini akibona yu'lu' ywansongya.”

²³Apo ngabatumbwa laluyana bene na bene nyai kati yabe ywalu'a panga likowe lyo.

²⁴Kwapitike ntau kwa abo banamasi' panga nyai ywaganiyilwa baa nku'lu' kuliko bi'ngi'.

²⁵Yesu ngaabakia, “Akulungwa ba bandu bangali Ayahudi batawala bandu babe kwa makakala, na bembe bakemelwa ayi'mi'li'ki'yi ba bandu.

²⁶Lakini kaneibe nyo kwinu, ila yu'lu' ywabi nku'lu' kwinu apalikwa abe nsene wa boti, na ywabi kolongosi apalikwa abe kati ntumisi.

²⁷Tubaye nku'lu' ngaywaku', yu'lu' ywatama pamesa no lya, au yu'lu' ywatumikia? Ngamwembe panga yu'lu' ywatama pamesa no lya! Lakini ata nyo nenga nibi pano pakati yinu kati nantumisi.

²⁸Mwenga ngamwabile na nenga nsimu woti wa mapayilwo gangu',

²⁹kati Tati' bangu' mwabangamukiye ukulungwa, na nenga ninkamukiyanga mwenga ukulungwa.

³⁰Mwalya no nywa pamesa yangu' mu ukulungwa wangu' no tama muiti'gu' ya kikulungwa kuisenwa ngolo ku'mi na ibi'li' ya Isilaili.

³¹“Simoni, Simoni! Pi'kania wi'ti'! Ibilisi ayi'ki'tilwe na Nnu'ngu' kumpeta mwenga kati mundu mwapeeta ngano.

³²Lakini nenga nitekulu'bya kwa Nnu'ngu' li'nga imani yako yakenepu'ngwa. Nawenga pawalu'a niki'li'bu'kya, wasenge akina alongobo.”

³³Petili ngannyangwa, “Bwana, niyi'ki'tile yenda pamope na wenga muutabilwe, na ata waa.”

³⁴Yesu ngannyangwa, “Nikubakia wenga wa Petili, kapala bi'ka njogolo li'no kilo walu'a ngana mala itatu panga unitangiteli.”

³⁵Bu'kapo, Yesu ngaalaluya banamasi' bake, “Nsimu panantumike wangalipu'twa mpuko wa mbanje wala utingo wala ilatu, mwapu'ngu'kilwe na kili'be sosoti?” Ngabayangwa, “Lili.”

³⁶Naywembe ngaabakia, “Nambi'yambi', ywabile na mpuko wa mbanje aupu'twe na ywabile na utingo nyinyonyo. Na ywabile ntu'pu' lipanga, api'mi'ye likoti lyake li'nga akapi'me limo.

³⁷Nimmakianga gano mayi'gi'yo ga Maandiko Mapeleteu, ‘Aabi'kilwe lipi'nga limo na babaalabiya.’ Ipalikwa gatimi na gagapalikwa na nenga gendaikya.”

³⁸Nabembe ngababaya, “Bwana, lola, pano pai na mapanga gabi'li'.” Naywembe ngabaya, “Bai gali'ngani!”

³⁹Yesu pabu'i po kati mwayobelile ngayenda kukitu'mbi' sa Minjaituni, na banamasi' bake ngabanki'ngama.

⁴⁰Paaikite kwo ngaabakia, “Mulu'bange Nnu'ngu' mwakaneyingya mumapayilwo.”

⁴¹Bu'kapo ngaaleka no yenda kuutalu pasene ngakilikita no lu'ba Nnu'ngu',

⁴²“Tati', mana mupendile, munibu'ki'ye kikombe si' na ata nyo, ibe kati mwamupendi mwenga, kwenda kati mwanipendi nengali.”

⁴³Bu'kapo, malaika bu'ka kunani ngampitya li'nga kunyongea makakala.

⁴⁴Paabile mulwu'ngu' luku'lu', aannu'bite Nnu'ngu' kwa makakala muno, ngalimpita lyusu kati matondwa ga myai, ngalibutuka mpaka pai'.

⁴⁵Paayomwi lu'ba Nnu'ngu', aki'li'bu'ki banamasi' bake, na akoli bagoonjike, kwa mwanjaa baatinyopa.

⁴⁶Ngaabakia, “Mboni mwendagonja? Muyumukange musali, mwakane yingya mumapayilwo.”

⁴⁷Kayendelya longela, ngaliisa lipi'nga lya bandu lilongoyilwe na Yuda, yu'lu' yumo ywa banamasi' ku'mi na abi'li'. Yuda ngayenda kumpanga abali Yesu kwa kunnonia.

⁴⁸Yesu ngammakia, “Yuda! Unsongya Mwana wa Mundu kwa kunnonia?”

⁴⁹Banamasi' bake pabagabweni go ngababaya, “Bwana, tukoleli mapanga gitu?”

⁵⁰Yumo kati yabe nganku'mbwa lipanga ntumisi ywa Mpi'ndo Mku'lu' wa dini, ngankata likutu lyake lya kummalyo.

⁵¹Apo, Yesu ngabaya, “Kotokaa! Ili'ngani.” Ngalikunywa likutu lya mundu yu'lu', na kuntepwa.

⁵²Bu'kapo Yesu ngaabakia api'ndo ba dini, api'ndo ba ali'ndi'li ba Nyumba ya Nnu'ngu' na api'ndo babaisi kummoywa, “Mboni mwisi na mapanga na mandolonga kuniboywa kati nenga nampokonyoli?

⁵³Panabile na mwenga kila lisu'ba mulua lwa Nyumba ya Nnu'ngu' mwaniboywili!. Lakini, gu'no nga nsimu winu lelo, nsimu wa utawala wa lubi'ndu'.”

⁵⁴Bai, ngabammoywa na kumpeleka kasake mpi'ndo nku'lu' wa dini. Petili anki'ngime nsu'gu' kwa kuutalu.

⁵⁵Mwoto wabi ukunganilwe pakatikati ya luwa. Na bembe batami pamope, na Petili abi pamope nabo.

⁵⁶Ntumisi yumo nnwawa paamweni Petili atami kayota mwoto ngammu'nju'lya minyo, kabaya, “Mundu yu' aai pamope na Yesu.”

⁵⁷Lakini Petili ngakana no baya, “Wewenga! Nenintangiteli yu'.”

⁵⁸Baliya pasene, mundu ywi'ngi' ngammona Petili, ngabaya, “Na wenga wanaywembe kati yabe.” Lakini Petili ngayangwa, “Wenga, nenintangiteli!”

⁵⁹Walipite lisaa limo, mundu ywi'ngi' ngakong'ondelya panga “Ayu' naywembe mwenekaya wa ku Galilaya.”

⁶⁰Petili ngabaya, “Wenga we, ne nikitangiteli ata saukilongela!” Na popopo paabile kalongela, njogolo ngabi'ka.

⁶¹Bwana Yesu ngagalambuka na kummu'nju'lya minyo Petili, na ywembe Petili ngaku'mbu'kya galu' gaabakiyilwe na Bwana Yesu, “Li'no kapala bi'ka njogolo walu'a nikana mala itatu.”

⁶²Apo ngapitya panja, no li'la munomuno.

⁶³Balu' bandu babanni'ndi'lage Yesu, batekunku'mbwa na kunsalanga.

⁶⁴Bantabike kitambala kuminyo, kabannaluya, “Akuku'mbwi nyai? Ebu londwa, tulole!”

⁶⁵Ngabampikiya makowe gambone ga kumpwi'wa.

⁶⁶Pakusile, kitamo sa api'ndo ba bandu satipangilwa na amo bakwembine api'ndo ba dini na balimu ba Salya. Yesu ngaletelwa nnu'ngi' ya Balasa Liku'lu' lya Ayahudi.

⁶⁷Nabembe ngabammakia, “Tubakia wenga nga wa Kilisitu ywabayilwe?” Yesu ngaabakia, “Ata mana nimmakiangite mwaniu'bi'lyali,

⁶⁸na ata mana ninnaluyangite liswali, mwaniyangwali.