Luuka 22:7-68

⁷Iidi mo buuru ƴuufinaaka, nde ɓe mboownoo hirsude jawɗi Paska ndee, yottii.

⁸Nden Iisaa neli Piyeer e Yuhanna, wii ɗum'en: —Njehee lanndinanee en hiraande iidi Paska faa ɲaamen.

⁹Ɓe lamndii mo: —Hoto njiɗ-ɗaa min lanndinoyoo nde?

¹⁰O wii ɓe: —Ƴeewee, so on naatii ngeenndi ndii, on kawran ton e gorko, ana roondii mbulku ndiyam. Njokkee e makko faa e galle ɗo mo naatata ɗoo,

¹¹mbiyon jom galle oo: «Moobbo wii suudu hondu ɲaamdata e taalibaaɓe mum ɓee hiraande iidi Paska?»

¹²O hollan on sooro manngo paraango, ton lanndinanto-ɗon en ɗum.

¹³Ɓe njehi, ɓe tawri hono no o wii ɓe nii, ɓe lanndinii hiraande Paska ndee.

¹⁴Nde wakkati oo yottinoo ndee, o jooɗii kanko e sappo e ɗiɗon ɓee.

¹⁵O wii ɓe: —Miɗo yiɗi ɲaamdude e mon sanne hiraande Paska ndee, gila mi torraaka.

¹⁶Sabi miɗo wiya on: mi hiirtataako nde kasen faa ɲannde nde nde tabiti ley Laamu Laamɗo.

¹⁷O ɓami horde, o yetti Laamɗo, o wii: —Nanngee ɗum, peccee ɗum e hakkunde mon

¹⁸sabi miɗo wiya on: mi yarataa peguujam kasen faa nde Laamu Laamɗo waroyi.

¹⁹Kasen, o ɓami buuru, o yetti Laamɗo, o helti, o hokki ɓe, o wii: —Ɗum yo terɗe am cakkiraaɗe kammari mon, ngaɗee ɗum faa miccito-ɗon kam.

²⁰Hono non duu, nde ɓe tilii hiraande ndee, o ɓami horde peguujam, o hokki ɓe, o wii: —Ndee ɗoo horde woni aadi keyri. Aadi ndii tabintiniraama ƴiiƴam am njupportooɗam saabe mon.

²¹Kaa jammbotooɗo kam oo ana ɲaamda e am e la'al gootal.

²²Waajibi Ɓii Neɗɗo ɗalira aduna no fodiranaa nii. Kaa bone woodanii jammbotooɗo mo oo!

²³Hedde eɓe lamndondira hakkunde maɓɓe homo e maɓɓe gollata oo golle.

²⁴Nii taalibaaɓe ɓee ndarii ana njeddondira hakkunde mum'en homo ɓuri teddude.

²⁵Iisaa wii ɓe: —Kaanankooɓe ana ndonna laamu mum'en dow leɲi mum'en. Jom'en doole e maɓɓe ɓee duu ana njiɗi noddireede sooninkooɓe.

²⁶Kaa onon, wanaa non ɗum laatortoo hakkunde mon. Ko kaan-ɗon laataade dee, ɓurɗo teddude e mon yo laato hono cukalel, ardiiɗo laatoo hono golloowo.

²⁷Homo ɓuri teddude, jooɗiiɗo faa ɲaama naa ɓattinoowo ɲaamdu? Wanaa ɲaamoowo oo naa? Kaa miin, miɗo wa'i hakkunde mon no ɓattinoowo ɲaamdu nii.

²⁸Onon ngoni wonduɓe e am e ley ko koro am ittetee koo fuu.

²⁹Kammari ɗum, miin duu, mi hokkii on laamu no Baabiraaɗo am hokkiri kam laamu nii,

³⁰faa ɲaamden, njarden e la'al am ley laamu am, njooɗo-ɗon e dow jooɗorɗe kaanankooɓe, caron cuuɗi baaba Israa'iila sappo e ɗiɗi ɗii.

³¹Simon, Simon, Ibiliisa ɲaagike faa seɗa on no alkama seɗirtee nii.

³²Kaa mi ɲaaganike ma pati goonɗinal maa mursee. Aan, so a wartii e am, ngaɗaa e sakiraaɓe maa ɓee semmbe.

³³Piyeer wii mo: —Kalfaaɗo, mi lanndinike naɓdeede e maa kasu e wardeede e maa!

³⁴Kaa Iisaa wii: —Piyeer, miɗo haalane: fade ndontoori jogginde hannde a wiyan a anndaa kam cili tati.

³⁵O wii ɓe kasen: —Nde nelunoo-mi on rafi dannga e mbasu e paɗe, won ko ɲaki on naa? Ɓe mbii: —Walaa!

³⁶O wii ɓe: —Jooni kaa, jogiiɗo dannga ɓama, jogiiɗo mbasu naɓora, mo walaa kaafaawi, sootta saaya mum sooda ngooti.

³⁷Sabi ana winndii mi hiisodete e bonɓe. Miɗo wiya on: ana tilsi ɗum hewtoo kam. Ko cappanaa-mi koo fuu goonɗan.

³⁸Ɓe mbii: —Kalfaaɗo, kaafaaje ɗiɗi annii! O wii ɓe: —Heƴii!

³⁹Iisaa yalti, fa'i waamnde haayre wiyeteende Jaytun no o woowiri nii. Taalibaaɓe makko ɓee njokki e makko.

⁴⁰Nde o yottinoo ndee, o wii ɓe: —Nduwee pati on ceyte.

⁴¹Caggal ɗum, o toowtiri ɓe ko waarata e wedannde haayre, o diccii, omo duwoo,

⁴²omo wiya: —Baaba, so a muuyii, woɗɗinam ndee horde bone. Kaa pati laatoo sago am, laatoo sago maa aan!

⁴³Oon wakkati fuu, malaa'ika iwruɗo dow kammu ɓanngani mo, hokki mo semmbe.

⁴⁴O ruubi faa walaa seese, o ɓeydii tekkinde duwaawu makko, nguli makko ana toɓɓa e leydi no toɓɓe ƴiiƴam nii.

⁴⁵Nde o tilii duwaade ndee, o wirfitii e taalibaaɓe makko ɓee, o tawi eɓe ɗaanii saabe terɗe baatuɗe.

⁴⁶O wii ɓe: —Koɗum ɗaanoto-ɗon? Immee nduwo-ɗon, pati on ceyte!

⁴⁷Omo e haala kaa faa jamaa wari. Biyeteeɗo Yahuuda, gooto e sappo e ɗiɗon ɓee, ardii ɓe. Yahuuda ɓattitii Iisaa faa ɓuuccoo ɗum.

⁴⁸Iisaa wii mo: —Yahuuda, ɓuccaango njammborto-ɗaa Ɓii Neɗɗo oo naa?

⁴⁹Nde wonduɓe e Iisaa ɓee njii ko waɗata koo ndee, mbii: —Kalfaaɗo, min coppa ɓe kaafaaje naa?

⁵⁰Non gooto maɓɓe soppi golloowo Jottinoowo Sadaka Mawɗo taƴi nowru mum ɲaamuru.

⁵¹Iisaa jaabii, wii: —Ɗaldee nii! O memi nowru kaadime oo, o sellini ɗum.

⁵²Iisaa haalani warɓe nanngude ɗum ɓee, mawɓe ɓee e hooreeɓe yottinooɓe sadaka e haybooɓe Suudu Dewal Mawndu ɓee, wii: —Ko ngardu-ɗon e kaafaaje e cabbi faa nanngon kam hono mi janoowo?

⁵³Ɲannde fuu miɗo wondunoo e mon ley Suudu Dewal Mawndu nduu, on pawaali e am junngo. Kaa jooni yo wakkati mon, jooni yo wakkati mo nimre laamotoo.

⁵⁴Ɓe nanngi Iisaa, ɓe ngusi ɗum faa ley galle Jottinoowo Sadaka Mawɗo. Piyeer jokkitii mo fali daawre hakkunde maɓɓe.

⁵⁵Yiite huɓɓanooma hakkunde daalaare galle oo, Piyeer wari jooddii e jooɗiiɓe ton ɓee.

⁵⁶Korɗo gooto yii omo fewti e fooyre ndee, taykitii mo faa gasi, wii: —Oo duu e makko wondunoo.

⁵⁷Nii Piyeer yeddi mo, wii: —Banndam debbo, mi anndaa mo fey.

⁵⁸Nde ɓooynoo seeɗa, goɗɗo yii mo, wii: —Aan duu e maɓɓe njeye-ɗaa! Piyeer wii oon: —Giɗo, mi jeyaaka e maɓɓe!

⁵⁹Faa waɗi leer caggal mum, goɗɗo kasen immini haala kaa, wii: —Taƴoral, kanko duu omo wondunoo e makko, sabi o Galilinke.

⁶⁰Piyeer jaabii, wii: —Giɗo, mi faamataa ko kaalataa koo! O tilaaki haalde, faa ndontoori joggini.

⁶¹Nden Iisaa yeeccitii, ƴeewi Piyeer. Non Piyeer miccitii konngol ngol Iisaa haalannoo ɗum ngol: «Fade ndontoori jogginde hannde, a wiyan a anndaa kam cili tati.»

⁶²O yalti sella, o darii omo woya faa omo heppiƴa.

⁶³Yimɓe nannguɓe Iisaa ɓee ndarii ana njaayra ɗum, ana piya ɗum.

⁶⁴Ɓe cuddi yeeso makko, eɓe lamndoo mo, eɓe mbiya: —Annditin homo fii maa!

⁶⁵Hedde eɓe mbiya mo bihiile bonɗe.

⁶⁶Nde weetunoo ndee, waalde Saahiiɓe ndee hawriti, ɗum woni mawɓe leɲol ngol e hooreeɓe yottinooɓe sadaka e dunkee'en Sariya. Iisaa waddaa yeeso maɓɓe.

⁶⁷Ɓe mbii ɗum: —So aan woni Almasiihu oo, haalan min. O wii ɓe: —Fay so mi wii on non, on njaɓataa.

⁶⁸So mi lamndike on duu, on njaabataako.