Text copied!
CopyCompare
ITOU NOMO HILOU BEELE - Luk - Luk 22

Luk 22:7-68

Help us?
Click on verse(s) to share them!
7Beret Yis Uwau Nomo Fati Anyakaro heigai. Nere fati waha langa Itou No Israel Awa Nigainga, Hilobainga Yafane Waha Ninanege Isei nomo bode, sipsip magana waha ayei nomo dukote wodbode.
8Waha bona Yesus no Pita, Jon ngare huuru nirai goi garenga benou lenirai, “Tere goidu bonadere, fati anyakaro waha nomo, ebere da haiya waru nirai.”
9Ono wainga, nere isoki tuware, “Ne gauni, ere goi haumu alanga haiya woyare?”
10Ono warenga, no lenirai, “Tere isaru. Tere taon huwanya langa goi gaderenga, fai ete no yaage tauwe anyakaro langa aulona waha, jala la toroba tironbona. Ono wonga, tere fai waha oojo tudu mata huwanya no goyona waha langa goyaru.
11Onodu tere mata morou waha benou letuwaru, ‘Isisi higou fai no lehinaha, “Jauli adiha waha ji yame disaipel bagu Fati Itou No Israel Awa Nigainga Hilobainga Yafane waha ninage isou da nyoboya?” ’
12Ono waderenga, no jauli anyakaro ete ouwe langa inyina, tewol bagu, sia dada bagu, waha abitimu tironbona. Ono wonga, tere da jauli walanga haiyawaru.”
13Ono wainga, nere goidu bodere, dada oruwanga Yesus no nere lenirai onou urare. Onodu bodere da haiya ware.
14Da nyou saini heige boro wainga, Yesus no tewol langa yafai, ono gainga nomo aposel no ngate gaara yafane.
15Onodu no benou lenigai, “Fati Itou No Israel Awa Nigainga Hilobainga Yafane Waha Ninage Isei Nomo Fati Anyakaro langa tere bagu da nyei nomo gaude hina. Onodu iinga gonga, ji jimiri aulon boni.”
16“Ji tere letigini, ji da beha ege ada nyoni, goi saini dada beha Itou nomo huuna langa yafou la tigini heigonbona.”
17Onodu bona, no kap wain bagu ete tedu, Itou hilobainga tudu bona lenigai, “Tere beha tedu bonade, tere gamatege langa wese wagu.
18Taate bona, ji tere letigini, elebe bagu iinga bagu ji wain ege ada nyoni, goi saini Itou nomo huuna la yafou heigona la.”
19Onodu bona no beret ete tedu, Itou hilobainga tudu bona, no beret waha lalatidu no nomo disaipel nigai. Onodu bona lenigai, “Beha waha yame geefe gala, ji tere hoyo tigei nomo boni tigini. Tere onou ono bonade ji bonade ninatege isagu.”
20Ariya, saini nere nyi boro wanenga, no kap wain bagu tedu bona, onounga onowai. Onodu lenigai, “Kap wain beha waha, beele bara tawou eege, ji yame ganefe langa ononaha, ji tere hoyo tigei nomo boni feuni.
21Ariya uragu, fai no ji honggoro fai owonege langa tafa hiyonbona waha no ji ngare tewol langa yafayare.
22Fai Nomo Idau no jala amina Itou no hangada fuwai waha oojo wonbona. Onou wa, fai no honggoro fai owonege langa tafa tuwona waha no augami bagu.”
23Disaipel nere beele waha isidu bode, jaidu nere nage-nage benou isoki guruwane, “Faiwei no onou ono wonbona?”
24Ariya, disaipel nere faiwei no nebere amugou, waha bode beele langa warawou hugu warane.
25Ono wanenga, Yesus no benou lenigai, “Nere fai-aita fereha nebere king nere unyinege bagu, waha bona nere oofa nigi-nigide, onodu nere unyinege benou bagu, nere fai fanyimu hilobainga ono nigou.
26Ariya tere onou adai ono wagu. Uwa. Fai no tere gamatege langa amugou yafana waha, no fai tigini huunta heigai dorofe yafona. Ariya, tebere mora bagu no tebere hoyo tigou haruwe fai dorofe yafona.
27Isagu. Faiwei no amugou? Fai no da nyi bona yafana waha yo, uwa haruwe magana no da uudu tamai funa waha? Fai no yafa bona da nyina, no waha wenga amugou. Ariya, ji tere gamatege langa hoyo tigei nomo haruwe fai dorofe yafani.
28“Ariya, saini dada ji wala-wala hiyei nomo heigane waha, tere ji awa hiyegu uwa, tere ji ngate yafei.
29Yame Jijei no nomo huuna langa yafou waha hiyaiha, onou dorofenga, ji yame huuna langa yafou waha tigini.
30Onodu yame huuna la yafou langa, tere yame tewol langa yafa bonade da yaage bagu nyagu ganga. Ono bonade tere sia hilobainga langa yafa bonade, nere Israel 12 waha oofa nigagu ganga.”
31Ariya Yesus no benou lewai, “Saimon, Saimon, ne isau. Satan no tere tebere huwanyatege ngalengawou wala-wala tagei nomo amina lewaiha, fai wit nomo tuturumu haawewei nomo ono-onode dorofe.
32Onou wa, ji ne name huwanyate ngalengawou adai taumoga bona, hoyo hinidu hauyanaha. Saini ne ubuludu ege gidu maidu, ne name baine gane dangamu nigau.”
33Ono wainga, Pita no benou letuwai, “Anyakaro, ji ne ngare dagou mata langa goyei nomo haiyanaha yafani. Ji ne ngare umei nomo fere haiyanaha.”
34Ono wainga, Yesus no letuwai, “Pita, ji ne lehinini elebe ooru beha langa teewe warei uwa inyi gonga, saini waha langa ne le eei wau ganga, ji no boni alai uwa.”
35Yesus no nomo disaipel lenigai, “Saini ji tere huuru tigenenga yame haruwe tei nomo goiyei la, tere tebere moni fausi bagu, olodo bagu su bagu auledu goyegu uwa. Saini waha langa, tere dada ete boya tutu tigai yo, uwa?” Ono wainga nere uwa tuwane.
36Ono wanenga, no benou lenigai, “Onou wa, elebe fai no moni fausi bagu yo, olodo bagu yo, wa no edo tonbona. Ariya fai no oota kesebu uwau wonga wa, no nomo saket huurudu bona moni tedu oota kesebu ete ejiya wona.
37Taate bona, Itou nomo buk langa beele beha bagu, ‘Fai-aita bagu nere no fai inyaba ete dorofe urane.’ Onou bona ji tere letigini, fai-aita bagu nere onowou beha ji langa ono wodbode. Taate bona, dada oruwanga Itou nomo buk langa lena waha, ji langa onou tigini heigonbona.”
38Ono wainga, nere letuwane, “Anyakaro, ne urau. Ere oota kesebu nga nononga benu inyina.” Ono wanenga no lenigai, “Wa edola.”
39Ariya, Yesus no taon awadu bona Oliv muju langa manai, no gai-gai ono-onona onou. Ono gainga, nomo disaipel taga tuwane.
40No mani, muju waha langa heigedu bona, nomo disaipel benou lenigai, “Wala-walawou tere la heigoga bona, tere hauya wagu nigai.”
41Onodu bona, nere awa nigidu menanga onou golodu baae langa goyai, fai megebu kaite ganenga goi meboduna, onou la. Onodu no afo tuburu kutudu bona, benou hauyawai,
42“Jijei, ne gau hinei mata wonga, kap beha edo aririmu hayau. Ariya, ne ji yame gauwou adai oojowau. Uwa. Ne name gauwou wahanga oojowau.”
43Ono gainga, ha laluwa nomo ensel ete medu bona, no dangamu tuwai.
44Yesus no ou gai inyaba waha isidu bona, no ege danga bagu hauyawai. Ono gainga, nomo ngisiramu ganemu dorofe heigedu bona, oula langa orosowai.
45No hauya borodu bona, no jaidu nomo disaipel bagu goyai. Onodu bona, nere agore jiri ganenga nerigai, taate bona nere huwanyanege ou dewai.
46Onodu, no lenigai, “Tere taate boya agore jiriya? Tere jaidu bonade, hauya wagu. Gamaji wala-walawou tere langa heigonga, tere taumagu ganga.”
47Ariya Yesus no beele lebona oto gainga, nere fai toomaro mayane. Fai Judas tude waha no disaipel 12 waha nebereha ete, no amuge nigidu bona jala abitimu nigi gainga mayane. No Yesus uumba tuwonbona hinomu langa mayai.
48Ono wainga, Yesus no benou isoki tuwai, “Judas, ne Fai Nomo Idau uumba tuwou langa, nere honggoro fai owonege la tafa tuwau ganga ninate isinaha yo?”
49Ono wainga, disaipel nere Yesus ngate yafane waha, dada heigona ono gainga uredu bode letuwane, “Anyakaro, ne ere oota kesebu langa dunege kotewei nomo gau hinina yo?”
50Ono ganenga, nebereha ete oota kesebu tedu bona Pris, ete nomo haruwe magana warainga ooto kesebu, nomo agokuli ulate owo hilou langa waha, saludu kaitainga meboduwai.
51Ono wainga Yesus no waha uredu bona lewai, “Onowou waha awagu.” Onodu bona, no fai waha nomo agokuli langa owo tafainga, nomo agokuli ege hilobainga heigai.
52Onodu bona, Yesus no Pris aroro bagu, tempel nomo kepten bagu, nere mora bagu, no yaasu tuwodbode mayanenga lenigai, “Tere oota nomo kesebu bagu, dumuga bagu elegedu warawou fai yo yebu fai ete dorofe, yaasu tuwagu ganga maiyaha, onou yo?
53Fati oruwa, ji tere bagu tempel langa yafa gene, ariya tere owotege ji la tafegu uwa. Onou bona elebe saini beha tere tebere saini. Elebe agugu nomo danga, lalawou feiya tuwaha.”
54Ariya Yesus no beele leboro wainga, nere yaasu tudu bode haudu minane. Nere no haudu bode, Pris mora bagu nomo mata huwanya langa goyane. Ono ganenga, Pita no nere oojo nigidu goyai, no menanga onou baae la otowai.
55Ariya, fai ila nere mata waha nomo orei huwanya langa eeya ujidu bode yafane. Ono ganenga, Pita no nere ngate yafai.
56Ono gainga, haruwe aita ete no eeya langa yafa gainga uredu bona, no tigini Pita feele tubona lewai, “Fai beha fere, no Yesus ngate yafa gane.”
57Ono wainga Pita no kakiri bona lewai, “Aita, ji no boni ada isini.”
58Iinga menanga onou, fai ete fere no Pita uredu bona lewai, “Ne fere, nebereha ete.” Ono wainga Pita no lewai, “Ji nomo disaipel uwa.”
59Ono gainga, menanga awa etenga onou goyainga, fai ete no beele danga bagu benou lewai, “Ngalenga tigini, fai beha fere no Yesus ngate yafa gane. No Galiliha fainga.”
60Ono wainga Pita no lewai, “Ne beele leni beha ji tigini alai uwa.” No onou legainga, fasadu onou teewe kokorokowai.
61Ono wainga, Anyakaro no ubuludu bona, Pita feele tuwai. Ono wainga, Pita no beele Anyakaro letuwai waha bona ninau ege isai. No letuwai, “Elebe ooru beha langa, saini teewe warei uwa inyi gonga, ne ji unyife kakiri eei wau ganga. Ne lewau ganga, ji no boni alai uwa.”
62Onodu Pita no malala heigedu goidu inyangaaro merai.
63Ariya nere fai Yesus yaasu tuwane waha, nere no memesi tubode warane.
64Nere ago ogola langa dage fudu bode, benou isoki tuwane, “Elebe ne profet beele lewau. Faiwei ne narina?”
65Ono bode, nere beele inyaba baingaro ila fere letuwane.
66Saini hoonga mai gainga, fai-aita bagu nebere mora bagu mai komo wane, ono gane nere nuuni beele isou fai fere mayanenga gaara komo wane. Onodu bode, nere Yesus haudu nebere kaunsel langa goidu letuwane,
67“Ne lehigau, ne beha Itou no nomo fai-aita bagu ege gidu hanigei nomo hangada hinai yo, uwa?” Ono wanenga no lenigai, “Ji tere letigei mata wehenga, tere huwanyatege ada ngalenga wona.
68Ariya, ji tere beele ila boni isoki tigehenga wonga, tere yame beele ege gidu ada lewagu ganga.

Read Luk 22Luk 22
Compare Luk 22:7-68Luk 22:7-68