Luka 19:6-37

⁶Ia i pesaheuheula, i woeaisaei ena numa eai ma kodena.

⁷Isi abo se ita, gamagaridi se gadigadiguguei, si ene, “Ia i lau tau baabaaeana i aitaumania.”

⁸Sakaio i toro, i ribalau Guiau arinai, i ene, “Guiau e, egu gogo tupona abo ea mosei tatao gogogesagesa aridi eai: eo ena ginauri aisana ea abigaibuidi hari tau, hari tau, aridi eai ea boraidi, abo ea hemaisauioidi, ma hasi maisana ea helai.”

⁹Iesu i ribalau ia arinai, i ene, “Teina asubena ta mauri i lage teina numa eai ta, paana ia hinage Aberahama natuna esau.

¹⁰Paana ede Tau Natuna i laoma tatao se tauyamui i eooidi, eo i hemauridi.”

¹¹Teina riba ta se ataiedi, parabole esau abo i heribadi, paana ia Ierusalema i hanahanaui, eo isi edi nuatu hinage si ene, Eaubada ena basileia nige baeaona abo se hemasaraha.

¹²Arinai i ene, “Wasawasa esau i lau eanua esau eda lohaloha eai ena basileia esau bena i abi, eo i uioma.

¹³Ena heaheari tataodi saudoudoi i eogaidima, moni pauna saudoudoi i mosedi, i ribalau isi aridi eai, i ene, ‘Au hepaisoaei i lau e ea uioma.’

¹⁴Ena eanua tataodi ia se ouyalayalaei, riba esau se laei ia arinai, si ene, ‘Tau ta nige ai henua ia ama tanuaga.’

¹⁵Ia i uioma, basileia wa i abiyao, tatao, abo i lauhesomdi heaheari tataodi se eogaidima ia arinai, isi wa moni i mosedi wa, isi se uneune bena i itadi moni hisa se hetubudi.

¹⁶Tau baguna i laoma, i ene, ‘Guiau e, em pauna esega i hemala pauna saudoudoi.’

¹⁷I ribalau ia arinai i ene, ‘I lolo ariri, oa heaheari lolona: em nuatu se dudurai, ginauri hisahisawaidi mo u komakomanidi, abo ea hetorom eanua saudoudoi oa tanuagadi eai u lau.’

¹⁸Heaheari helabuina wa i laoma, i ene, ‘Guiau e, em pauna esega i hemala pauna haligigi.’

¹⁹Hinage ia arinai i ene, ‘Oa abo se hetorom eanua haligigi tanuagadi eai u lau.’

²⁰Heaheari esau wa i laoma, i ene, ‘Guiau e, hage u ita em pauna meta: ea suma komakomani, ea totore ie ota;

²¹paana ea matausiem oa tau isuisupunapunana: eo em laulau enam u abigaibuidi mo, eo ginauri bena u tanogogoidi sora nige u lauhesuru.’

²²I ribalau ia arinai, i ene, ‘Oa heaheari tauna baaeana, oa awam eai abo ea hegirum. U nuatui eau tau isuisupunapunana, eo ginauri ea abi gaibuidi, eo ea tanotanogogo sora nige ea hesuru.

²³Ie saha egu moni nige ue tore bank eai, ea uioma abo egu moni ea abi, eo hagahagadi hinage?’

²⁴Isi ia gegesina eai tau totoro i ribalau aridi eai, i ene, ‘Pauna esega wa au abi, abo au mosei tau wa pauna saudoudoi tau abina arinai.’

²⁵(Isi se ribalau ia arinai, si ene, ‘Guiau e, ia pauna saudoudoi i abidio.’)

²⁶Paana ea heribamiu ta eai to eai enana ie abi, enana hinage abo se mosei: eai to eai nige ie abi enana begana abo se laeudoiei.

²⁷Na isi, agu waiunuyao nige se henua eau bena tanuagadi, au woeaidima, au unuidi matagu eai.’”

²⁸Ia i ribalau ina doha, abo i bagubagunaedi, se sae Ierusalema eai.

²⁹Betepage eo Betania i hanahanauidi, tupi esau esana Oliveta arinai se lage, ena heaheatayao labui i hetamaridi.

³⁰I ene, “Au lau eanua matamiu eai, au lage arinai asini natuna se hedai au ita, sora nige tau esau i bawasae arinai, abo au eairihai, au woeaiama.

³¹Ena tau esau i hesiowa, i ene, ‘Paana saha asini ne au eairihai?’ abo au riba ina doha, au ene, ‘Paana Guiau bena i abi.’”

³²Isi se hetamaridi wa abo se lau, hinage se ita doha ena riba i ribaei.

³³Asini natuna daina bena se earihai, tanuagana se ribalau aridi eai, si ene, “Asini natuna me sahana au eairihai?”

³⁴Si ene, “Guiau bena i abi.”

³⁵Abo se woeai se laei Iesu arinai, adi lulu se toresae asini natuna potana eai; abo Iesu se hebawasae potana eai.

³⁶Ia ma launa adi lulu se lauweseauri dobila eai.

³⁷Ia i lage hanahanau, Oliveta tupina abaleta‐dobina eai, ena heaheatayao moutuadi gamagamagari se kode, eo se arina lailai Eaubada se aihelahui, paana ana paisoa gigiboridi se itadio;