LUKA 19:6-37

⁶Na tenepo iye adabuluka na kankulumize aciyenda naye pabodzi kumui kwaceko acimutambira na kukondwa kwene-kwene.

⁷Ndipo wanthu wentse omwe adawona bzimwebzo akhang'ung'udzika acimbati: “Onani ule, wakafikira kumui kwa munthu nyakuphonya.”

⁸Tsono Zakeuyo adalamuka acimuwuza Mbuya aciti: “Bvani Mbuya, ine-pano ndinipambula bzinthu bzangu bzentse pakati ndicipasa anyakusauka. Penu ndidabera munthu ndinim'bwezera kanai kentse.

⁹Ndipo Jezu adamuwuza kuti: “Cipulumuso cafika m'nyumba muno lero. Thangwe umweyu ni mwanambo wa Abramu.

¹⁰Nakuti Mwana wa Munthu adabwerera kudzalinga na kupulumusa wanthu wakutaika.

¹¹Pomwe iwo akhabva bzimwebzo ndipo Jezu adawatsikira matere. Nakuti iwo akhali pafupi na Jeruzalema ndipo akhakumbuka kuti umambo bwa Mulungu bungadawonekeratu pamwepo.

¹²Ndipo Jezu adawawuza kuti: “Pakhana munthu m'bodzi wambiri omwe adayenda kudziko la kutali kwene-kwene, kuti akatambire umambo ndipo akamala acibwerera.

¹³Ndipo iye adacemera anyabasa wace khumi, aciwasiira wentse kobiri za minyezi mitatu-mitatu, aciwawuza kuti: 'Ndiri kukusiirani kobirizi kuti mucitire nazo malonda mpaka kubwerera kwangu.”

¹⁴Tsono wanthu wa m'muimo akhamuwenga, ndipo iwo adatumiza muimikiri na mafala aciti: “Ife-pano tinifuna lini kuti munthu omweyo akhale mambo wathu.”

¹⁵Pomwe iye adabwerera kucokera kukatambira umambo bwacebo. Ndipo adacemeresa anyabasa wace omwe akhadasiyira kobiri wale kuti adzawabvundze kuti ni mphindu lanyi lomwe adawona na kobirizo.

¹⁶Ndipo wakuyamba adabwera acilewa kuti: 'Mbuya, kobiri yanu yamphindula pomwe zinango khumi.'

¹⁷Na tenepo mbuya waceyo adamutawira kuti: 'Bzakoma kwene-kwene, ndiwe nyabasa wabwino! Nakuti wakhulupirika na cinthu cing'ono ndipo un'dzatonga mizinda khumi.

¹⁸Ndipo adabwerambo waciwiri aciti: 'Mbuya, kobiri yanu yaphindula pomwe zixanu.'

¹⁹Na tenepo umweyo adamutawira kuti: 'Iwepo un'dzatonga mizinda mixanu.'

²⁰Ndipo adabwerambo pomwe winango aciti: 'Kobiri yanu iyi mbuya, ndikhadaikoya, idamangirira papfundo.

²¹Nakuti ndikhanamwe mantha, thangwe ndimwe wanthu wakunesa kwene-kwene. Mumbatenga cinthu comwe n'canu lini. Ndipo mumbabvuna bzomwe mulibe kubzala.'

²²Ndipo iye adatawira kuti: 'Nyabasa wakuipa, ndin'kumanga mulandu na thangwe ra mafala yakoya. Nakuti iwepo ukhadziwa kale kuti ine-pano ndine munthu wakunesa kwene-kwene, ndinimbatenga bzinthu bzomwe mpsangu lini. Ndipo ndinimbabvuna bzomwe ndiribe kubzala.

²³Thangwe ranyi ulibe kukakoya kobiri yanguyo kuthenthe la kobiri? Pomwe ine-pano ndingadadzabwera ndipo ndingadadzaitambira na phindu.

²⁴Ndipo iye adawuza wale omwe akhali pamwepo, kuti: 'Mutengereni kobiriyi, mupase omwe ana kobiri khumi ule.'

²⁵Na tenepo iwombo adatawira kuna mbuyayo aciti: 'Iye anazo kale khumi!'

²⁶Tsono ndiri kukuwuzani kuti: 'Munthu omwe ana bzinthu bzizinji andzatambirambo pomwe bzizinji. Tsono ule omwe alibe na cinthu, napo bzing'ono-ng'ono anabzobzo adzatengeredwa pomwe.

²⁷Na tenepo anyamadulanthaka wangu omwe akhafuna lini kutongedwa na ine wale, abwereseni pano muwaphe ndiciwona maso.”

²⁸Pomwe adamala kulewa bzimwebzo, Jezu adatsogola njira paulendo bwace bwa kuJeruzalema.

²⁹Pomwe adafika kufupi na mii ya Betifaje na Betanya, pafupi na phiri la Olivera, iye adatuma ateweri wace awiri.

³⁰Ndipo iye adawawuza kuti: 'Ndokoni m'mui omwe uli kutsogolo kwanuyo, mungakafika mun'kawona kabulu kadamangirira, komwe kakanati kupakiridwa na munthu. Ndipo mukakatsudzule mucibwera nako kuno.

³¹Penu munthu an'kakubvundzani kuti: “Thangwe ranyi muli kukatsudzula?” Ndipo imwepo mukamutawire kuti: “Mbuya ali kukafuna.”

³²Na tenepo iwo pomwe adayenda adakabziwona bzentse ninga momwe Jezu akhadawauzira.

³³Pomwe iwo akhatsudzula kabuluko, ndipo wenekaciro adawabvundza kuti: ''Kodi thangwe ranyi muli kukatsudzula kabuluka?”

³⁴Na tenepo iwo adatawira kuti: “Thangwe Mbuya ali kukafuna.

³⁵Ndipo iwo adakabweresa kuna Jezu, acitandika bzakubvala bzawo pakabulupo acimuthandiza Jezuyo kupakira.

³⁶Pomwe iye akhayendapo wanthu akhatandikambo bzakubvala bzao munjira.

³⁷Pomwe akhafika phompho la phiri la Olivera, mthithi wa ateweri wace wentse adayamba kusekerera, acimbatumbiza Mulungu na kukuwa, na thangwe ra matsenga yentse yomwe iwo adawona.