Lucas 19:6-37

⁶Nu gorzee lejer doo mla xaa, nu nyakdoola xaa mbin xaa lee Jesús kwaz garli xaa.

⁷Gorna ngune re myet kwaane, mzelo re xaa mkediizh xaaya nu nzhé re xaa: —Lee Jesús nya kwaan tub xaa nzeeb doo jwalt.

⁸Zaqueo mzoli nu nzhé xaa: —Wii Xaa Nabeyy, rol re kwaan nkano na za na lo re xaa prob; nu chelee na mlewann na xcheen stub xaa, tap tant kwaan mkiib na lo xaa zere na lo xaa nal.

⁹Jesús nzhé lo re xaa: —Nalzhe lee yalnaban kwaan tira mzhin lo re xaa nzho yoo ne, nel noka lee xaa nak dii cheen Abraham.

¹⁰Nel na, Xaa Mzhin Ngok Myet, nzekwaan re xaa mzowen zee za na yalnaban lo re xaa.

¹¹Gorna mbin xaa re kwaane, Jesús mzaa tub kwent nabix ne lo re xaa, gorna nzhazhin gaxla xaa Jerusalén, nel lee re xaa nle xgab merla nabeyy Dios lo re myet.

¹²Zee nzhé Jesús lo re myet: —Ngu tub xaa non doo, nu mroo xaa nzha xaa zit doo, pa gak xaa tub rey xaa nabeyy, nu zeera bare xaa garli xaa.

¹³Gorna zeeraka roo xaa, mrezh xaa tub chii xmos xaa, nu mzaa xaa tubga demi or lo re xaa nu nzhé xaa: “Bkano gu demi ne zhiin axta gorna bare na”.

¹⁴Per re xaa nabeyy xaa lo nayii ne xaa, nu mxaal re xaa lak xaa nzha yéya lo rey: “Nanzheklat nu gak xaa ne rey cheen nu”.

¹⁵Per gorna ngok xaa rey zee mbare xaa nabeyy xaa xkyizhyo xaa. Zee mrezh xaa re xmos xaa, xaa mzaa xaa demi lo, nel nzhekla xaa ne xomod mkano xaaya zhiin.

¹⁶Xaa yanertlaka mzhin lo xaa nzhé: “Xaa nabeyy, demi or kwaan mzaa lu lo na nee, mle na gan stub chii demi or”.

¹⁷Lee xaa nabeyy nzhé lo xaa: “Xmos na, wen doo mkee lu zhiin nu nali doo mle luya. Nali doo ngok lu lo chepse kwaan mza na lo lu, nu lee nal za na chii yezh nabeyy lu.”

¹⁸Lee stub xmos xaa mzhin lo xaa nu nzhé: “Xaa nabeyy, kwaan demi or kwaan mzaa lu lo na, mle na gan stub gaay demi or”.

¹⁹Nu nzhé xaa lo xaa: “Nal nza na gaay yezh nabeyy lu”.

²⁰Lee stub mos mzhin nu nzhé: “Xaa nabeyy, lee xdemi lu kwaan mzaa lu lo na, leeya nee. Mlozhaw naya lo tub panit.

²¹Xaa nabeyy na, ne na lee lu nak tub xaa nakap doo, nu nzhaan lu pa nanakt xleyo lu nu ntop lu yalgon pa nankeet lu goon.”

²²Lee rey nzhé lo xaa: “Leeka kwaan xtizh lu kwaan ngunii lu lo na, naab na kwent lo lu; lu nak tub xaa mal. Néla lu lee na nzhaan pa nanakt xleyo na nu ntop na yalgon pa naket na goon.

²³¿Chozhiin nangoot lu xdemi na bank? Zee gorna ngbare na, ngzaa lu xdemi na kwaan mza na lo lu, nu ngzaa lu xinna kwaan mleya gan lo na.”

²⁴Zee lee xaa nabeyy nzhé lo re xaa nzhi lo xaa: “Bkiib gu demi or lo xaa ne nu bzaa guya lo xaa nkano chii demi or”.

²⁵Nu lee re xaa nzhé lo xaa: “Xaa nabeyy, nkanola xaa chii demi or”.

²⁶Per lee xaa nabeyy mkeb nzhé: “Lee na nii lo gu: Nel xaa nkanoya zaa xaa masraya lo xaa, nu axta nzhobre zaa xaaya lo xaa. Per lee xaa kwaan nankanota axta chep kwaan nkano xaa yiib lo xaa.

²⁷Teno gu re xaa nanzheklat gak na rey lo, nu bit gu xaa lo na nee.”

²⁸Gorna ngulo mzaa xaa kwent ne, zee nzha xaa naz Jerusalén.

²⁹Gorna lee Jesús nzhazhin gax rop yezh kwaan le Betfagé nu Betania, gax yi le Olib, mxaal xaa chop xaa mseed lo xaa.

³⁰Nu nzhé xaa lo rop xaa: —Gwa gu yezh kwaan nzhi gax nee, nu baa yizhal tub burr ma nkadoo lo gu, ma nik tub xaa zer zob tich. Xek gu ma nu yaadno gu ma nee.

³¹Chelee nzho cho nabdizh lo gu nu né xaa lo gu: “¿Chozhiin kaxek gu burr ba?” yé gu lo xaa: “Xaa Nabeyy nkin ma, nu zeera bare nu yiidlaa nu ma”.

³²Lee rop xaa kwaan mxaal Jesús nzha, nu nguzhal xaa burr kwentaxa nzhé Jesús lo rop xaa.

³³Gorna lee xaa kaxek ma, lee bixwann burr mnabdizh lo xaa: —¿Chozhiin kaxek gu xburr na?

³⁴Lee rop xaa mkeb nzhé: —Nel Xaa Nabeyy nkin ma.

³⁵Zee mbe xaa ma lo Jesús. Nu mzhib xaa xab xaa tich ma, zee mzob Jesús tich ma.

³⁶Nu gorna nzhaded Jesús lee re myet mbek xab leen naz.

³⁷Nu gorna nzhakato xaa xan yi Olib, lee re myet kwaan nzhake tich xaa mzelo mbill dublegan lo Dios nu mzaa re xaa dixkix lo Dios kwent cheen rese kwaan gro doo kwaan ngune xaa mle Jesús.