LUKA 10:13-32

¹³Wai Korazin! Wai Betsaida! Wabi legize ya asiasi wadigiare! Ese able etamilam ge bakerda muige wabidoge eipuge ge bakerda muige Tayage a Saidonge able le pe turidli wi no obamri tabara okasosok wali wamida a tababu tibiu obatimwareda ko merbi waditomerteda wi taba witlam tabatareda!

¹⁴Keub Gergerge Agudira omar ya Taya a Saidon leem aukakale waikereder ya abra omar wabi leem wadikereder.

¹⁵Marim Kapanam! Nako ma laglag nali mari kotorem nagisrare? Mari ya adem wataratimdare Asiasi Utebem!”

¹⁶Iesude eudige tabara memegle daratagerda, “Netide wabi wadasorlare wi kari ko wanasorlare. Netide wabi detwakeda wipe kari ko natwakeda. Netide kari natwakli epe Agudi ko detwakli ge kari taramarikda.”

¹⁷Nade able 72 le tabakomerti wige au sererge urder. Wi detautlare, “Ople keriba aukaka sasrim nagri able demonide ko kerbi dasreda nade ki mari neige ki yabi au kelarkelar daratagreda!”

¹⁸Iesude eudige yabi nakerda, “Ka Satanai geka dasmerer e takesmeri kotorlam mokakalam perper.

¹⁹Wa asrare! Ka wabi kelar daiswerda ya wayakai wa umele wabi teteru tabo a bokani daraskimelare, a wader sasrimsasrim lu pa Kurablera daragriwerteda, a umerkak wabi nalugide ya wabi wadireslare.

²⁰Wa nole sererge uridwa ableglam wabi adud lamargize wabi dasorlare. Wa sererge uridwa ableglam waba nei inoko kotorge taraisirwerteda.

²⁵mizmiz 10 nosik 25-37 Netat kerkerge, able Gelar Erwerle ekweilu laglag Iesui wadamisri taba miru. Able kimiaret eudige Iesui itmeri, “Erwerle, ka nalu lu akailu ya wayakai ka niai idid tarpeilu?”

²⁶Ege Iesude abi detagri, “Nalu lu pe naisirwerteda muige Gelar Ziawalige? Ma nalu waitager able ziawalilam?”

²⁷Ege abi able kimiaride ikaidari, “Ma omarge mara Ople mara Agud ikerwa kemerkemer mari nerkepu, a kemerkemer mari lamaru, a kemerkemer mari kelaru, a kemerkemer mari idoniu” a “Ma omarge mara le maikes maridoge able orwairorwair mokakalam ma mabu omarge bakeli”.

²⁸Ege Iesude abi ikaidari, “Ma nalu pema kari detagri e barkak dikeredi. Ese ma mena able lu ikerer ma ya mena idid nawer.”

²⁹Ege able kimiar dawer tababu obakaida aukaka wadali gair legize abi wadasmereda, e Iesui ga itmeri, “Kara nete le dali maikes karidoge?”

³⁰Iesude abi detagri, “Nade able le bakiamuda Ierusalemaem Zerikolam, abi wader erwamlegize erpeidarda gair lu abi adem etkamerda, a abi eresa. Nade wi abi dikaireta gab dege, e maike weumida.

³¹Ege Iudaya merkem ko tikasireder able gabge. Nade e tabakiamuda able kimiar erdari ege no bakiamuda able gabge nerut pekge.

³²Able orwairorwair merkemira upiatidarle ga tidikasereder. E ko tabakiamuda able utebge osmeda, e able kimiar erdari e ko no bakiamuda nerut pekge able gabge.