Luk 2:9-40

⁹Eme angelo ari ta Laban badu loken eme asahan hawe oro, ma lomadan ta Laban lomatani oro. Eme ya oro anoh andra-i labai.

¹⁰Arile angelo dah, tiye i toro, “Ado sanoh! Ado kanuhun! Jo eme dah ta tiye nyala ado ta sahou mwasin, ma hawe idah kameh amekes lau mari kameh sekesek tinan labai.

¹¹Na len dah, udu kon tinan ta Debit, nah ari ta seben ado ndrasahan. Iy badeh, Laban Krais!

¹²Kalem ta aliy kameh ado atanan iy handru i buku doh: Idah kameh ado atou nah doh kameh su-i iy na kolau, ma nyahani iy, udu bolo bwekei ta ndrahu nyamon ta bulumakau.”

¹³Eme nawin bwe, iri angelo solo-an labai badu loken ame hawe angelo ari nane dah, ma iri ayah wari ta atudun nyara Kindrei i buku doh,

¹⁴“Lomadan ki ta Kindrei, udu loken labai bwele-e kandrah, Ma mondrei udu bwele-e munyak i toro are iy aseken oro labai, ado mwasin ta madan.”

¹⁵Ano iri angelo au a len ta mada oro, ma iri au ala kandrah. Eme ya oro lau ta atondrok sipsip ame, ndremenya oro ari ari anya, “To ka-au kala Betlehem, kanyolom lakou nane Laban asehek ta to.”

¹⁶Eme ya oro suri oro suwi suwi, ma oro ala takaleh, ma atou Mariya uru Josep, ma anyolom nah nane dah, amadin udu bolo bwekei ta ndrahu nyamon ta bulumakau.

¹⁷Eme oro lau ta atondrok iri sipsip anyolom iy. Ano oro asehek i tiri ta nyala nah nane dah mene angelo asehek i toro.

¹⁸Ya eme iri lau anuhun sahou nane oro asehek dah, ma iri abudon solo-an labai ta aliy.

¹⁹Eme bale Mariya bamaniy bwe, iy lomondra boto-on labai ta aliy kahis le.

²⁰Ano oro lau ta atondrok sipsip au ala hamon ja, ma ayah wari ta atudun Kindrei ta lakou mari oro anuhun, ma lakou mari oro anyolom, asahan i buku le angelo mene ndrasihidi toro ndra-au.

²¹Eme ya len tan asahan ndru la-uh, idoh len ta asan ku-in. Ano uru tondrohani nyaran i Jises, nyaran mene le, angelo tiye, na len doh mene, nah bare ta Mariya bwe le.

²²Ano, len asahan ta Josep uru Mariya kamekes kandriyen malen ta Moses mene batanau ta sikine uru. Eme uru tiyani nah dah, ili Jerusalem ta leheya iy ki mada Laban,

²³i buku none ndratorowenei udu bolo sahou batanau malen ta Laban, “Ta nah kadok mari badeh, kadeu iri ka mine Laban.”

²⁴Eme uru ale ala adeu “la-uh ban, ya i buku ban bwe, na la-uh ku, i mine iri pris ta asun” i nyara salom in hamon ta batanau ta Laban.

²⁵Eme ndramak ari badu Jerusalem nyaran Simiyon badeh, udu aliy. Iy badeh, mwasin handru ta mada Kindrei ma iy inoh Kindrei labai. Ya iy badeh, Malawin Ndrabun udu tan, ma iy abe-en len ta seben ta lau badu Isra-el kameh asahan.

²⁶Ma Malawin Ndrabun ndratiye tan, ta iy kameh winiyan bamak bwe, winiya iy udu atou tandrakan ta Laban, Krais.

²⁷Eme Malawin Ndrabun tiye Simiyon ili bolo asiu tinan ta Kindrei. Ano Josep uru Mariya ala atiye nah dah, ili bolo asiu tinan ta Kindrei in hamon le ta batanau mene ndratiye.

²⁸Eme Simiyon bwese-ei nah dah udu bohan, ma iy edeu wurah i ta Kindrei:

²⁹“Kabwai Laban, ou bamani tandrakan tam i ta lohowan tam bwe, kabwe, ou anya jo kimek, jo kimek ai ma sekesek.

³⁰Tasah, udu madak amwenen jo ndranyolom seben tam ai,

³¹Ou mene lowosani udu mada lau mari anyolom:

³²Anya ma lomadan eme len, ta leheya ou ame len mada iri lau badu leheleh, ma lomadan anya i tiri lau tam, Isra-el.”

³³Eme tama Jises uru tinen badeh, boho uru asak ta sahou nane Simiyon asehek nyala Jises dah.

³⁴Ano, Simiyon atehei nyosowan i la-u oro, ano iy tiye i ta Mariya, “Iy nah le doh, Kindrei le edeu iy, ma idah kameh iy aseben iri lau badu Isra-el rayah, ya iri rayah kameh bwale iri iy. Ma idah kameh, iy i kalem ta lau kameh asehek sahou nyarahan i tan,

³⁵ma idah kameh, iy leheya budon ndra-in tiri kameh eme lewan. Ma idah kameh ou tikisiy handru, i buku none samen madan, mesekei ndrinem tikisiy tinan labai.”

³⁶Eme ya propet badih ari nyaran Ana nadu Panuwel udu aliy. Iy badu boho kamen ta Aser. Iy udu ta udun jaha ma ndro taloh le, ano udun imek. Iy i nyau udu udu, iy i alon, ma jaha tan asahan ndru lunoh hahuw (84).

³⁷Ya ben len, ben len, iy abeles iy ta nyamon, ma iy baruwani ta ili asiu tinan ta Kindrei ta amekes solom, ma ta atudun Kindrei, bwe.

³⁸Eme iy eme isos hawe oro na len doh, ma iy edeu wurah i ta Kindrei, hawe iy asehek nyala nah doh, i tiri lau heh mari abe-en bohon ili bwena, ta ndramak ta akunoh iri Jerusalem.

³⁹Eme uru mesekei lahou mari in hamon ta batanau mari ta Laban. Ano uru ala hamon ja, ala Galili ma ala kon turu Nasaret.

⁴⁰Eme nah dah i tinan i boto-on; ma iy idih ta tanan badu loken, hawe nyosowan ta Kindrei udu tan.