Luka 2:9-40

⁹Te vaengah Boeipa kah puencawn tah amih taengah a phoe pah. Amih te Boeipa kah thangpomnah loh a tue dongah rhihnah neh bahoeng a rhih uh.

¹⁰Tedae amih te puencawn loh, “Rhih uh boeh, pilnam boeih taengah aka om ham omngaihnah tanglue te nangmih taengah olthangthen kan thui he.

¹¹Tihnin ah nangmih ham khangkung om coeng. Anih tah David khopuei ah Khrih Boeipa la om coeng.

¹²Nangmih ham miknoek pakhat om vetih, cahni te a yol phoeiah khongduk dongah a yalh te na hmuh uh ni,” a ti nah.

¹³Te vaengah puencawn te vaan caempuei rhaengpuei loh tarha a om puei tih Pathen te a thangthen uh.

¹⁴Te vaengah, “Pathen te a sangkoek ah thangpomnah om saeh, diklai ah rhoepnah neh hlang rhoek soah a kolonah om saeh,” a ti uh.

¹⁵A om van bangla puencawn rhoek tah amih taeng lamloh vaan la cet uh. Tudawn rhoek loh khat neh khat taengah, “Bethlehem la cet pawn sih lamtah olthang aka thoeng he so uh sih. Te tah Boeipa long ni mamih ham a phoe sak,” a ti uh.

¹⁶Te phoeiah, tatloe la cet uh tih Mary, Joseph neh khongduk dong ah aka yalh cahni te a hmuh uh.

¹⁷A hmuh uh vaengah, te camoe kawng neh amih taengah a thui olka te a doek uh.

¹⁸Amih taengah tudawn rhoek loh a thui te aka ya rhoek boeih tah a ngaihmang uh.

¹⁹Tedae Mary loh tekah olka te boeih a kuem tih a thinko ah a khing a mong.

²⁰Tudawn rhoek tah amih taengah a thui pah bangla boeih a hmuh uh. A yaak uh dongah te Pathen a thangpom uh tih a thangthen uh phoeiah bal uh.

²¹Hnin rhet cup coeng tih, camoe te yahvin a rhet vaengah tah a ming te Jesuh a sui. Te tah bung khuikah a yom hlanah puencawn kah a sui pah coeng ni.

²²Moses kah olkhueng bangla amih kah imcim khohnin te a pha vaengah Jesuh te Boeipa taengah nawn ham Jerusalem la a khuen rhoi.

²³Boeipa kah olkhueng dongah a daek bangla bung aka va tongpa a boeih tah Boeipa ham cimcaih la a khue ni.

²⁴Te dongah Boeipa kah olkhueng dongah, “Vahu phiknit mai khaw, vahui ca panit mai khaw,” a ti bangla hmueih te a paek rhoi.

²⁵Te vaengah hlang pakhat, a ming ah Simeon te Jerusalem ah khoem om. Tekah hlang tah dueng tih cuep. Te dongah Israel kah thaphohnah te a lamtawn tih Mueihla Cim loh anih a om thil.

²⁶Mueihla Cim loh anih taengah, “Boeipa kah Khrih te a hmuh hlan atah dueknah na hmu mahpawh, “tila a mangthui tangtae te om.

²⁷Simeon te mueihla loh bawkim khuila a pawk puei. Te vaengah camoe Jesuh amah te olkhueng kah khosing la saii ham a manu napa loh a khuen.

²⁸Te phoeiah Simeon loh a kut dongah a doe tih Pathen te a uem.

²⁹Te vaengah, “Boeikung na sal he na olthui bangla ngaimongnah neh nan hlah coeng.

³⁰Namah kah khangnah te ka mik loh a hmuh coeng.

³¹Te ni pilnam tom kah mikhmuh ah na tawn pah.

³²Vangnah he namtom a pumphoenah la, thangpomnah te na pilnam Israel hamla om coeng,” a ti.

³³Camoe kawng a thui soah a napa neh a manu tah a ngaihmang rhoi.

³⁴Simeon loh amih te yoethen a paek tih a manu Mary taeng ah, “Anih he Israel khuiah a yet kah a bungnah neh thohkoepnah ham neh boekoek miknoek la a khueh coeng he.

³⁵Namah neh namah khaw na hinglu thunglang loh n'rhaih ni. Te daengah ni thinko kah poeknah te poeng a pumphoe eh,” a ti nah.

³⁶Te vaengah Asher koca kah Phanuel canu tonghmanu Anna om tih a kum khaw muep patong coeng. Anih he a hula lamloh a va neh kum rhih bueng hing rhoi.

³⁷Te phoeiah kum sawmrhet kum li hil nuhmai la om. Anih tah bawkim te hlah tlaih kolla khoyin khothaih yaehnah neh, rhenbihnah neh tho a thueng.

³⁸Pathen uem tue a pai kuelhuelh vaengah Jerusalem kah tlannah aka lamtawn rhoek boeih ham camoe kawng te a thui pah.

³⁹Boeipa kah olkhueng bangla boeih a soep vaengah te amah kho Galilee, Nazareth la bal rhoi.

⁴⁰Camoe tah a rhoeng vaengah rhaang tih cueihnah neh bae. Pathen kah lungvatnah long khaw a om thil.