Luk 18:20-35

²⁰Məŋcərɛ mosom ma Kanu: Ta məsumpər dalakɔ; ta mədif fum; ta məkiyɛ; ta məbaŋɛ fum yem disrɛ; məleləs akombəra am- papa kam kɔ iya kam.»

²¹«Iŋcəmɛ mamɔkɔ fəp darəŋ kəyɛfɛ ntɛ inafɛtɛ mɔ,» fum wəkakɔ pəc-loku.

²²Ntɛ Yesu ene kɔ dim mɔ, k’oloku kɔ: «Awa tes tin tobut’əm: Məcaməs daka dam, məyer pəsam papɔkɔ atɔyɔ daka, məndekɔ-sɔtɔ daka dɔpɔŋ nde dareŋc. Kɔ tɛyɛfɛ dənda-ɛ, məder məcɛps’em darəŋ.»

²³Ntɛ fum nwɛ ene moloku ma Yesu mɔ, kɔ abɔc ŋɛmbɛrɛ kɔ, bawo ɛnayɔ daka dɛlarəm.

²⁴Ntɛ Yesu ɛnəŋk kɔ abɔc ŋɛmbɛrɛ kɔ mɔ, k’oloku: «Pəŋcuca aka daka kəbɛrɛ ka dɛbɛ da Kanu dəntɔf.

²⁵Pəfəfərɛnɛ yɔkɔmɛ kəbɛrɛ ka abi ŋa tɛsɛmbɛ pətas wəka daka kəbɛrɛ ka dɛbɛ da Kanu dəntɔf.»

²⁶Aŋɛ ŋaŋc-cəŋkəl Yesu mɔ ŋayif kɔ: «Anɔ antam oŋ kəyac-ɛ?»

²⁷Kɔ Yesu oloku ŋa: «Ntɛ tɛntambər afum mɔ, Kanu kəntam ti.»

²⁸Kɔ Piyɛr oloku: «Səna səsak daka dosu kɔ səŋcəm’am darəŋ.»

²⁹K’oloku ŋa: «Awa! Ic-loku nu kaŋce: Fum eyi fɛ, nwɛ ɛŋsak kəlɔ kɔn, wəran kɔn, wɛŋc, akomɛnɛ ɔn, kɔ awut ɔn teta dɛbɛ da Kanu,

³⁰ta wəkayi ɔŋkɔsɔtɔ pəlarəm doru dandɛ, kɔ dekiriŋ nde aŋkɔyi wəyeŋ katina mɔ.»

³¹Kɔ Yesu ɛlɛk Asom ɔn wəco kɔ mɛrəŋ, k’oloku ŋa: «Yerusalɛm andepɛ. Mes mmɛ adəŋk a Kanu ŋanacicəs teta Wan ka fum mɔ fəp, mendekɔ-yi.

³²Bawo andekɔ-bɛr kɔ atɔyɔnɛ Suyif dəwaca; andekɔ-fani kɔ, andekɔ-tɔrəs kɔ, andekɔ-yuksər kɔ lin,

³³andekɔ-sutɛ kɔ tɔrɔŋkɔn, a padedif kɔ. Tataka ta maas ta defi dɔn, pəyɛfɛ afi dacɔ.»

³⁴Mba Asom ɔn ŋanane fɛ ti tɔlɔm o tɔlɔm. Ŋanacərɛ fɛ ntɛ tatɔkɔ toloku mɔ.

³⁵Ntɛ ŋayi kəlɔtərnɛ Yeriko mɔ, tɛtəŋnɛ wətɔnəŋk wəlɔma pəndɛ dɔpɔ kəsək pəc-tola.