Luk 12:16-55

¹⁶Kɔ Yesu oloku ŋa capafɔ cəlɔma: «Fum wəka daka wəlɔma ɛnayɔ ntɔf nyɛ yeŋc-tesɛ yɔbɔf mɔ.

¹⁷Pəc-cɛm-cɛmnɛ, pəc-yifnɛ: ‹Cəke cɔ indeyɔ-ɛ? Bawo iyɔ fɛ kəfo nkɛ iŋkɔ-loŋka yɛtɛl yem fəp mɔ.›

¹⁸Kɔ fum nwɛ olokunɛ, ‹Ntɛ tɔ indeyɔ: Kəwɔkəc kɔ iŋkɔ cɛlɛ cem, isɛl ncɛ cəmbɛk mɔ, iloŋka ci disrɛ malɔ kɔ ca yem yɔlɔma.

¹⁹Kɔ tɛyɛfɛ dənda-ɛ, ilokunɛ dɛbəkəc: «Iyɔ daka dɛlarəm dɛmɛŋkərnɛ meren mɛlarəm; iŋesəm oŋ, idi, imun iwoləs.»›

²⁰Mba kɔ Kanu kəloku kɔ: ‹Məna Wəbəc, Wətɔcərɛ tes! Pibi pa mɔkɔ yati pɔ andewer’əm kiyi kam doru; tɔkɔ məlompəs mɔ, anɔ ɔ məndesakərɛ ti-ɛ?›»

²¹Kɔ Yesu ɔnɔcər: «Itɔ pəyi fum nwɛ endeloŋka daka dɔn, a ta Kanu kəŋnəŋk kəyɔ kɔn daka mɔ-ɛ.»

²²Kɔ Yesu oloku acɛpsɛ ɔn darəŋ: «Itɔ ɔsɔŋɛ ntɛ ilok’un: Ta nəcɛm-cɛmnɛ teta doru donu—ake nəndedi-ɛ. Ta nəcɛm-cɛmnɛ sɔ teta dis donu—ake nəndebɛrnɛ-ɛ.

²³Bawo kəyi doru kəŋcepər yeri, kɔ dis deŋcepər yamos.

²⁴Nəkɔkcɛ bɛmp ya ser: Yɔfɔbɔf, yɔfɔtɛl, yɔfɔmɛŋkərnɛ, yɔyɔ fɛ cɛlɛ, mba Kanu kəŋsɔŋ yi yeri. Nəna nəŋcepər bɛmp yayɔkɔ pəbɔlɛ!

²⁵Anɔ ɔ kəcɛm-cɛmnɛ kɔn kəntam kəbɛrɛnɛ kururu katin gboŋ kəwon kɔn doru-ɛ?

²⁶Kɔ pəyɔnɛ a nəfɔtam ali tes tɛfɛt-ɛ, ake nəŋkɔcɛm-cɛmnɛnɛ tɔkɔ tɛŋcəmɛ mɔ?

²⁷Nəgbətənɛ ntɛ yɛlɛŋk ya dalɛ yompoŋ mɔ: Yɔfɔbəc, yɔfɔdu yamos, mba ic-lok’un, ali wəbɛ Sulemany kɔ daka da debeki dɔn, ɛnayɔ fɛ yamos nyɛ yɛnatesɛ pəmɔ pɛlɛŋk papɔkɔ pin mɔ.

²⁸Yika yeyi mɔkɔ dalɛ, alna pac-ləm yi dənɛŋc, mba Kanu kəŋsɔŋɛ pəmar yi. Nəna, aŋɛ kəlaŋ konu kəmpicɛ mɔ, nəntam kəlaŋ tes tin: Pipicɛ oŋ cəke o cəke, itɔ Kanu kəndeyɔn’on!

²⁹Kɔ nəna, ta nətɔrəsnɛ kəcɛm-cɛmnɛ teta yeri yɔkɔ nənde nəc-di mɔ, ta nəcɛm-cɛmnɛ teta yomunəs yɔkɔ nənde nəc-munəs mɔ.

³⁰Bawo acuru a doru dandɛ ŋaŋcɛm-cɛmnɛ teta ca yayɔkɔ. Kɔ nəna, Papa konu ɛŋcərɛ a nəfaŋ yi.

³¹Nətɛn dɛbɛ da Kanu; nkɔn Kanu endesɔŋ’un yɛləpəs yɔkɔ.»

³²«Ta mənesɛ, Atəkəs’em darəŋ! Bawo pəmbɔt Papa konu kəsɔŋ konu daka da dɛbɛ dɔn fəp.

³³Nəcaməs daka donu, nəpocɛ kəway kaŋkɔ atɔyɔ daka. Ntɛ tɔŋsɔŋɛ nəmɛŋkərnɛ daka da alna ndena Kanu mɔ. Daka da ndena Kanu dɔfɔlip! Dəndo wəke eyi fɛ nwɛ ɔŋlɔtərnɛ di mɔ; ate ŋeyi fɛ nŋɛ ŋɔŋsɔm di mɔ.

³⁴Bawo da daka donu deŋyi mɔ, difɔ abəkəc ŋonu ŋeŋyi.»

³⁵«Nəgbəŋcnɛ səbɛlɛt dəfi, nəmot səlamp sonu, nəcəmɛ bel-bel!

³⁶Nəyi pəmɔ abum aŋɛ ŋandekar wəbɛ kəŋan kəder kəyɛfɛ dəŋgbaŋnɛ mɔ, ntɛ tɔŋsɔŋɛ wəkakɔ ɔŋc-kɔna-der pəsut-sut kumba, ŋa ŋagbitɛ kɔ ki katəna mɔ.

³⁷Pəbɔt acar akakɔ wəbɛ kəŋan, ɔŋc-kɔna-der pəbəp kɔ pəc-kar kəgbitɛ kɔ mɔ. Amina! Ic-lok’un ti: Endegbəŋcnɛ bɛlɛt, pədəs acar akakɔ dəmɛsa kəkɔ-di yeri, nkɔn pəyerəs ŋa yi.

³⁸Ali pəyɔnɛ fɔ cɛk-cɛk cɔ ender, kɔ pəyɔnɛ fɛ ti-ɛ dɔsɔka, mba k’ɛmbəp ŋa ta ŋandirɛ-ɛ, pəbɔt ŋa!»

³⁹«Nəcərɛ bel-bel a kɔ wəbɛ wəka kəlɔ ɛŋcərɛ tɛm ntɛ wəke ender mɔ-ɛ, ɔfɔsak kɔ pəwɔkəc kəlɔ kɔn.

⁴⁰Nəna sɔ, nəcəmɛ bel-bel! Bawo Wan ka fum endeder tɛm ntɛ nəntɔyɔ kɔ amera mɔ.»

⁴¹Kɔ Piyɛr eyif Yesu: «Wəbɛ, səna gbəcərəm ŋɔ məŋloku capafɔ caŋcɛ, ka fəp fɔ məŋloku ti ba?»

⁴²Kɔ Wəbɛ oloku: «Wəcəmbər-cəmbər daka wəre olomp, pəsɔk domp-ɛ? Nkɔn ɔyɔnɛ nwɛ wəbɛ oŋloku: ‹Isɔŋ’əm yɛbəc nyɛ: Məc-sɔŋ yeri afum aŋɛ ŋayi kəbəc’em mɔ, tɛm ntɛ pəmar mɔ.›

⁴³Pəbɔt wəcar wəkakɔ wəbɛ kɔn oŋlukus pəbəpɛ kɔ yɛbəc yayɔkɔ mɔ!

⁴⁴Ilok’un ti, kaŋce kɔ: Nkɔn ɔ wəbɛ kɔn ɔŋsɔŋ yɛbəc ya kəcəmbər-cəmbər ka daka dɔn fəp!

⁴⁵Mba kɔ wəcar olokunɛ dɛbəkəc: ‹Wəbɛ kem ɛntayɛfɛ fɛ kəder,› pəyɛfɛ kəsut ka amarəs arkun kɔ aran-ɛ, pəc-di, pəc-mun haŋ pəcis-ɛ,

⁴⁶wəbɛ ka wəcar kakɔ endeder dɔsɔk ndɛ ɔntɔyɔ kɔ amera mɔ, dec ndɛ ɔntɔcərɛ mɔ, tɛm tatɔkɔ ɛmbɛləs wəcar wəkakɔ, pəsɔŋ kɔ kəway nkɛ pəmar pasɔŋ acar atɔnenɛ wəbɛ kəŋan mɔ.

⁴⁷Wəcar nwɛ ɛŋcərɛ tɛfaŋ ta wəbɛ kɔn mɔ, ta olompəsnɛnɛ kɔ mɔ, ta ɔŋyɔ tɔkɔ wəbɛ kɔn ɛfaŋ mɔ, aŋsut wəcar wəkakɔ kəsut kəpɔŋ.

⁴⁸Mba wəcar nwɛ ɔntɔcərɛ tɛfaŋ ta wəbɛ kɔn mɔ, pəciya-ciya kəlompəs mɔ, wəcar wəkakɔ pəpic pɔ aŋsut kɔ. K’anasɔŋ fum pəlarəm-ɛ, pəlarəm pɔ aŋwer kɔ. K’anasɔŋ kɔ kəmɛŋk pəlarəm-ɛ, aŋnaŋkanɛ kəwer kɔ pəlarəm.»

⁴⁹«Nɛŋc d’ inder kəbɛr doru, k’ifaŋɛ di kəmar!

⁵⁰Pəmar isɔtɔ kəgbət dəromun, kɔ kəŋwon’im kəyi.

⁵¹Nəŋcɛm-cɛmnɛ a pəforu pɔ iŋkɛrɛ kəsɔŋ doru ba? Ala de, mba kəgbɛy k’iŋkɛrɛ.

⁵²Kəyɛfɛ oŋ tantɛ aŋɛ o aŋɛ ŋayi kəcamət kəlɔ disrɛ, ŋandegbɛyɛnɛ akɔ ŋayi maas akɔ ŋayi mɛrəŋ.

⁵³Kas kəgbɛy wan wərkun, wan wərkun pəgbɛy kas; kɛrɛ kəgbɛy wan wəran, wan wəran pəgbɛy kɛrɛ; kɔŋcəra kəgbɛy wəran ka wan kɔn, wan-sɔ pəgbɛy kɔŋcəra.»

⁵⁴Kɔ Yesu oloku sɔ kənay: «Kɔ nənəŋk kəp kəgbəpərnɛ ntende dec dɛŋkalɛ mɔ, nəŋkulɛ katina: ‹Kəder kɔ wəcafən endeder!› Pəfɔ-won wəcafən pəder.

⁵⁵Mba kɔ nənəŋk afef ŋa kəca kətɔt ŋoc-wur-ɛ, nəloku: ‹Kəwonɛ kɔ pənder,› tɔkɔ nəŋloku ti mɔ, itɔ teŋyi.