Luka 12:16-55

¹⁶Iŋuc murâ dâŋ herâricne moc ʒiŋuc jazawec: “Ŋicbomboŋ moc e kise mâriri sâko fuacnewec.

¹⁷Eme maŋticnezi ʒiŋuc muwec: ‘Wenac epemu? Kise fârine sâko fic wena guruckepe?’

¹⁸Iŋuc murâ muwec: ‘Miŋecne manakopac, no kisefic heropierâ ɋâricne bâsokarâ barâ kise mâriri‐nane hepe ŋeocmu.

¹⁹Erâ maŋnanezi ʒiŋuc mupemu: No mâriri sâko fonarekacte ŋemac qamanahuc dameŋ ʒora aŋacnuha nâhuc juzepac.’

²⁰Iŋuc mume Anutuzi ʒiŋuc âzâcnewec: ‘Mutuc go, ŋafe ʒi jaha jujuge gowac rozo. Eme wiac râe qâzuc emeŋ i more eocmu?’

²¹Moc e Anuturaonec maŋ mâriri mi focneha e jahacne biŋe nânâ mafa hure hemârec eocmu, e sâc ijaha fuacneocmu.”

²²Erâ motecfâcne ʒiŋuc jazawec: “Irec hâcne ŋazakopac, ŋoŋe juju‐ŋeŋicte mana mezac ehuc ʒiŋuc mi munʒepieŋ: ‘Wemo wiac ba nâc enaŋmu?’ Me sahac‐ŋeŋicte mu heŋɋâŋ ehuc ʒiŋuc mi munʒepieŋ: ‘Wemo wiac rojunaŋmu?’

²³Nânâzi fârine mâcne, juju‐ŋeŋiczi fârine, â ŋaqi qoruczi fârine mâcne, sahac‐ŋeŋiczi fârine.

²⁴Ŋoŋe kâec kâec honecjopaniŋ, jaŋe he sarac mi eeŋgopieŋ â nâ rowaŋ â nâ ukic mi eeŋgopieŋ. Eme Anutuzi sifu nânâ bâfua‐jareekac. Ŋoŋe ine wipe mâcne, ŋone ŋic.

²⁵Me tâpiri‐ŋeŋic moc fokacko mu waiʒoc ehuc juju dameŋ‐ŋeŋic sâcne moc bâʒoraniŋmu me?

²⁶Ŋoŋe wiac piticne iŋucnere eipierâ wemocte wiac gâcne sâkore mana mezac boc eeŋgopieŋ?

²⁷Ŋoŋe firindoac honeniŋ, e ŋaqi qoruc‐ticnere gie mi baekac, erâ mupe mananiŋ, Salomo e eri qaraweŋ‐ticneheczi hawari biaŋ iŋucne mi rojuwec.

²⁸Eme kâteo âri wiac dodocne, miŋecgac iŋucne fuaekac, â tomâcko iŋucne mârâŋkeekac, i Anutuzi sifu mume hawari biaŋ fuaekac, ehuc ŋoŋere ŋaqi qoruc mi bâfuaocmu muŋgopieŋ, mamanasiŋ gogoroŋ ŋoŋe!

²⁹Irec ŋoŋe maŋbahac‐ŋopame ʒiŋuc boc mi munʒepieŋ: ‘Wemo wiac ba nâc enaŋmu?’

³⁰I qâpuc mâreŋ sâc jaŋe maŋ mamanasu‐jeŋic ira duckepie foekac. Ŋoŋe wiac i tâmiric sâcne mi juniŋmu, i Mamac‐ŋeŋiczi manakac.

³¹Ŋoŋe ine ere uucmaŋ fua tâcneocte maŋŋeŋic râepie domazejec, eme fainao wiac jabane i wâc fua‐ŋareocmu.

³²Guru pitic ŋoŋe hâwicmâc junʒepieŋ, Mamac‐ŋeŋic e uucmaŋ izi ɋoroc‐ŋopaocte maname sâckewec.

³³Ŋoŋe wiac foŋarekac i hapetac qikiŋne‐jarenʒepieŋ, erâ moneŋ kânoŋ sucketâc tâmiric bâfuanʒepieŋ, erâ sambâŋko boreŋ ʒeŋaŋ fofo hati hurenʒepieŋ. Ira ŋiczi fiuc mi roŋareniŋmu â wâfuzi mi sipiricke‐ŋareocmu.

³⁴Ʒeŋaŋ‐ŋeŋic foocmu ijaha maŋŋeŋic foocmu.

³⁵“Ŋoŋe kambaŋ‐ŋeŋic qarâ lambe‐ŋeŋic qazepie ʒazejec.

³⁶Ehuc kiŋaŋ motec jaŋe ŋicwofuŋ‐jeŋiczi mâreŋ ʒorickonec risierâ motâcko heickeme biac rocneniŋte woŋec juniŋmu jaŋe iŋucne enʒepieŋ.

³⁷Ŋicwofuŋ e risierâ kiŋaŋ motec maŋɋari juhapie bâfuac‐joparâ jaŋere maname biaŋkeocmu. No jâmbomac ŋazape: E gie qoruc‐ticne jomarâ nânâ teboo râec‐joparâ nânâ gumec‐jopaocte kiŋaŋ qajareocmu.

³⁸Me ŋafe ʒâʒâŋiŋko me ŋafe furec hehec‐jekicko risierâ maŋɋâri juhapie bâfuac‐jopaocmu ine biaŋke‐jâmbâŋkeocmu.

³⁹Ŋoŋe fuŋne ʒiŋuc mananiŋ, hae moc irec ŋic jaŋe râsi ŋafe ira fisiniŋmu, dameŋ iŋuc manarâ maŋɋâri jaha juhuc hae‐jeŋic soŋaŋkeniŋmu.

⁴⁰Eme Ŋic Fâri Wâtuŋne e iŋuc jaha mi manasuniŋmu dameŋ ira fisiocmure ʒawierâ junʒepieŋ.”

⁴¹Jesu e dâŋ iŋuc mume Petorozi wiocnerâ muwec: “Wofuŋ go kesaic dâŋ ʒi bucnâŋecte me mâmâc sâko‐nâŋecte mukomec?”

⁴²Wiome Wofuŋzi dâŋ moc ʒiŋuc ʒuhuckerâ muwec: “Ŋicbomboŋ moczi kiŋaŋ qaqafâc‐ticne jaŋere soŋaŋ moc râehuc ʒiŋuc âzâcneocmu: ‘No ra juhape go soŋaŋ‐jopahuc dameŋkoa nânâ qowi sâcjeŋic jarehuc juzemec.’ Eme e weniŋuc jume soŋaŋ maŋhec â micrereŋhec mucnezo?

⁴³Soŋaŋ e gie mucnekicne i aijaki jaha bahuc juhame bomboŋ‐ticnezi fisiocmu, soŋaŋ iŋucnere manape ʒerine ekac.

⁴⁴No jâmbomac mupe mananiŋ: E ŋic i soŋaŋ kâcɋene râehuc wiac‐ticne mâmâc sasawa soŋaŋkeocte mucneocmu.

⁴⁵Me ŋic e soŋaŋ sâqocne juhuctecne maŋnezi ʒiŋuc muocmu: ‘Bomboŋ‐nane e jâpec mâcne, juku jaha risiezokac.’ Iŋuc muhuc kiŋaŋ qaqa qa imac ejareocmu, â qâoma erâ wiac kosa ehuc juocmu.

⁴⁶Ehuc ŋicbomboŋ‐ticne risieocmu dameŋ irec mi mamanasu nâme nikec juocmu, ine ŋicbomboŋ e ututuŋ fisirâ hetâc qâtâcnerâ miti bâbâsifuc ŋic jaŋere jujuo râeocmu.

⁴⁷Kiŋaŋ motec moc e bomboŋ‐ticnere micdâŋ mana‐hâmo‐bipiehuc qaqatara bâfuaocmu, e ʒika ŋemâcne kiocmu,

⁴⁸â moc e bomboŋ‐ticnere micdâŋ kâuc bahuc qaqatara bâfuaocmu, e ʒika afecne kiocmu. Moc e wiac ŋemâcne râcne tahac ecnekicnezi fârine ŋemâcne jaha bâfuame sâckeocmu. Â moc e gie kâcɋene mucnekicnezi ɋicwânʒâŋ kâcɋene jaha bâfuame sâckeocmu.

⁴⁹“No mâreŋko ʒoc ruqepe ʒaocte wahapo. Erâ i biac bâruŋ‐keocte bunane âeckeekac.

⁵⁰No opâ moc ruapemurâ munarekicne, eme i epe taraocte maŋnanezi ʒoʒoc fificne afecne mi enareekac.

⁵¹Ŋoŋe nore ʒiŋuc mi munʒepieŋ: ‘E wama bâfuaocte wahawec.’ Aricne, no fâfâuc bâfuazore wahapo.

⁵²Irec ʒiŋuczia fuŋkerâ kecʒiŋuc fua raocmu: Fic moc irec ŋic 5 jaŋe fâuckerâ hehewic eniŋmu, ŋifec 2 â ŋifec 3.

⁵³Erâ mame ŋokâ jahe fâuckerâ hehewic enicmu â neŋgoc otâ jahe fâuckerâ hehewic enicmu â jojoŋaozi fâuckerâ hehewic enicmu.”

⁵⁴Iŋuc murâ ŋic ŋokac mâmâc sâko‐jeŋic ʒiŋuc jazawe: “Ŋoŋe mâreŋ âke gâpâreme honerâ izia mueŋgopieŋ, ‘Hoe warekac.’ Muhapie iŋuc eekac.

⁵⁵Mâreŋ emasaŋkeme honerâ mueŋgopieŋ, ‘Ʒoaŋ qaocmu.’ Muhapie iŋuc eekac.