Luk 12:16-55

¹⁶Ano Jises asehek sahou sokek ari doh, i ndranye oro: “Bilin ta ndramak ari tan lakou solo-an badeh, ato-ou sali iri badeh, solo-an.

¹⁷Eme iy lomondra anya, ‘Idah kameh, barala buku sah bah? Jo ari kon ta adeu iri nyamon tek marakon ki aliy bwai.’

¹⁸“Ano iy anya, ‘Jo kamekes ki buku sah bah? Sebwe jo badeh, kamekes ki buku doh: Jo katokosei asiu ta nyamon ki-iu, ya jo katahiy ki tinan ja. Idoh kameh, winiya iri nyamon hawe iri lakou tek mwasin mari i bolon ai.’

¹⁹Ano iy le asehek nyalan anya, ‘Jo badeh, lakou tek solo-an labai, winiyan udu andrei jaha solo-an. Idah kameh, mesekei jo sekesek ma a-un gwa, tasah manyah tek ndramwenen kabwe.’

²⁰“Arile, Kindrei tiye i tan anya, ‘Balem bwe, na ben dah kameh ou amak; ya lakou tam mari doh kameh ki tare bah?’

²¹“Lakou i buku doh kameh asahan i tare lau, i buku iy anya katukum lakou sola sola badu munyak; arile ta mada Kindrei badeh, lakou doh, bala mwasin ta madan bwe.”

²²Ano Jises tiye i toro lau tan: “Ado sabwerei ta manyah tado, saba lakou kameh ado aimon, ma ta bada ado ale, saba lakou kameh ado kataliye.

²³Koha ado sakalawi nyamon, ma bada ado sakalawi kalawi ado ale.

²⁴Ado kanone kanyolom iri sirih se: Iri batah nyamon bwe, ma iri babwe-eh nyamon bwe. Ma hawe iri ari asiu ta asumwe nyamon bwe, arile Kindrei le badeh, anyohan iri. Udu budon ta Kindrei ja badeh, iy kameh atondrok ado udu mwasin labai ja tiri sirih!

²⁵Buku ado abwerei ta iri lakou doh, idah kameh winiyan edeu ari len ja ili hawe len ta manyah tado, ta ado luluwen deh? Bwe!

²⁶I buku none ado winiyan bamesekei lakou nadu bwisik doh bwe, ya i buku sah ado abwerei ta lakou mari?

²⁷“Ado kanone kanyolom iri kanyeu ateh se. Ya iri babo gok bwe, ma iri bamekes kalawi iri bwe. Arile, jo katiye tado, bwena mene kabin Solomon asini iri awin tan mwasin mara-ei handru ano, arile nyasou tiri kanyeu ja sakalawi nyasou ta kabin Solomon.

²⁸Idah Kindrei edeu nyasou ma awin ili tiri bwidiu badu lokei, iri bwidiu ado na len dah, ano na len bi-i akeh iri au ala bolo jih ta asun iu. I buku sah, sebwe Kindrei winiyan badeu kolau ma awin bawek tado bwe nadeh? Budon tado handru tinan bwe?

²⁹Ya ado sabudon sandra-i ta saba nyamon kameh ado kaimon, hawe sabwerei ta saba gwa kameh ado ka-un, ndri-iy.

³⁰Tasah, iri lau badu kon munyak tinan mara-ei aseken ma asilah iri lakou doh. Ado sala buku iri, tasah tama ado Kindrei iy tanan saba lakou ado aseken.

³¹Arile, ado kanyolom bwena kili ta tondrok ta Kindrei op. Ano ya iri lakou doh Kindrei kameh edeu ewek tado.

³²“Ado marakou sanoh! Tama ado Kindrei badeh, sekesek tado labai, eme ado kameh atondrok lakou hawen.

³³Eme lakou tado mari badeh, kasihinei ki-iu ta luk ya luk ta aliy badeh, ado kadeu ki tiri lau lakou bwe. Ado badeh, katakaleh tado kohei kohoya luk udu kandrah; lakou winiyan ta apus bwe, hawe winiyan ta amu-uk bwe, ma hawe iri lau ta bahana winiyan babene-ei bwe.

³⁴Tasah, i buku none ou tam lakou solo-an udu bolo munyak dah, kameh mesekei ou abudon solo-an ta aliy.

³⁵“Ado badeh, kanyasou, hawe kalokou ado, ma katelemei sun tado kudu le, koro-an lakou kasahan,

³⁶ki buku none iri lohowan abe-en ndramak ta kati asiu udu ta molak eme hamon. Ya i buku none iy eme asumon, oro kameh sulu-i kou asak tan.

³⁷Idah kameh, udu mwasin toro labai, tasah mada oro badeh, bamadin bwe, na len ndramak ta kati asiu asahan. Eme ya jo katiye tado kamwenen, idah kameh, iy asini awin ta lohowan tan, ano iy tiye oro manyah ado andri ano iy bwese nyamon i noro.

³⁸Ma idah kameh, mwasin labai i toro lohowan, i buku none ndramak ta asiu eme anyolom oro badeh, abe-en. I buku none iy eme na ndrukulu ben deh, na boho len badeh, oro ndra abe-en iy le.

³⁹“Arile, budon tado kaleu ta tanan doh: Buku none tama asiu i tanan saba mada an handru iri lau ta bahana kameh ame apou asiu tan, iy kameh atehei ndrokei, tasah iy winiyan bamukuni iri lau ame apou asiu tan bwe.

⁴⁰Ya, buku none ado ale, ado kalokou ado na len mari. Tasah, Nadu Ndramak Awas kameh asahan na len ado batehei budon ta iy eme bwe.”

⁴¹Eme Pita anya, “Laban, ou tiye sahou sokek badeh, eme tahi mari deh, bwe, eme taso lau tam le?”

⁴²Eme Jises tiye i hamon ja anya, “Are lau iy mwasin ta gok, ma iy budon mwasin? Iy don adeh, tinan tan kameh atehei iy ta atondrok iri lau tan ra-on ja an bahandran ta adeu niri nyamon na len ari, ari, iy le tanan.

⁴³Sekesek handru in bwele-e ndramak doh, buku none tinan tan eme takalahi iy amekes gok tan mwasin.

⁴⁴Jo tiye tado handru, tinan tan kameh atehei iy ta atondrok iri lakou tan mari.

⁴⁵Arile, buku none iy lau ta gok tan nane katiye anya, ‘Ndramak ta asiu doh kameh winiyan bame suwi bwe,’ ya iy kameh a-um iri lau mwan ma badih ta gok. Ano iy aimon nyamon aimon aimon, ano iy a-un gwa boto-on a-un a-un, ma iy ibo lolo-ou.

⁴⁶Ya, na len ari, tinan ta ndramak nane ta gok kameh eme hamon na len iy ndramak nane tanan bwe. Tinan tan kameh sani iy i lunah, ma mesekei iy akohok maha-an buku le iri lau ta tebelese mene.

⁴⁷“Ya ki buku none ari lohowan tanan lahou ta tinan tan, ya iy bamesekei bwe, idah kameh, iy bwese maha-an tinan labai.

⁴⁸Arile, i buku none ari lohowan bala tanan lahou ta tinan tan bwe, ya iy amekes lahou laleyah, idah kameh, adai iy udu, le udu. Ma i buku none are lau akohok lakou solo-an labai, badeh, iy kedeu solo-an ale, ki hamon; ma i buku none are lohowan katondrok lakou solo-an kudu bahan, iy badeh, kamekes lahou kirih le gwek.

⁴⁹“Jo eme dah badeh, ta asun kon munyak. Ki jo aseken handru mene badeh, jih ndranya!

⁵⁰Arile, jo kameh ilih bolo isi udu mwena tek eme, eme ya jo aseken keme suwi ya lokohak!

⁵¹Ado anya jo eme munyak dah, ta amekes mondrei? Bwe! Jo katiye tado kamwenen, jo eme kameh ta apou lau.

⁵²Na dah kameh, oro limeh badu boho kamen ra-em le, arile idah kameh apou oro, taloh a bilisiu ya la-uh a bilisiu ma oro andra-i.

⁵³Idah kameh, oro apou oro, taman kameh andres i la-u nadun mwan, ma nadun ale kameh andres i la-u taman. Ya tinen kameh andres i la-u nadun badih, ma nadun badih ale kameh andres i la-u tinen. Ya salahun uru kayon kameh andres uru, i le buku aliy.”

⁵⁴Eme Jises tiye i tiri anya, “I buku none ado atou kon abakak udu loboho an i andri, idah kameh, ado tanan, ur kameh eme. Ma idah kameh asahan handru.

⁵⁵Ya, i buku none ado atou jor lan atohou badeh, ado tanan, idah kameh lolan. Ma idah kameh asahan handru.