Luk 11:24-44

²⁴“Buku none ari ndramak tikahei malawi ndra-in ereu la-u ari ndramak iu, malawi ndra-in doh iu laleyah i bolo kon lomale an ta iy katakaleh ari kon ja, iy kili aliy. Eme, buku iy batou ari kon mwasin ta iy ili aliy bwe,

²⁵iy kameh asehek, ‘Jo ndrawoyah ai, sebwe jo kili hamon kili asiu tek bwena mene jo ereu aliy.’ Eme iy ili hamon anyolom asiu nane ereu laleyah, ndrasahan ha-un, ma ndranyosowani kabwe.

²⁶Ehe, iy atou buku doh, eme iy ili hamon ja andrei oro malawi ndra-in ndro taloh ja sakalawi iy ta amekes kandriyen ndra-in. Ya oro kameh ala bolo asiu nane. Ya eme ndramak dah, bala buku bwena mene ja bwai, iy ndrandra-i labai ai.”

²⁷Eme Jises asehek sahou kahis le badeh, udu bolo iri lau mari nane dah, badih tasou ari aloh, “Sekesek handru labai i tare badih atehei ou, ma hawe nyohonei ou badeh.”

²⁸Arile, Jises tiye ja i buku doh, “Sekesek badeh, ki toro are lau anuhun sahou ta Kindrei, ma an hamon ta aliy.”

²⁹Eme lau ame a sola badeh, Jises tiye i tiri anya, “Iri lau mwan ma badih ta len dah badeh, iri ndra-in handru. Iri ndremenya ta anya katou kalem, arile winiyan bwai, kalem ari le kameh iri atou, kalem ta Jona.

³⁰Jona badeh, i nyara kalem ta lau badu Ninibe na len bwena mene, ya jo Nadu Ndramak Awas ale, i nyara kalem ta lau na len dah.

³¹Na len hamon ta Kindrei kameh atehei iri lau mari badu kon munyak dah ala ta mada sahou, badih tinan kabin badu kon tinan Seba, kon tan in loboho kum, kameh ales ereu ta mada sahou, iy kameh asehek ma nyowonya iri kandriyen ndra-in taha lau ta len hamon dah amekes. Tasah, iy badih kabin doh ereu len labai ta Isra-el, arile iy eme ta anuhun le kabin Solomon leheya iri tanan mwasin tan. Na dah, ndramak ari ereu ndrokowa ado, iy sakalawi ja Solomon, arile ado banuhun sahou, ma batubuni ndrine ado bwe.

³²Na len Kindrei le tanan ta edeu iri lau ala ta mada sahou, iri lau mwan ma badih badu Ninibe ale kameh ales ala ta mada sahou, ma iri kameh asehek sahou boto-on labai i taha lau ta len hamon dah. Tasah, iri lau badu Ninibe anuhun sahou Jona asehek, ma iri tubuni ndrine iri. Na idah, ndramak ari ereu ndrokowa ado dah, sakalawi ja Jona, arile ado banuhun sahou tan, ma batubuni ndrine ado bwe!

³³“I buku none ari ndramak iy katelemei sun, iy winiyan batehei bala kon korohan bwe, ma hawe iy winiyan batehei bado bahandra bwekei bwe; iy kameh atehei udu ndrahunen loken. Ya, i buku none are lau eme anyolom kameh, iy eme asiu.

³⁴Mada ado badeh, i buku lomada sun ta atelem bolo oda ado. Ya, i buku none mada ado udu mwasin, badeh kameh bolo ado mara-ei idih na lomadan. Arile, i buku none mada ado ndra-in, idah kameh bolo ado kameh ilik.

³⁵Eme ya mada ado kaleu ta sun udu bolo ado badeh, samak.

³⁶Ya, i buku none sun lomatani bolo ado mari, ya sese lulik aliy bwe, idah kameh lomadan telemei kon mari. I buku none sun anya badeh, lomatani ado mara-ei.”

³⁷Eme ya sahou ta Jises ano le bohon badeh, Parasi ari andrei Jises i hawen aimon nyamon. Eme Jises ili manyah udu andri aimon nyamon.

³⁸Eme ya iy anyolom Jises badeh, basikine minen bwe, ya iy aimon nyamon, eme ya iy lomondra solo-an labai.

³⁹Ano Jises tiye i tan anya, “Ado Parasi badeh, sikine kona bwesam ma kona bwekei tado le, arile bolo ado badeh, ndrarahak le ko-ak hawe manahun ndra-in.

⁴⁰Ado bale ado bwe! Ndramak mene amekes konan badeh, iy ale amekes bolon.

⁴¹Abo, i buku none ado anya kamekes kandriyen mwasin udu bolon ma konan badeh, ado kanyohan lakou udu bolo bwekei ki tiri lau tiri lakou bwe. Ma idoh kameh ado asahan mwasin.

⁴²“Ado Parasi, mada ado kaleu! Sisi-in laba tinan kameh ewek bwele-e ado! Ado badeh, apou la-ukei mint hawe la-ukei ruwe tado badeh, i ronoh, ronoh. Ano ado adeu ari ari badu bolo ronoh doh, i ta Kindrei. Ado ale, amekes i buku aliy i ta lakou mari badu bilin tado. Idoh mwasin, arile ado ndramani iri kandriyen ta tikisiy hawe kandriyen mwasin ta Kindrei. Sebwe mwasin ta ado ka-en hamon ta sahou batanau tinan ma ado samani iri sahou batanau bwisik nane ale.

⁴³“Ya ado Parasi, mada ado kaleu! Sisi-in laba tinan ale kameh ewek bwele-e ado! Tasah, ado badeh, aseken le ta manyah ado bada bwabwai mwasin udu ndrahu tukum taha Juwis. Ma hawe ado badeh, aseken lau le badeh, kasumon ado hawe kamasiye ado an bolo ba-en.

⁴⁴“Ado ndranuhun! Sisi-in laba tinan doh kameh ewek bwele-e ado! Nyolom ta bada ado badeh, mwasin. Arile bolo ado badeh, ndrandra-i labai, tasah ado badeh, mahu ado ndrala. I buku none iri lau adek ame badeh, banyolom mada lek bwe. Ya eme iri adek bwele-en ma bales balesani iri.”