Luku 11:24-44

²⁴Yesuma꞉ alota꞉ Hali ma꞉nda꞉na꞉ weleke pa꞉ta꞉ pila꞉ hoke temoko ma꞉nda꞉ hama opolu bao yapea꞉ka꞉na꞉ta꞉ mo hapula꞉ alena꞉ pomu lopolo hata꞉ hoto pita꞉peke da panda꞉ ma꞉nda꞉ weita꞉la꞉me. Hoto pita꞉peke ale ma꞉nda꞉ na handa꞉ wia꞉ka꞉na꞉ta꞉ kota꞉ mo hoke temokoma꞉ ipika꞉ kone alota꞉ Yaka hande mina꞉pa꞉lao epoa꞉ da nane paa la꞉ka꞉la polueke laa

²⁵ipikana꞉ma꞉ la꞉ka꞉la pua mo da a꞉pa handilia꞉pate ma꞉nda꞉ na hake wamo pea bao epeke tupa꞉ halia꞉eki handilieke.

²⁶Koto pa꞉leketa꞉ mo hoke temoko pua pa mandane watake hata꞉ hoke temokomanu paeyao hatuku milieke. Koto hoke temoko manuna꞉ hoke hau pita꞉la꞉ ekita꞉ mo ipiki make lu ankulalimikie. Iki paeyao mandake pa꞉ta꞉ a꞉pa halimikie. Kutu pimika꞉na꞉ta꞉ mo halita꞉ amba꞉ta꞉ hoke tupa꞉ hao pelia꞉pate ameta꞉ ota꞉ hoke tupa꞉ hao pelieke laa leekeme.

²⁷Yesuma꞉ koto pi lo paeyeketa꞉ mo wanda꞉hali anka꞉lopuna꞉ pitieke wanda꞉ ma꞉nda꞉ma꞉ anekema꞉ alota꞉ Neke ma꞉nda꞉la꞉ make andu ka꞉la꞉ wanda꞉ta꞉ ta꞉na꞉ma꞉ homolo pa꞉la꞉me leekeme.

²⁸Koto leeke Yesuma꞉ alota꞉ Dia꞉me. Koda꞉na꞉ pi opua pu haleme wanda꞉hali ikana꞉ma꞉ta꞉ ta꞉na꞉ma꞉ wotu homa꞉peke ya꞉la꞉me leekeme.

²⁹Wanda꞉hali wopuma꞉ Yesu a꞉pa momba꞉la hopa꞉liao haena꞉ Yesuma꞉ alota꞉ Ame do natena꞉ haleme wanda꞉halita꞉ hoke wanda꞉hali halememe. Ikana꞉ma꞉ta꞉ mo na handeke patehau ma꞉nda꞉ handuluekema꞉ I̱ pa꞉ta꞉ honke aleme pateta꞉ I̱ma꞉ta꞉ iki pa꞉ta꞉ ota꞉ ma꞉nda꞉siki make na walo polopate mo hande Dionama꞉ patehau piekeeki homeke handilimikie.

³⁰Mo hande potopede hali Dionama꞉ Ninipa wanda꞉hali pa꞉ta꞉ patehau pieke tupa꞉ kone mo Wanda꞉halina꞉ Eiyekema꞉ make ame wanda꞉hali pa꞉ta꞉ patehau pilieke.

³¹Mo hande pi yokaalu pulu pa꞉la꞉ nate opolo epea꞉ka꞉na꞉ta꞉ mo hande Siba da yu handeteke hala꞉ kuini wanda꞉ma꞉ tiao hata꞉ ame do natena꞉ haleme wanda꞉halina꞉ hoke hau manuna꞉ ma̱leke lilieke. Ekipeke mo wanda꞉ma꞉ta꞉ mo kini hali Solomonona꞉ epeke hone wotu u tekelepea wala꞉la꞉ pimanu opuluekema꞉ yeke mo kenke honiki ma꞉nda꞉ nane hao epeekeme. Kutu piekepate I̱ma꞉ iki pa꞉ta꞉ alome. Ameta꞉ Solomono ankulala꞉ ale ma꞉nda꞉ a꞉pa꞉la꞉me.

³²Mo hande pi yokaalu pulu pa꞉la꞉ nate opolo epea꞉ka꞉na꞉ta꞉ Ninipa wanda꞉halima꞉ tiao hata꞉ ika꞉ hoke hauna꞉ ma̱leke lilimikie. Ekipeke. Dionama꞉ pi waleeke dina꞉ta꞉ koto wanda꞉halima꞉ ika꞉ hoke hoke haumanu hoki walemekeme. Koto pa꞉la꞉ ekina꞉ I̱ma꞉ iki pa꞉ta꞉ alome. Ameta꞉ Diona ankulala꞉ ale ma꞉nda꞉ a꞉pa꞉la꞉me leekeme.

³³Ma꞉nda꞉ma꞉ ipika꞉ ola꞉pake ka꞉waata꞉ na a꞉mbao u hala꞉ o mo disi kawaso tieke oto pa꞉ta꞉ na wilieke. Koto hau na pikita꞉ mo da pa꞉ta꞉ wanda꞉hali a꞉pa honda꞉ pamba꞉tiki pitolo handena꞉ mo lamepa u hala꞉ alena꞉ u hala꞉me.

³⁴Naka꞉ leketa꞉ naka꞉ lokena꞉ ola꞉pakee. Naka꞉ leke a꞉nda꞉ ota꞉ epea꞉ka꞉na꞉ta꞉ kota꞉ naka꞉ loke paeyaota꞉ pa̱a̱ma꞉ tumbilieke. Koto pa꞉la꞉pate naka꞉ leke a꞉nda꞉ hoeya꞉ka꞉na꞉ta꞉ naka꞉ loke paeyaota꞉ timba꞉la꞉ pambilieke.

³⁵Koto ekina꞉ta꞉ mo naka꞉ lokena꞉ pa̱a̱ pa꞉la꞉ ekita꞉ timba꞉ na la꞉na꞉ leketa꞉ ota꞉ wopu handeteke hapeke

³⁶Kutupa naka꞉ loke paeyao a꞉nda꞉ pa̱a̱ma꞉ tumba hata꞉ pa timba꞉ timba꞉ homeke a꞉nda꞉ na lea꞉ka꞉na꞉ta꞉ kota꞉ ola꞉pake pa̱a̱ pita꞉la꞉ ma꞉nda꞉na꞉ naka꞉ loke paeyao pa̱a̱ pu kimalieke leekeme.

³⁷Yesuma꞉ pimanu lo paeyeketa꞉ Pa꞉tisi hali ma꞉nda꞉ma꞉ ne nolo pana꞉e leeke handa ipika꞉ da pa꞉ta꞉ honda꞉ pamba pua ne nolueke alo pitiekeme.

³⁸Mo hande Pa꞉tisi halima꞉ta꞉ Yesuma꞉ ne noluekema꞉ ipika꞉ kiki amba꞉la na tandepeekeeki hando haota꞉ pututuma꞉ homa tola꞉tia pomiekeme.

³⁹Kutu piekeeki handaata꞉ mo Teke Halima꞉ ipiki pa꞉ta꞉ alota꞉ Ameta꞉ kota꞉ iki Pa꞉tisi haliwekima꞉ta꞉ ika꞉ kapo make kawaso manuta꞉ manda homeke tandepo halemepate tukiki pa꞉ta꞉ta꞉ pasa꞉tei pita꞉la꞉ hau make hoke hoke hau paeyaoma꞉ iki tumba halememe.

⁴⁰Ikita꞉ hone na wiki haliwekio. Koda꞉ma꞉ hama nane wa꞉pa꞉la꞉ tupa꞉ tukiki nane make na wa꞉pa꞉la꞉pe.

⁴¹Koto ekina꞉ ika꞉ kapo make kawasomanu pa꞉ta꞉ ula꞉ ale manuta꞉ mo nate hali wanda꞉hali pa꞉ta꞉ pa hala꞉pa꞉peke. Kutu piki hau a꞉nda꞉ pimika꞉na꞉ta꞉ kota꞉ ika꞉eki paeyao ota꞉ hake wotu pilieke leekeme.

⁴²Pa꞉tisi haliwekio. Ika꞉ hoke yenki tiekena꞉ I̱ paala꞉e. Ikana꞉ma꞉ta꞉ ika꞉ hande ena꞉ hala꞉ ale tekia꞉ o totopo piki tanima꞉ handeke ale sunuta꞉ kiki yaapo telipata꞉ putupa homeke sikita꞉ Koda꞉ pa꞉ta꞉ halo halemepate mo Koda꞉ teke pa꞉ta꞉ta꞉ puki hala꞉pekeeki make epeke tikitiki piki hau manuta꞉ hone yonka꞉lalememe. Dupiki hau manuta꞉ ota꞉ pea꞉tiki pitolo hata꞉ mo mandaneeki make na mina꞉pa꞉lapeke.

⁴³Pa꞉tisi haliwekio ika꞉ hoke yenki tiekena꞉ I̱ paala꞉e. Ikana꞉ma꞉ta꞉ oni yeni pu hala꞉ da pa꞉ta꞉ mo you haliwekina꞉ wiala꞉ sea manuna꞉ pituluekema꞉ hone wotu u haleme make oni makedi hama haleme wanda꞉halima꞉ ika꞉ biki miniliaaso Epeke daka꞉la꞉paaso꞉e la꞉tiki pina꞉ hone wopu u halememe.

⁴⁴Ika꞉ hoke yenki tiekena꞉ I̱ paala꞉e. Ikita꞉ wanda꞉halima꞉ mo patehau na pa꞉la꞉ hali lapa꞉ma꞉ handeke nono pelemeke handa tumbao pomu haleme haliwekima꞉ lapa꞉ma꞉ handelememe leekeme.