Lucas 9:17-55

¹⁷Kwian ngle ulita blidu no, kwian ulita unchku no bligdadi, gire bligda bita ngle cheguda, kwian geru jwannga Jesuge bligda bita e ulita litu ole ski kweri gbataboko giti gbaboke, ski e ulita chku ete bligda cheguda ole.

¹⁸Chui gbaite Jesu jo sugekare kwian ngle ulitage gerule Chube ole, kwian geru jwannga alin allabi kledu ama ole gire Jesu geru kadu kwian geru jwannga ulitage: —¿Kwian ulita kle gerule mine cha giti cha chema?

¹⁹Kwian geru jwannga jaindunga: —Kwian gweale kle gerule ba Juan-Bautista jogebakeda chkuni gwade, kwian na kle gerule ba kwian unsuialin kada Elías chkuni, kwian na kle gerule ba kwian Chube gerua ketanga dabage unsuialin gdaite chkuni gwade.

²⁰Kwian geru jwannga gerudu ene Jesu ole gire Jesu geru kadu dare ama ulitage: —Kwian na kle gerule ene cha giti, ¿agwa ba gerule mine? ¿Cha chema? Pedro jaindunga Jesu kalen: —Ba Cristo, Chube ba kagu nga dba ai giti kwian kare kwian jwen siere ji chugege agedu me no gdale.

²¹Pedro gerudu ene Jesu giti gire Jesu gerudu kwian geru jwannga amage gdataboko giti gdaboke ulita ole: —Pedro gerudu trate, agwa ba me geru e cha giti trage ni kwian gdaite na ole —Jesu gerudu ene kwian geru jwannga amage ulita ole.

²²Jesu kwian geru jwannga amage ulita ta gbu Jesu be boi mine giti, Jesu gerudu: —Chube cha kagu nga dba ai giti kwian kare, kwian tanre be age cha dollale cha gbe boi daga ngwale, kwian israelita chugagwalla juma ulita kaire kwian gerunga Chube ole daba alin chugagwalla ulita kaire kwian daba tkanga tangle Moisés chadalla giti ulita, kwian e ulita me cha gerua gai ulia, ama ulita be jainchke chadi cha gerua gdale be cha gbe boi daga ngwale, bdagli cha gwabeda agwa mongikege cha jaba be chkeni gwade.

²³Jesu gerudu ene mau giti gire gerudu dare: —Kwian bai ta chagekalin ulia cha ole me tañachugadale dare mau giti alin allabi me agedale dare ama agali ta agekalin kare, chui gdale ama mo ta gbadale cha gerua gbe gdadi age cha takalin kare, kwian na ama gbe boi daga ngwale cha gerua gdale kaire kwian na ta ama gwakalinda cha gerua gdale, ama me mo talladale. Kwian bai mo ta gbe ene ñage chage cha ole.

²⁴Kwian bai tañachuge mau giti alin allabi toi no nga dba ai giti mo manade no me tañachuge age Chube takalin kare giti, bdagli kwian ene be jogenga sugekare Chubege be chege boi daga ngwale tanre diali chui tangle. Agwa kwian bai mo ta gbe chage cha ole mo chuge ngwadi boi daga ngwale nga dba ai giti cha gerua gdale, ama me mo tallade, ama tañachuge ma no age Chube takalin kare, bdagli kwian ene be toi no diali chui tangle nga ngaña giti cha ole cha Ñenua Chube ole.

²⁵Cha gerule ulia ba ole, ngwale kwian tañachuge tanre lle lite ole ngle giti ama kle toi nga dba ai giti gire. Kwian tañachuge lle lite ole alin allabi mau alin agwa ama me mo ta gbe ulia Chube ole, kwian e be jogenga ngwale, ama be chege sugekare Chubege diali chui tangle.

²⁶Cha gerule ba ole, Chube cha kagu nga dba ai giti kwian kare, chui bdaglige cha be chieni nakwaite cha Ñenua Chube kiralla giti, cha be chieni ule lle boanga Chube alin nga ngaña giti ngle ole, kwian ulita be gwage chadi cha noare cha kweri. Kwian nege tangle bai kaire cha gai ulia agwa ama ibule cha giti cha gerua giti, nga chie ibule amage gerule kwian na ole ama cha gai ulia giti, kwian bai ibule ene cha giti nege, kwian ene giti cha mi gerule no cha be chieni chuiage, chui ege cha mi gerule ama giti ama chanu.

²⁷Cha gerule ulia ba ulita ole, ba gweale kle aini cha ole cha keruchuge ba bebi jogeda gire ba gwa giti Chube be age no no cha ole ama kiralla giti, ba gwage chadi ene gire be suge trate bage cha noare cha kweri cha kwian ulita Chugagwalla —Jesu gerudu ene ulita.

²⁸Jesu gerudu ene ulita kwian ole, chui gbapa jo tangle gire Jesu jo jwichuga giti gerule Chube ole, Jesu kwian geru jwannga amage gdamaire alin allabi du ule, ama Pedro kaire Juan kaire Santiago du ule ama gatedi.

²⁹Jesu jo chke jwichuga giti, eni Jesu kle gerule Chube ole gire Jesu gwa jwlitedu Jesu ñometralla ulita jwlitedu kwian geru jwannga gdamai gwa giti, Jesu ñometralla chratigunga jutre jutre.

³⁰Kwian geru jwannga gdamai gwagedu Jesudi ene gire sugeti onbre nga ngaña giti boke chiu Chube kirallaske chku Jesu kle ngwadi, onbre edi tangle nga chratigunga, onbre e kada Moisés kaire Elías, ama boke chku geru trage Jesu ole Jesu be boi giti, ama gerudu Jesu ole: —Ba be boi dagale tanre, ba gwabeda una Jerusalénge Chube gerudu unsuialin kare.

³²Kledu boi ene ulita gire Pedro kaire kwian geru jwannga na boke gbigachiu tanre, agwa ama jagedu gwade gwagedu nga chralladi nga chratigunga Jesu kle ngwadi kwian boke kle Jesu ole.

³³Moisés kaire Elías jo jogeni siere Jesuge gire Pedro gerudu Jesu ole: —Cha tkanga tangle geruge, nga suga noare chadi che ulita chku aini. Cha be u soli gbe gbamai aini toingwa sugetidale, u gbaite ba alin, u gbaite Moisés alin, u gbaite Elías alin. Pedro gerudu ene ngwale, Pedroge me uñale ama kle gerule llema giti.

³⁴Pedro kledu gerule ene u giti gire bogakwa chku amadi tangle kaire ama skatemanalla bokedi tangle, ama ulita chegu bogakwaske gire ama kwachiu tanre.

³⁵Gire bogakwaske Chube kerua sugedu ama ologe gerule: “Ai cha Kirolla, cha no no ama ole, ba ulita ama keruchugadale no, ba mo ta gbadale ama kerua gbe gdadi diali.”

³⁶Chube kerua sugedu ene bogakwaske gire Pedro kaire Juan kaire Santiago gwageduni Jesudi Jesu kle gballa. Ulita gwagedu Jesudi boi ene me su gerule kwian na ole gdaite Jesu boidu giti, ama chegu kamne, gerudu modi alin allabi gwagedudi giti.

³⁷Nagbietege Jesu ule kwian geru jwannga gdamai ole jo chkeni jwichuga gdoge dba, gire kwian geru jwannga Jesuge na ulita kaire kwian na tanre tendu Jesu ngwange jonke.

³⁸Gire kwian onbre gdaite kle kwian ngleaske ngautu Jesuge: —Kwian tkanga tangle geruge, ba cha keruchuge, cha gerule ba ole cha takalin ba tai dage chage, cha kirolla gdaitre alin cháge ama oga, cha takalin ba ama dodade.

³⁹Dolla kle age me no cha kirolla ole diali, chui gwealege ama kle no, chui gwealege ama kle boi tirare dolla kote, dolla kle cha kirolla gbe ngaute kweri, kaire kle nga kagenga kirogwa giti, kle kirogwa gbe trateda dba tangle gire kirogwa jolo tanre mlienga kate dolla kote, dolla age tanre me no cha kirolla ole, dolla me ta kirogwa chugakalin ngwadi ngwedige.

⁴⁰Cha gerudu kwian geru jwannga bage ulita ole chudaboi kade amage dolla kage siere cha kirollage, agwa ama ulita me ñadu, malen cha chiu ba nate ba cha kirolla dodade.

⁴¹Jesu kirogwa ñenua keruchugu gerule ene gire Jesu gerudu kwian ulita kle eni ole: —Ba ulita me kle mo ta gbe cha gai ulia, ba ta me no. ¿Ngaminegire ba be mo ta gbe cha gai ulia, ene Chube ñage kira kete bage age ulita cha kle age kare? ¿Ngaminegire ba be kle kian gbe chage cha ba chudaboadale? Jesu gerudu ene kwian ulita ole gire Jesu gerudu kirogwa ñenua ole: —Kirogwa du chage aini.

⁴²Ñenua jo mo kirolla dbe Jesu ngnagu gire blike dolla kirogwa mliudba, dolla nga kagunga kirogwa giti, kirogwa tratuda dba tangle dolla kiralla kote, Jesu ka bo mno dolla ole: —¡Joga siere kirogwage blike! Jesu gerudu ene gire dolla jo siere kirogwage, sugeti kirogwa jo chkeni noni, Jesu kirogwa ketuni noni ñenuage manadale.

⁴³Kwian ulita gwagedu Jesudi dolla kage siere kirogwage kwian ta me jo sugano Jesu agedu Chube kiralla gitidi. Gire Jesu gerudu kwian geru jwannga gdataboko giti gdaboke ole:

⁴⁴—Ba ulita geru ai keruchuge ba gbe mo chugadi, ba me geru talla kagenga mo giti. Chube cha kagu nga dba ai giti kwian kare, kwian cha dollale be cha gai be age me no cha ole ama takalin kare.

⁴⁵Jesu gerudu ene kwian geru jwannga ole, agwa kwian geru jwanngage geru e me sugedu, Chube me ama ta gbu chke uñale malen ama tale ama kledu nga jereske kare, ama ulita ibudu geru kade Jesuge Jesu kle gerule llema giti.

⁴⁶Kwian geru jwannga Jesuge gdataboko giti gdaboke kledu mo ka dodadeda ongoru ongoru ama ulitage bai be chege ma kweri Chube gwa giti.

⁴⁷Chku uñale Jesuge kwian geru jwannga ulita kle tañachuge mine mo tale gire Jesu kirogwa soli gdaite kle eni gau gbu gdate mo ngena,

⁴⁸Jesu gerudu kwian geru jwannga ulita ole: —Kwian bai kaire no cha ole ulia, kwian ene kle kirogwa ai kare gai ngwange no kle age no ama alin, kwian age ene me kle kirogwa alin allabi gai ngwange no, kaire ama kle cha gai ngwange no kle age no cha agali alin kare. Ene kaire kwian bai kaire cha gai ngwange no, kwian ene kle Chube cha kaganga nga dba ai giti gai ngwange no kaire. Kwian kle baske aini nga dba ai giti bai mo gbe soli daba na chudaboangale, kwian ene kweri Chube gwage —Jesu gerudu ene kwian geru jwannga amage ulita ole.

⁴⁹Gire Juan gerudu Jesu ole: —Cha tkanga tangle geruge, cha ulita gwagedu kwian gdaitedi dolla kage siere kwian jwligebangage, kwian e gerudu ama kledu dolla kage siere dabage ba kiralla giti. Ama me kle chage che ole malen cha gerudu ama ole ama me ñage age ene dare.

⁵⁰Jesu gerudu Juan ole: —Ba me gerule ama ole ama me ñage age ene dare, ba me ñage mo gbe ma kweri amage. Ulia kwian bai me kle age che dollale kwian ene kle age che bale kle che chudaboi, ba me ka boi ama ole —Jesu gerudu ene Juan ole.

⁵¹Chui chege kodi Jesu ngeru Jesu be jogeni nga ngaña giti, gire Jesu mo ta gbu joge una Jerusalénge.

⁵²Jesu jo chage una Jerusalén ngnagu gire ama kwian gweale kagu mo ngeru u jinade nga Samariage, kwian e jo chke una gdaitege nga Samariage u jinade Jesu alin chegedaleda sugetidale.

⁵³Bigwa Jesu chku una ege, chku uñale kwian toinga una ege Jesu be joge una Jerusalénge malen ama me Jesu gau ngwange no me u ketu amage gbengwa, kwian toinga nga Samariage me no kwian una Jerusalénmu ole.

⁵⁴Kwian geru jwannga Jesuge boke kada Santiago kaire Juan gwagedu kwian nga Samariamu me Jesu gau ngwange no, Santiago kaire Juan gerudu Jesu ole: —Cha Chugagwalla, ¿ba takalin cha jita nga ngaña giti kade kwian una aimu gugagda ulita?

⁵⁵Santiago kaire Juan gerudu ene Jesu ole kwian nga Samariamu giti gire Jesu gwagedu ama bokedi ka bo ama ole, Jesu gerudu: —¿Ni uñale bage cha talla mine kwian ole?