Lucas 5:1-12

¹Nayan, doen aldaw timindeg si Jesus kidoen te kilid te lanaw iningedanan Genesarit. Migpesegsegay se kedita te otaw amon megpedapag dan diyà kandin, so ibeg dan domineg te kagi te Timanem itoladà din.

²Doen dowa belangay kinità din kidoen te kilid te lanaw, meneng tinenanan iyan te otaw egpemokot, so migbollaw dan te pokot.

³Penga niyan, minalin si Jesus doton te belangay i Simon, aw nemoyò te ipelepaw din iyan kidoen te lanaw medapag te kilid. Penga niyan, nenenoo si Jesus kidoen te belangay aw migtoladà te menge otaw kidoen te tanà.

⁴Penga te pegtoladà din, minikagi si Jesus diyà ki Simon, “Pegpelawod ka aw penagdag kaw te pokot amon doen meabat.”

⁵Meneng timaba si Simon, “Pengolo, nemokot kay timayod te delem, meneng wedad palos neabat day. Meneng so simogò ka, megdagdag kay te pokot.”

⁶Pegdagdag dan te pokot, nesàban dan se dakel gapang te ikan. Agpet den nelisì se pokot so ontò medita se ikan neabat.

⁷Penga niyan, kinapay dan se menge otaw kidoen te doma belangay amon megtelaban kandan. Pegdateng dan doton, miglolan dan te ikan lamig agpet den meteled se didowa belangay so nepenò te ikan.

⁸Si Simon, se doma ngadan din si Pedro, pegkità din kenyan, limongken diyà ki Jesus aw minikagi, “Pengolo, kesayo ka lekat kanak, so nelegeb a te salà.”

⁹Yan se inikagi din so ontò nepela si Pedro aw menge doma din, so ontò medita se ikan neabat dan.

¹⁰Nepela heman se kedomaan din kidoen te doma belangay si Santiago aw si Juan, didowa batà i Sebedeo. Minikagi si Jesus diyà ki Simon, “Ikà egkelemitan. Lekat seini, kenà ikan se meabat no, meneng otaw den se ibingen no diyà kanak.”

¹¹Pegdong dan te belangay, timanan dan te kedita, aw timaking dan ki Jesus.

¹²Sagwa kidoen si Jesus te sebad lonsod, kinità din se otaw nelegeb se lawa te tompig. Pegkità din ki Jesus, limongken diyà kandin aw nemoyò, “Sir, aw doen ibeg no, netegahan ko te mekebatog ka megpegolì kanak.”