Lucas 12:10-17

¹⁰Kwian bai gerule me no cha dollale gire bigwa kwian e ta jwlite cha ole, kwian ene gerudu ulita me no cha dollale Chube talla mlienga. Agwa kwian bai gerule me no Chube Oña dollale, Chube me kwian gerudu me no ene talla mlienga dale, kwian ene chege jiske diali Chube gwa giti ama gerudu Chube Oña dollale gdale.

¹¹Kwian tanre cha gerua dollale be ba cha gerua ganga dbe u mo litangwa Chube gerua jwanngwage, u ege kwian e be ba gbe jiske kwian israelita chugagwalla ulitage cha gerua gdale, ba boi ene gire ba me mo tallade ba be gerule mine mau giti chugagwalla kweri e ulita gwa giti.

¹²Ba be kle eni kwian e gwa giti gire chui ege Chube Oña be ba ta gbe ba gerudale mine kwian ole, ulia Chube Oña be ba chudaboi ulita geru giti —Jesu gerudu ene ulita kwian geru jwannga gdataboko giti gdaboke ole.

¹³Kwian onbre daba ngleaske gdaite gerudu Jesu ole: —Kwian tkanga tangle geruge, cha ñenua me chegu, ama lle jigu ngle cha alin cha daballa alin, ama chude jigu bda jigu dbi jigu cha gdaboke alin. Cha daballa lle e gau ulita mau alin, cha takalin ba gerule ama ole ama lle ulita girabatadale bonga cha ole.

¹⁴Jesu gerudu onbre e ole: —Cha me ta agekalin ba takalin kare. Chube me cha kagu nga dba ai giti kwian daba gbanga jiske kare kle kwian me chegeba llea girabate kwian oña bitalla ole.

¹⁵Kaire Jesu gerudu kwian nglea ole ulita: —Ba me mo ta gbadale tañachuge diali ba ta lle na tanre gakalin mau alin. Kwian lle tanre gai, ama jogeda lle e ulita me ñage ama oña jwen siere ji chugege me ñage ama oña gbe toi diali chui tangle Chube ole.

¹⁶Gire Jesu geru ñachugu kwian ulita alin: —Kwian onbre gdaite lle molen tanre, ama chudea ulita chku noare.

¹⁷Kwian e lle molen tanre tañachugu mo tale: “¿Cha be age mine? ¿Cha be bligda jwen ulita cha be oge baini? Bligda ngle, u bligda ogangwa soliare.”