Lucas 11:9-44

⁹Eneng-enengi niyo ini. Aw memoyò kaw diyà te Timanem, begayan kaw din. Aw mengemahà kaw, doen kitaen niyo. Aw tomawal kaw doton te lelebangan, ipeawop kaw.

¹⁰Kominawà se kedita te otaw memoyò. Komità heman se kedita te otaw mengemahà. Ipeawop heman se kedita te otaw tomawal.

¹¹Aw doen batà niyo memoyò te ikan, eked kaw pemegay kandin te memokan.

¹²Aw memoyò se batà niyo te batà te manok, eked kaw heman pemegay kandin te inenipit.

¹³Nayan, pengkey doen medaet eg-inangen niyo, meneng gayed mèpiya se ipegpemegay niyo diyà te menge batà niyo. Labi pa se Amay niyo Timanem kidoen te langit, so egpemegay sikandin te Espiritu Santo diyà te kedita te otaw memoyò diyà kandin.”

¹⁴Doen sebad aldaw migpelowà si Jesus te bosaw migpeomo te otaw dinetengan din. Penga te pegpelowà din te bosaw, nekeikagi den se otaw, aw yan se doun te ontò nepela se doma otaw kimità kenyan.

¹⁵Meneng eg-ikagi se doma otaw, “Binegayan sikandin te tolos lekat te pengolo te bosaw si Belsebul, se doma ngadan i Satanas, aw yan se doun te egpelowà sikandin te bosaw lekat te otaw.”

¹⁶Doen heman menge doma otaw migtandà peden ki Jesus aw doen pengilala ipekità din diyà kandan amon ketegahan dan te ontò sikandin insogò te Timanem.

¹⁷Meneng netaga-taga si Jesus aw eden se aneng-aneng dan, aw yan se doun te minikagi sikandin, “Simpana megbebolaw se sakop te sebad lonsod, aw megbebolaw se otaw migsebad te balay, kebàtan se lonsod dan te eked kenamay.

¹⁸Nayan, eg-ikagi kaw te egpelowà a te bosaw lekat te otaw pineokit te tolos imbegay i Satanas diyà kanak. Meneng simpana megbolaw si Satanas diyà te menge sakop din, kebàtan se peglowan din.

¹⁹Aw sinila niyo se pegpelowà ko te bosaw so aneng-aneng niyo pineokit iyan te tolos i Belsebul, sinila niyo heman se kenyo tinoledaan, so egpelowà dan heman te bosaw lekat te otaw. Yan se doun te sikandan se megpetaga-taga kenyo te kolang se pegsila niyo kanak.

²⁰Meneng aw pineokit te tolos imbegay te Timanem se pegpelowà ko te bosaw lekat te otaw, yan ketegahan niyo te dimateng den dini kenyo se peglowan te Timanem.

²¹“Aw megbantay se otaw te balay din, aw magsen sikandin, aw doen kekamang din, eked keagaw se kedònan din.

²²Meneng aw domateng se otaw labi pa magsen diyà kandin, yan se domaeg te tig-apò te balay aw meg-agaw te kedita te kekamang sineligan din, aw iteped heman se kedònan din diyà te menge doma otaw.

²³“Se kedita te otaw eked pegpesakop diyà kanak, yan se egpoon kanak. Aw se kedita te otaw kenà egtelaban kanak, yan se egpekadas te doma otaw lekat kanak.”

²⁴“Aw ipelowà se bosaw lekat te otaw, meglegeb se bosaw doton te kebigtilan amon mengemahà te mèpiya ogpeanan din. Aw wedad ketelaan din, mikagi sikandin, ‘Mèpiya pa aw lomikò a doton te otaw tapay ko eg-ogpaan.’

²⁵Lomikò se bosaw doton kandin, aw kitaen din se otaw tapay din inogpaan te mèpiya den, iling te balay melinis aw mèpiya pegkesawol.

²⁶Penga niyan, mangay se bosaw te doma pito bosaw labi pa medaet. Domoton se kedita dan te otaw sìyan aw meg-ogpà dan diyà kandin. Yan labi pa medaet se pegkesawol te otaw sìyan diyà te tapay pegkesawol din.”

²⁷Pegtoladà i Jesus te otaw netipon, doen bayi timawal diyà kandin, kagi din, “Doen ontò keluba te bayi migbatà aw migpesoso kamno.”

²⁸Meneng minikagi si Jesus, “Labi pa meluba se kedita te otaw domineg te kagi te Timanem aw tomolò dan heman kenyan.”

²⁹Sagwa labi pa medita se otaw netipon diyà ki Jesus, minikagi sikandin, “Medaet se ibeg te kedita te otaw songkani, so gayed kaw egkeibeg te ipekità ko diyà kenyo se pengilala. Meneng sebad olò se pengilala ipekità te Timanem diyà kenyo, aw yan se iling te neinang ki Jonas gebii.

³⁰Pineokit te neinang ki Jonas, netaga-taga se tege Niniba te ontò sikandin insogò te Timanem. Iling heman kenyan, doen heman meinang diyà kanak Timanem Migpekeotaw amon metaga-taga se kedita niyo te ontò a insogò te Timanem.

³¹Aw domateng se aldaw te peg-okom te Timanem te kedita te otaw, tomindeg heman se selotan bayi limowan doton te Siba gebii, aw mikagi sikandin te keilangan ipelumun kaw so wedà kaw penenalan kanak. Pengkey mediyò se ogpeanan din, meneng dimoton sikandin ki Solomon amon menenalan te kebiyasa ipegtoladà din. Na, pengkey melangkaw si Solomon, meneng doen den dimini labi pa melangkaw diyà kandin.

³²Aw domateng se aldaw te peg-okom te Timanem te kedita te otaw, mikagi heman se tege Niniba te keilangan ipelumun kaw so wedà kaw pegselsel te salà, so pegdineg te tege Niniba te intoladà i Jonas, migselsel dan te salà. Na, pengkey melangkaw si Jonas, meneng doen den dimini kenyo labi pa melangkaw diyà kandin.”

³³“Aw menemtem se otaw te solò, eked din iyan elesi kidoen te awang te tanà. Eked din heman sengkobi te gentangan. Meneng mèpiya aw isawol din iyan diyà te kelengkawan amon keenyagan se didalem te balay.

³⁴Komità se otaw pineokit te mata. Aw mèpiya se mata te otaw, melowa se pegtengteng din. Meneng aw medaet se mata, iling te mengitngit se pegtengteng din pengkey aldaw.

³⁵Iling heman kenyan, keilangan megpekeimanday kaw amon kenà medaet se pedowan niyo pengkey aneng-aneng niyo mèpiya se pedowan.

³⁶Meneng aw meleseb se pedowan niyo, wedad medaet inangen niyo, so tomalag mèpiya se meinang niyo. Melowa iyan kitaen te doma otaw iling te solò eg-anyag.”

³⁷Penga te pegtoladà i Jesus, doen sakop te menge Parisiyo migpekaen kandin. Pegdateng i Jesus doton te balay din, minawop aw kimaen doma din.

³⁸Meneng ontò nepela se Parisiyo ki Jesus, so wedà sikandin taking te ketanem te menge Judiyo tepad te peg-onaw te belad te wedà pa kaen.

³⁹Meneng minikagi se Pengolo, “Sikiyo menge Parisiyo, gayed kaw eg-ingà aw eglalang te medaet. Iling kaw te otaw olò eg-onaw te lowà te baso aw lipong pengkey melipà pa se didalem niyan.

⁴⁰Wedad inenengen niyo. Ininang kaw te Timanem, aw ibeg din, tomalag mèpiya se pedowan niyo aw eg-inangen niyo.

⁴¹Keilangan lekat te keido te pedowan niyo se pegpemegay niyo diyà te otaw nelimahan, aw yan meinang kaw ontò mèpiya.

⁴²“Mekelelayò kaw menge Parisiyo, so pengkey egpemegay kaw diyà te Timanem te ikesempolò ketengà te kedita te geniyen niyo pengkey menge enagay, meneng wedà niyo beling inangi se keilangan inangen tepad te metòlid inang diyà te doma otaw, aw kedakel te pedowan niyo diyà te Timanem. Yan se keilangan inangen niyo, meneng pedeleg kaw heman te pegpemegay niyo diyà te Timanem.

⁴³“Mekelelayò kaw menge Parisiyo, so ibeg niyo menenoo kidoen te onsedanan impetagad kenyo doton te simbahan te Judiyo amon ipelangkaw kaw te doma otaw. Ibeg niyo heman segmanen kaw te doma otaw doton te pedyanan.

⁴⁴Mekelelayò kaw, so medaet se awop te pedowan niyo. Iling kaw te lebeng eked kilelai te otaw mokit kidoen.”