LOS HECHOS 8:18-39

¹⁸Naꞌan Simón bra nu mstya yaꞌ neꞌ nu yꞌni xaꞌan chaꞌ ꞌin Jesucristo ke neꞌ, chaꞌ nganun Tyiꞌi Ndiose niꞌ kasiya ꞌin neꞌ bra kanꞌ. Ykwiꞌ Simón loꞌo neꞌ kanꞌ bra kanꞌ: ―Taǎn tñi ꞌwan si tayaꞌ wan ꞌñaǎn chaꞌ loꞌoǔn kuꞌniǐn chinꞌ tñan ngwañaꞌan ―ndukwin Simón―. Loꞌoǔn nchka tiǎnꞌ xtyaǎn yaǎnꞌ ke nten chaꞌ kanun Tyiꞌi Ndiose niꞌ kasiya ꞌin neꞌ ―ndukwin.

²⁰―Suꞌwa ti kuꞌni tyii Ndiose ꞌiin loꞌo nchga tñi ꞌiin ―ndukwin Tyu ꞌin Simón bra kanꞌ―. Chaꞌ suꞌwe nu nsuꞌwi ꞌin Ndiose, ja ka ka kiyaꞌ ran ―ndukwin―.

²¹Ja ndiꞌin chaꞌ ꞌiin loꞌo Ndiose siyaꞌ ti, kanꞌ chaꞌ ja ta Ni chabiyaꞌ ꞌiin chaꞌ kuꞌni tñan loꞌo ba.

²²Kuloo chuunꞌ chaꞌ kuxi nu ndiꞌin niꞌ kasiya ꞌiin, chaꞌ kaa jñaan chaꞌ tlyu tiꞌ ꞌin Ndiose ꞌin nchga chaꞌ kuxi nu yꞌnii.

²³Jlyo tiǎnꞌ nchga chaꞌ kuxi nu ndiꞌin niꞌ kasiya ꞌiin, chaꞌ chen ꞌa ñaꞌan lka niꞌ kasiya ꞌiin. Yaꞌ kuneꞌ xaꞌan nsuꞌwii, kanꞌ chaꞌ katsaǎnꞌ ꞌiin ni, chaꞌ kuloo chuunꞌ chaꞌ kuxi nu ndiꞌin ꞌiin.

²⁴Mxkwen Simón ꞌin neꞌ bra kanꞌ: ―Kuꞌni wan chaꞌ suꞌwe chkwiꞌ wan loꞌo ykwiꞌ Ni nu nka Xꞌnaan chaꞌ ꞌñaǎn ―ndukwin Simón ꞌin neꞌ―, chaꞌ kuꞌni Ni chaꞌ tlyu tiꞌ ꞌñaǎn ―ndukwin―, chaꞌ ja kuꞌni Ni loꞌoǔn sa ñaꞌan nu ndukwin wan ꞌñaǎn.

²⁵Kaꞌan la chaꞌ ꞌin Ndiose ngwaꞌu Tyu loꞌo Xuwa ꞌin neꞌ bra kanꞌ, ykwiꞌ yu sa ñaꞌan ngwa nchga chaꞌ ꞌin Jesús. Chunꞌ ndiꞌin la mdoꞌo yu ndyaan yu nde Jerusalén. Tuwiin mdijin yu tyun kichen nde lo yuu ꞌin Samaria, loꞌo ngwaꞌu yu ꞌin neꞌ kichen kanꞌ sa ñaꞌan nu ndlaa Jesús ꞌin nten chalyuu ꞌin nchga chaꞌ kuxi.

²⁶Ykwiꞌ ska angajle loꞌo Lpe bra kanꞌ: ―¿Ta nsuꞌwi lyo nuꞌwin tuwiin nu ndyoꞌo Jerusalén ndyaa kichen Gaza a? Yaa lyaa chinꞌ tuwiin kanꞌ ―ndukwin angajle kanꞌ ꞌin Lpe. Tuwiin ndijin nde ska ntenꞌ wtyi lka ran.

²⁷Bra ti mdoꞌo Lpe ndyaa tuwiin kanꞌ, loꞌo chunꞌ ndiꞌin la naꞌan yu ndijyan ska yu kiꞌyu neꞌ Etiopía. Ska nten nu tnun nchka lka yu kula kanꞌ, chaꞌ nka yu ndloo ꞌin nchga tñi nu ndiya ꞌin reina nu nka ndloo la lo yuu Etiopía kanꞌ; Candace naan nu kunaꞌan reina kanꞌ. Wa yaa yu kiꞌyu kanꞌ Jerusalén chaꞌ kuꞌni tnun yu ꞌin Ndiose.

²⁸Loꞌo ni, wa mxitukwi yu ndyaan yu kichen tyi yu. Ndukwa yu niꞌ carreta nu ndujwakii kwiyu ꞌin, nchkwiꞌ yu lo kityi nu ngwaꞌan ayman Isaías chaꞌ ꞌin Ndiose.

²⁹Ykwiꞌ Ndiose loꞌo Lpe bra kanꞌ; Tyiꞌi Ni nu nganun niꞌ kasiya ꞌin Lpe, kanꞌ nu ykwiꞌ loꞌo: ―Yaa tyukwaa ꞌin carreta kwa ―ndukwin Ni ꞌin yu.

³⁰Msnan ꞌa Lpe ndyaa ñaꞌan ꞌin carreta bra kanꞌ. Siꞌ ti carreta mdaꞌan yu ndyaa yu chinꞌ, ynan yu chaꞌ nu ykwiꞌ yu kula kanꞌ lo kityi nu ngwaꞌan ayman Isaías, ñaꞌan ndukwa ti yu niꞌ carreta, kanꞌ mdyisnan ykwiꞌ Lpe loꞌo yu kula kanꞌ: ―¿La nde yaꞌ tsaa ni, yu kula a? ―ndukwin Lpe ꞌin yu. ―Tyaꞌaǎn nde kichen tyiǐn ―ndukwin yu. ―¿Ta nchka biyaꞌ tiiꞌ chaꞌ nu nchkwiiꞌ lo kityi kwa a? ―ndukwin Lpe ꞌin yu.

³¹―Ja nchka ꞌñaǎn, chaꞌ ja ndiya nu kwaꞌu ꞌñaǎn ―ndukwin yu kula kanꞌ bra kanꞌ―. Skween lyaa niꞌ carreta re chaꞌ tyaan suꞌwa ti. Loꞌo ndyaa tukwa Lpe niꞌ carreta loꞌo yu kula bra kanꞌ.

³²Suꞌwa ti ykwiꞌ taꞌa tyukwaa neꞌ lo kityi ꞌin Ndiose nu nsuꞌwi yaꞌ yu kula bra kanꞌ, ti kwiꞌ lkaꞌ kityi seꞌen naꞌan kwiꞌya yu kula kanꞌ. Nde ñaꞌan nchkwiꞌ ran: Ndyaa loꞌo neꞌ ꞌin yu chaꞌ kujwi neꞌ ꞌin yu, ñaꞌan tiꞌ ndujwi neꞌ ska slyaꞌ. Sa ñaꞌan nu ngiꞌni slyaꞌ nu ja nxiꞌya bra nu nsiꞌyu neꞌ kichanꞌ chunꞌ iꞌ, kwiꞌ ngwañaꞌan kuꞌni yu nu kan lo chalyuu re chunꞌ ndiꞌin la; ni siya kujwi neꞌ ꞌin yu, ja ska chaꞌ xkwen yu ꞌin neꞌ kanꞌ bra kanꞌ.

³³Ja ñi kuꞌni biyaꞌ neꞌ nu nka ndloo ꞌin yu, kanꞌ chaꞌ lye ꞌa ta neꞌ nu tiꞌí ꞌin yu kanꞌ. Loꞌo ja ka chkwianꞌ chaꞌ kaja sñiꞌ yu nde loo la, chunꞌ chaꞌ kujwi neꞌ ꞌin yu kanꞌ; loꞌo ja talo yu chan lo chalyuu re bra kanꞌ. Ngwañaꞌan ndukwa chaꞌ lo kityi kanꞌ.

³⁴Bra kanꞌ mnichaꞌ yu kula Etiopía kanꞌ ꞌin Lpe: ―Kuꞌnii chaꞌ suꞌwe kwaꞌuu chinꞌ ꞌñaǎn sa ñaꞌan nchkwiꞌ kityi re ―ndukwin yu ꞌin Lpe―. ¿Ti ka nu lka kujwi neꞌ ꞌin, ndukwin kityi re a? ―ndukwin yu kanꞌ―. ¿Ta ngwaꞌan ra ayman Isaías chaꞌ re chaꞌ ꞌin yu, ti ykwiꞌ ti yu a? ¿O ta chaꞌ ꞌin xka yu ngwaꞌan ayman chaꞌ re a?

³⁵Loꞌo mxkwen Lpe ꞌin yu kula kanꞌ; ngwaꞌu yu ꞌin yu sa ñaꞌan lka chaꞌ nu ndukwa lo kityi kanꞌ, ngwaꞌu yu nchga chaꞌ ꞌin Jesucristo bra kanꞌ.

³⁶Laja nu ndyaa neꞌ tuwiin kanꞌ, mdiyan neꞌ ska seꞌen ndiꞌin ylaa tyiꞌa. Ykwiꞌ yu kula kanꞌ loꞌo Lpe bra kanꞌ: ―Nde ndiya tyiꞌa ―ndukwin yu kanꞌ―. ¿Ja kuꞌnii chaꞌ suꞌwe tukwatyaa ꞌñaǎn ni a?

³⁷―Suꞌwe ―ndukwin Lpe ꞌin yu―. Suꞌwe si chañi chaꞌ tyukwi ti tiyee msñii chaꞌ ꞌin Jesucristo. ―Chañi chaꞌ wa msñiǐn chaꞌ kanꞌ ―ndukwin yu kula kanꞌ―. Ndyaa ñaꞌan tiǎnꞌ chaꞌ ska ti Jesucristo lka Sñiꞌ Ndiose ykwiꞌ.

³⁸Loꞌo ykwiꞌ yu kula kanꞌ loꞌo msu ꞌin yu chaꞌ tyaa tuun neꞌ loꞌo carreta ꞌin yu bra kanꞌ, chaꞌ kiꞌya yu kula kanꞌ lyuu loꞌo Lpe. Ndyaa neꞌ lo tyiꞌa, mdukwatya Lpe ꞌin yu kula kanꞌ bra kanꞌ.

³⁹Bra wa mdyii ndyukwatya yu, mdoꞌo neꞌ lo tyiꞌa bra kanꞌ. Bra ti ndyaa Lpe, ndyaa loꞌo Tyiꞌi Ndiose ꞌin yu chaꞌ tsaa yu xka seꞌen; ja naꞌan ꞌa yu kula kanꞌ ꞌin Lpe bra kanꞌ. Ndyaa yu kula Etiopía kanꞌ, ndyaa yu la lo yuu ꞌin kichen tyi yu bra kanꞌ; loꞌo suꞌwe ꞌa ngwa tiye yu kula kanꞌ bra kanꞌ.