Los Hechos 8:18-39

¹⁸Ahe osepiase, Simón omondo pota guarepochi chupe,

¹⁹aipo ehi: —Cheu avei pemboumi tẽi evocoi pĩratasa, amondose che po que ava harɨve, togüeyɨ avei Espíritu Santo sese yuvɨreco —ehi Simón.

²⁰Omboyevɨ rumo Simón upe: —¡Tocañɨpa nde guarepochi nde reseve! Esepia, ndepɨhañemoñeta co Tũpa ombou vahe oreu, ererocua vaherã nde guarepochi pɨpe viña —ehi chupe—.

²¹Ndeu ndiyai co nungar mbahe apo ãgua. Esepia, nde pɨhañemoñetasa ndahei ihɨ̃vi vahe Tũpa rovaque.

²²Sese epoi nde pɨhañemoñeta raisa sui, eyerure Tũpa upe. Avɨyeteramo iñerora ndeu —ehi—.

²³Aicua nde pɨha naporai vɨte iyavei nde pɨhañemoñeta raisa pɨpe vɨte ereico —ehi chupe.

²⁴Evocoiyase Simón omboyevɨ chupe: —Peyeruremi catu yande Yar upe che rese; tipo eme acoi mbahe pe remimombehu cheu —ehi chupe.

²⁵Yande Yar ñehesa mombehu pare ahe tecua pendar upe, apóstol omombehu-mbehu co ñehesa pɨ̃sɨrosa resendar Samaria pɨpendar tecua rupi yuvɨreco. Ẽgüe ehi oyepota yuvɨroyevɨ Jerusalén ve yugüeru.

²⁶Ipare Tũpa rembiguai oyemboyecua Felipe upe aipo ehi chupe: “Epũha, eso irohɨ cotɨ nde yepota ãgua evocoi perɨ ogüeyɨ vahe oso Jerusalén sui, Gaza ve” ehi. Evocoi Gaza piar osasa ɨvɨ iporupɨrẽhɨ rupi oso.

²⁷Evocoiyase opũha oso perɨ rupi. Aheve osovaĩchi ñepei ava, ahe seco ɨvate vahe guarepochi apocatusar Etiopía pendar cuña mborerecuar upe nara yepi, ahe mbɨa oso vahe Jerusalén ve Tũpa mboetei ãgua.

²⁸Oyevɨse ocãreto pɨpe, oyeroquɨ Tũpa ñehe mombehusar Isaías rembicuachiagüer rese ou.

²⁹Evocoiyase Espíritu aipo ehi Felipe upe: “Eyemboya cãretomi rese” ehi.

³⁰Evocoiyase vɨrovɨse ahe ava, osendu iyeroquɨ Isaías rembicuachiagüer pɨpe oĩ. Ahese oporandu chupe: —¿Eresenducua aipo Tũpa Ñehengagüer nde yeroquɨsa eĩ? —ehi chupe.

³¹Etiopía pendar mbɨa omboyevɨ chupe: —¿Mara ahera vo che senducua viña ndipoise imombehu tuprɨsar cheu? —ehi chupe. Ipare, “Erio, eyeupi, tereguapɨ cohave che pɨri” ehi Etiopía pendar chupe.

³²Ahe Isaías rembicuachía oyeroquɨ vahe pɨpe aipo ehi: “Inungar ava vɨraso ovesa yuca ãgua, ẽgüe ehi avei ahe mbɨa seraso yuca ãgua yuvɨreco. Iyavei inungar ovesa nasasei eté guagüer rerocuase, ẽgüe ehi avei ahe mbɨa noñehei eté.

³³Osecomomini yuvɨreco, ndipoi ava sepɨsar. Ndipoi ichuindar. Esepia, omocañɨ co ɨvɨ sui yuvɨreco” ehi Isaías rembicuachía pɨpe.

³⁴Oyeroquɨ pare ahe Etiopía pendar oporandu chupe: —Emombehumi cheu: ¿Ava rese pĩha aipo Isaías oñehe: oyese ae pĩha, ambuae ava rese tie? —ehi.

³⁵Evocoiyase co ñehesa sui omombehu ñehesa avɨye vahe Jesús recocuer resendar Etiopía pendar upe.

³⁶Ipare oguata catuse yuvɨreco, Etiopía pendar osepia ɨ. Aheve ahe aipo ehi chupe: —Esepia co ɨ tui. ¿Ndiyai vo cohave che ãpiramomi tẽi eve viña? —ehi.

³⁷Ahese omboyevɨ chupe: —Ereroya itese opacatu nde pɨha pɨpe, iya ité ndeu —ehi. —Aroya ité niha Jesucristo ahe Tũpa Rahɨr secoi —ehi.

³⁸Evocoiyase omombɨta uca ocãreto, ichui ogüeyɨ ɨve yuvɨraso. Aheve Etiopía pendar Felipe oñapiramo.

³⁹Yuvɨnosese ɨ sui, yande Yar Espíritu vɨraso ahe Etiopía pendar sui. Ahese ndosepia iri; ẽgüe ehiño vorɨvete oso perɨ rupi.