LOS HECHOS 8:18-39

¹⁸Yama̱ Simón hua̱nti̱ cscuhuanán, úcxilhli̱ la̱ntla̱ Espíritu Santo xchin c-xokspuncan cha̱tunu acxni̱ apóstoles xli̱acchipako̱y xmacancán. Huata xlá̱ ma̱lacnu̱niko̱lh tumi̱n,

¹⁹chu̱ chuná̱ huaniko̱lh: —Na̱ caquima̱xquí̱tit quit tama̱ tlanca li̱tlihuaka̱ laqui̱mpi̱ acxni̱ quit nacli̱acchipay quimacán cha̱tum, xlá̱ nalakmín xli̱tlihuaka Espíritu Santo.

²⁰Huata Pedro chuná̱ kálhti̱lh: —Lacxtum cata̱láksputti̱ mintumi̱n ca̱li̱ní̱n, ¿lá̱ntla̱ huix puhuana̱ pi̱ tla̱n li̱tama̱huacán tumi̱n hua̱ntu̱ Dios ma̱sta̱y xli̱tlihuaka?

²¹Dios ni̱ lay ma̱xqui̱yá̱n hua̱ntu̱ squinípa̱t, sa̱mpi̱ huix li̱xcájnit kalhi̱ya̱ mintalacapa̱stacni, chu̱ ni̱tlá̱n hua̱ntu̱ lacapa̱stacni̱ta̱ c-minacú̱.

²²Huata xatlá̱n catalakaspitta̱ya, calakmákanti̱ xali̱xcajnit mintalacapa̱stacni̱ hua̱ntu̱ kalhi̱ya̱ c-minacú̱, chu̱ casquini̱ li̱tlá̱n pi̱ cama̱tzanka̱nanín mintala̱kalhí̱n.

²³Sa̱mpi̱ pacs xalacli̱xcajnit mintapuhuá̱n kalhi̱ya, chu̱ mintala̱kalhí̱n xta̱chuná̱ la̱ xatachí̱n ma̱lama̱ní̱n, luhua smani̱pasani̱ta, xatlá̱n cahuani̱ Dios cama̱tzanka̱nanín.

²⁴Simón kalhtí̱nalh: —¡Catlahuátit li̱tlá̱n, casquinítit Dios quimpa̱lacata̱ laqui̱mpi̱ ni̱tú̱ chuná̱ naquima̱pa̱ti̱ni̱y la̱ntla̱ huixín quihuanini̱tántit!

²⁵Acxni̱ Pedro, chu̱ Juan ma̱kantaxti̱ko̱lh hua̱ntu̱ xli̱macaminko̱cani̱t yama̱ ca̱chiquí̱n, titaspitpalako̱lh c-Jerusalén, na̱ cani̱hua̱ ca̱chiquí̱n xala c-Samaria anta̱ni̱ xti̱taxtuko̱y, xli̱chihui̱nanko̱y yama̱ li̱pa̱xuhu tama̱catzi̱ní̱n xpa̱lacata la̱ntla̱ Jesús lakma̱xtunán.

²⁶Maktum quilhtamacú̱ cha̱tum xangel Quimpu̱chinacán lákmilh anta̱ni̱ xuí̱ Felipe, chu̱ chuná̱ huánilh: “Huí̱ kantum tiji̱ hua̱ntu̱ antá̱ tzucuy c-Jerusalén, ti̱taxtuy c-desierto, chu̱ antá̱ cha̱n c-aktum ca̱chiquí̱n hua̱ntu̱ huanicán Gaza. Lacapala̱ catáca̱xti, chu̱ capit chipaya̱ yama̱ tiji.”

²⁷Cha̱nchu̱ Felipe lacapala̱ taca̱xtá̱qui̱lh, chu̱ alh quilhta̱ya̱ yama̱ tiji. Antá̱ chú̱ xtla̱huama̱ acxni̱ ta̱tanoklhchá̱ cha̱tum chixcú̱ xala c-xatiyat Etiopía, yama̱ chixcú̱ luhua ma̱paksi̱ná xuani̱t c-xtíyat sa̱mpi̱ xta̱ma̱paksi̱nán reina Candace, xli̱pu̱lhca̱ni̱t li̱tesorero c-Etiopía; xlá̱ antá̱ qui̱lakataquilhpu̱tánalh c-Jerusalén.

²⁸Chu̱ aya xtaspitma̱ c-xca̱chiquí̱n; xlá̱ caj xuí̱ c-xpu̱tla̱hu la̱ xcarreta hua̱ntu̱ clhtancale̱nko̱y tantuy cahua̱yu̱, na̱ xli̱kalhtahuakati̱lhay libro̱ ni̱ma̱ maka̱n quilhtamacú̱ títzokli̱ profeta Isaías.

²⁹Espíritu Santo chuná̱ ma̱puhuá̱ni̱lh Felipe: “Lacapala̱ catlá̱huanti, chu̱ cama̱tá̱xtucti̱ yama̱ carreta.”

³⁰Acxni̱ li̱huana̱ talacatzúhui̱lh, xlá̱ káxmatli̱ pi̱ huá̱ xli̱kalhtahuakama̱ xlibro̱ profeta Isaías, chu̱ chuná̱ kalhásquilh: —¿Pá̱ akata̱ksa̱ huix hua̱ntu̱ li̱chihui̱nama̱ tama̱ libro?

³¹Yama̱ chixcú̱ kálhti̱lh: —Hua̱mpi̱ ¿lá̱ntla̱ nacli̱akata̱ksa̱ hua̱ palapi̱ ti̱ni̱ quima̱lacatancsaniy hua̱ntu̱ luhua huamputún? Huata yama̱ chixcú̱ huánilh Felipe pi̱ catahuácalh c-pu̱tla̱hu, chu̱ catahui̱ c-xpa̱xtú̱n.

³²Yama̱ c-libro̱ tu̱ xli̱kalhtahuakati̱lhay chuná̱ huan: “Xta̱chuná̱ la̱ tantum ma̱ntzu̱ borrego le̱nca̱ anta̱ni̱ namakni̱cán, ni̱ pala tzinú̱ tatlancá̱ni̱lh acxni̱ makni̱ca̱. Chu̱ na̱ xta̱chuná̱ la̱ actzu̱ borrego ni̱ tasay acxni̱ maksitcán, na̱ ni̱ pala huá̱ tásalh c-xlacati̱ncán hua̱nti̱ ma̱pa̱ti̱ni̱ko̱lh.

³³Luhua li̱ma̱xaná̱ la̱ntla̱ ma̱pa̱ti̱ni̱ca̱ acxni̱ ma̱xoko̱ni̱ca̱ hua̱ntu̱ ni̱ xtlahuani̱t, chu̱ ni̱ pala cha̱tum tí̱ xkalhmaktá̱yalh; ni̱ pala tzinú̱ li̱chihui̱namputu̱ hua̱ntu̱ tlahuaniko̱lh hua̱nti̱ xli̱ta̱chiqui. ¿Xatí̱ cahuá̱ nahuán pi̱ luhua maka̱s tilatáma̱lh? Pus maktum makni̱ca̱, chu̱ ma̱laksputunica̱ xlatáma̱t ca̱tiyatna.”

³⁴Yama̱ chixcú̱ xala c-Etiopía chuná̱ kalhásquilh Felipe: —Catlahua̱ li̱tlá̱n, caquihuani̱ la̱ntla̱ yuma̱ qui̱taxtuy. ¿Tí̱ li̱chihui̱nama̱ yuma̱ profeta? ¿Pá̱ caj xacstu̱ li̱chihui̱nama̱ca̱, usuchí̱ pi̱ huí̱ tanuj chixcú̱ hua̱nti̱ xli̱chihui̱nama̱?

³⁵—Pus nacma̱lacatancsaniyá̱n hua̱ntu̱ huaniputún —huánilh Felipe. Huá̱ li̱ma̱quilhtzuquí̱nilh yama̱ tatzokni xla profeta Isaías hua̱Ntu̱ xlá̱ xli̱kalhtahuakama̱, chu̱ li̱huana̱ ma̱siyúnilh yama̱ tama̱catzi̱ní̱n xpa̱lacata la̱ntla̱ Jesús lakma̱xtunán xli̱pacs hua̱nti̱ nali̱pa̱huanko̱y.

³⁶Li̱puntzú̱ chú̱ acxni̱ luhua xti̱lacatza̱lama̱kó̱ lacatum anta̱ni̱ mima̱ chúchut, yama̱ chixcú̱ huánilh Felipe: —Unú̱ huí̱ chúchut, ¿pá̱ huí̱ tu̱ quisoka̱li̱y pala ni̱tlá̱n nacta̱kmunuy?

³⁷—Lapi̱ xli̱pacs minacú̱ li̱ca̱najlaya, tla̱n nata̱kmunuya. Yama̱ chixcú̱ kálhti̱lh: —Quit cca̱najlay pi̱ Jesucristo hua̱ xCam Dios.

³⁸Puschí̱ yama̱ chixcú̱ ma̱paksí̱nalh pi̱ cama̱chokoca̱ carreta, chu̱ xcha̱tuycán ta̱ctako̱lh, anko̱lh anta̱ni̱ xuí̱ chúchut, antá̱ chú̱ c-chúchut Felipe akmúnulh yama̱ ma̱paksi̱na chixcú̱ xala c-Etiopía.

³⁹Acxni̱ chú̱ aya tacutko̱lh c-chúchut, chu̱ pa̱taxtuko̱lh tiji, cspiritu Quimpu̱chinacán le̱lh Felipe a̱lacatanu̱, chu̱ yama̱ chixcú̱ nia̱lh úcxilhli, hua̱mpi̱ huata xlá̱ luhua li̱pa̱xuhu táspitli̱ c-xca̱chiquí̱n.