Apostolo 8:18-39

¹⁸Simon gêlic aposolo sêkêŋ lemeŋ gêsac lau, ma Ŋalau Dabuŋ gelom êsêac, tec kejoŋ awa gêdêŋ êsêagêc gêja

¹⁹ma kêsôm gebe “Akêŋ ŋaclai tonaŋ êndêŋ aê amboac tonaŋgeŋ. Aê embe jakêŋ lemoc ênsac ŋac teŋ, go Anôtô êkêŋ Ŋalau Dabuŋ êndêŋ eŋ.”

²⁰Tec Petere kêsôm gêdêŋ eŋ gebe “Aôm ônaŋa tonêm awageŋ. Aôm gobe ônam ôli Anôtônê moasiŋ ŋa awa me.

²¹Aôm gôwê kaiŋ kôm tonec ŋagec atomanô, gebe Anôtô gêlic aômnêm ŋalêlôm geogeŋ.

²²Amboac tonaŋ ônam taôm ôkwi aŋga nêm geo tonaŋ ma oteŋ Apômtau, moae êsuc biŋ geo, taŋ gêc nêm ŋalêlôm naŋ ôkwi.

²³Aê galic nêm geo kêtôm ŋaikisi ŋamakic gêjam aôm auc to sec ŋalêpoa gêsô aôm tôŋ.”

²⁴Go Simon gêjô eŋ awa gebe “Amagêc taôm ateŋ mec êndêŋ Apômtau anam aê aoc gebe biŋ, taŋ agêc asôm naŋ, ŋateŋ êtap aê sa atom.”

²⁵Ŋaclagêc tau sêsôm to sêwa Apômtaunê biŋ sa su, go sêmu sêja Jerusalem ma sêsôm ŋawae ŋajam lasê aŋga Samarianêŋ malac gwalêkiŋ gêwiŋ.

²⁶Apômtaunê aŋela teŋ kêsôm gêdêŋ Pilip gebe “Ôndi ma ôsêlêŋ êndêŋ oc êkô ŋaluŋ ôsa intêna, taŋ aŋga Jerusalem kêsêp Gasaŋa gêja naŋ. “Intêna tau kêsêp gamêŋ sawa.

²⁷Tec eŋ gêdi gêja. Ma ŋac Aitiopiaŋa teŋ, lau Aitiopiaŋa nêŋ kwin Kandake nê gejobwagasêga, naŋ kwin kêkêŋ eŋ gejob ênê waba samob naŋ, jaketeŋ mec aŋga Jerusalem.

²⁸Eŋ gêmu gêja nê gamêŋ ma kêsam propete Jesaia nê biŋ gêŋgôŋ nê kareta ŋaô.

²⁹Go Ŋalau Dabuŋ kêsôm gêdêŋ Pilip gebe “Ôtu gasuc nawê kareta tônê tôŋ.”

³⁰Tec Pilip kêlêti kêdaguc gêja e gêŋô eŋ kêsam propete Jesaia nê biŋ ma kêtu kênac gebe “Biŋ taŋ kôsam naŋ, kôjala ŋam me masi.”

³¹Ma ŋac tau kêsôm gebe “Embe ŋac teŋ êtôc intêna êndêŋ aê atom, oc jajala amboac ondoc.” Go keteŋ Pilip gebe êpi naêŋgôŋ êwiŋ eŋ.

³²Ma biŋ tau, taŋ ŋac tau kêsam naŋ, tonec gebe “Sejoŋ eŋ amboac domba, naŋ sebe sêmbucŋa ma amboac domba ŋalatu, taŋ sebe sêkapiŋ ŋaôlilu naŋ, mago kêtaŋ atom.

³³Gêdêŋ taŋ sêkôniŋ eŋ naŋ, sêmêtôc eŋ kêtôm ŋagôliŋ atom. Asa kêtôm gebe ênac ênê wakuc nêŋ miŋ. Oc masi, gebe seseŋ eŋ su aŋga nom.”

³⁴Go gejobwagasêga tau kêsôm gêdêŋ Pilip gebe “Aê jateŋ aôm ôwa sa acgom. Propete kêsôm biŋ tau kêpi asa. Kêsôm kêpi tau me kêpi ŋac teŋ.”

³⁵Tec Pilip gêôc awa sa gêjac m nê mêtê ŋa propetenê ŋalô tonaŋ ma kêsôm Jesunê ŋawae ŋajam lasê gêdêŋ eŋ.

³⁶Agêcnêŋ kareta kêsêlêŋ e jasêô lasê bu teŋ ma gejobwagasêga tau kêsôm gebe “Kec, bu tec kêpoac. Asageŋ êkô aêŋoc busaŋgu auc.”

³⁷Go Pilip kêsôm gêdêŋ eŋ gebe “Aôm embe ôkêŋ êwiŋ tonêm ŋalêlôm samucgeŋ, go daŋgôm.” Ma eŋ gêjô Pilip awa gebe “Aê kakêŋ gêwiŋ Jesu Kilisi eŋ Anôtônê Latu.”

³⁸Go eŋ kêjatu gebe kareta êkô, ma Pilip agêc gejobwagasêga sêsêp bu jasêkô, go Pilip kêsagu eŋ.

³⁹Agêc aŋga bu sêpi sêmêŋ e Apômtaunê Ŋalau kêkôc Pilip su, ma gejobwagasêga gêlic eŋ kêtiam atom ma gêc totêtac ŋajamgeŋ gêja.