Look 20:15-26

¹⁵Soh dehn pich di oana son aafa di lan ahn kil ahn. “Soh da weh unu tink di oana wahn du wid dehn faama?

¹⁶Ih wahn kohn kohn kil aala dehn ahn rent owt di lan tu sohn ada faama.” Wen di peepl dehn yehr dis, dehn seh, “Hmm! Wee hoap dat neva hapm!”

¹⁷Jeezas luk schrayt pahn dehn ahn seh, “Wel den, tel mi weh di Skripcha mi meen wen ih seh, ‘Di stoan weh di bilda dehn neva tink mi wot notn ton owt fi bee di kaanastoan, weh da di moas impoatant wan owta aala dehn.’

¹⁸Yu si, evribadi weh bok dehn fut pahn datdeh stoan wahn geh brok op eena peesiz; ahn enibadi weh da stoan jrap pan wahn geh mash op fain laik powda.”

¹⁹Da sayhn taim, dehn wan weh teech di Laa ahn di cheef prees dehn mi-di chrai fain wahn way fi ares Jeezas, kaa dehn mi wel noa seh dat wen Jeezas mi-di tel dehn da lee stoari bowt di wikid faama dehn, ih mi-di taak bowt dehn. Bot dehn mi frayd fi weh di peepl dehn mi wahn du if dehn mi ares ahn.

²⁰Soh dehn mi-di kip wahn kloas aiy pahn Jeezas. Dehn sen sohn spai weh mi-di priten fi bee hoali ahn raichos fi chrai kech ahn eena sohnting weh ih seh, soh dat dehn kuda ton ahn oava tu di Roaman govna, weh mi ga di powa fi ares ahn.

²¹Soh di spai dehn kweschan Jeezas seh, “Teecha, wee noa seh dat yoo oanli taak ahn preech weh rait, ahn yu chreet evribadi sayhn way noh kay da hoo dehn, ahn yoo teech di chroot bowt how Gaad waahn peepl fi liv.

²²Soh tel wi weh yoo tink. Ih rait fi wee pay taks tu Seeza er nat?”

²³Jeezas mi don si chroo dehn toofaystidnis lang taim, soh ih tel dehn seh,

²⁴“Shoa mi wahn silva moni. Da hoofa hed ahn hoofa naym deh pan it?”

²⁵Dehn ansa seh, “Seeza.” Jeezas tel dehn seh, “Den gi Seeza weh bilangz tu Seeza, ahn gi Gaad weh bilangz tu Gaad.”

²⁶Dehn kudn chrik ahn eena notn weh ih mi seh fronta di peepl dehn. Dehn mi soh shak bowt how Jeezas ansa dehn, dat dehn mi hafu shet op dehn mowt.