Lukas 20:15-26

¹⁵“A ginafut da mantu ya anak na en, a neuhet da ta kaunasan kapye da pinapasi.” A ya uhohug ni Hesus ta kinabida na kiden a “Anu hud sangaw ya uray na makāunasen ta nangabang kiden,

¹⁶awa enna kid sangaw papasin, a ipaabang na sangaw ya kaunasan na ta kadwan,” kunna. A gafu ta naawatan da ya kebalinan na keangarigan na en a “Bakkan mina ta kunna ten,” kunda.

¹⁷A pake inita na kid ni Hesus, a “Am pahig muy ta awena sangaw pa-gangan na Namaratu ya pinagtaron na kiden ta kwa na a intu mina pagnonotan muy ya nesurat na aglavunen, te ‘Newarad na magbali kiden ya arigi en nga nepapatayuk na Namaratu tekid. Ammi netoli na hala a yen ya pinagbalin na ta kasikanan na arigi ta ngamin bali,’ kunna.

¹⁸“A maski am inya sangaw ya medumpar ta arigi in yen a intu hapa la sangaw ya matakitan, a pake nahammek na sangaw am igsilan na arigi en,” kun ni Hesus tekid.

¹⁹A ya padi kiden ikid na mangituldu kiden ta lintig a naawatan da ta ikid hapa la ya pagbalinan ni Hesus ta kuman na nangabang kiden ta keangarigan na en, a yen ta ginafut da mina, ammi aweda nagafut gafu ta talaw da ta tolay kiden nga mayat tentu.

²⁰A yen ta ilalapan da la, yaga dinob da ya kadwan kiden kahulun da tentu, petta ape makitabarang kid tentu, talo am itta ya madangag da ta pangidaruman da tentu ta gubernadoren nga taga Roma.

²¹A ya nebar da tentu a “Mistro, itta ya pohut mi teko, te amu mi ta matunung ka na tolay, a matunung hapa ya ngamin ituldum ta patarabaku na Namaratu tekitam, te awem la panunnutan am anu ya uray na tolay, ikid na awan ta idadumam.

²²“A dangagan mi haen teko am ipalubus na lintig ni Moses ta magpaga kitam ta bwis ta Ari na taga Roma kiden?” kunda.

²³Ammi narikna ni Hesus ta yen ya pangsikwat da tentu,

²⁴a ya tabbag na tekid a “Itan ku bit ya piraken nga ipaga muy ta bwis muy,” kunna. A ta nepangigawat da tentu a “Inya hud ya makāmukat ikid na makāngagan ta pirakin yan?” kunna tekid. “A sinang mukat na Ari en,” kunda hapa.

²⁵“Ipaita muy mantu ta gubyernu na Ari en ya mekustu ta pangurug muy tentu, a ipaita muy hapa ta Namaratu ya mekustu ta pangurug muy tentu,” kunna tekid.

²⁶A gafu ta itta ya addu na tolay nga nakadangag ta tabbag ni Hesus tekid a awan ta nabalinan da ta pangpaliwatan da tentu, yaga aweda hapa nakasitang ta pagpaka-lat da tentu.