Luk 20:15-26

¹⁵Anĩ nigin, idi ĩ wain kabĩ dumeitur dira ken, dukesin.” Age dife di, wain kabĩ marau naig fediyouf?

¹⁶Ĩ isi, kabĩ lo fiya tamo idenkeis fen, wain kabĩ anĩ tamo tunĩ ifenẽdiyouf.” Sain tamo kayau od enei karĩ de fen, idi diron, “Enei to bagai agef wõ youf!”

¹⁷Anĩ ere, Jesus idi lo feid le fen, to fedin, “Age fiyauf are, ere gariya nigin Negur nẽ Itotoya bun eig ye irok: “‘Meein are fõ inoya tamom sane de fen, ditoron, meein anĩ gama monog tor wõ yen’?

¹⁸Aib taka meein anĩ teten kubũ youf, mereb fe fisik fouf, takag, aib taka meein anĩ ĩ teten kubũ youf, ĩ danĩf aas lauf.”

¹⁹Lo ifelnẽdiya tamo, pris odudug geid, Jesus kaisã bagai irounẽya nigin naab dimiren, ere nigin, idi kelein, ĩ idi nigin yaab od enei wogõ yen. Anĩ ere, idi tamo kayau nigin kumĩ den.

²⁰Anĩ nigin, idi Jesus ololo difiye ken, kofo tamo sur difedin, kofo tamo idi idegẽya bun madur tamo gen dilen. Idi Jesus ereb od wogõya bun kũ fenẽ di, diroune ken, Rom gawaman mudur nẽ lo fiya ado megeir bun dinenẽf nigin kisi difen.

²¹Anĩ nigin, kofo tamo Jesus to difiyen, “Tise, amã keleĩ, ogon wogõya ifelnẽya ado madur. Õ takam in oroya dõ wouf nigin wewu yõ di, in oroya dõ fen, taka wau morõ to wenẽdig, anĩ ere, õ momoi bun Negur nẽ naab ufelnamãdig.

²²Amã Sisa takis mafenẽf anĩ lo dõ fiya de, sã?”

²³Anĩ ere, Jesus idi namedin idegẽya anĩ ile fen, irokenẽdin,

²⁴“Koin moni taka ufelnag. Ai nẽ malakanon ado itotoya anĩ bun ibodok?”

²⁵Idi aiten dale diron, “Sisa nẽ.” Age de di, Jesus idi irokenẽdin, “Age fiyauf are, Sisa nẽ are Sisa wenẽg, Negur nẽ are Negur wenẽg.”

²⁶An Jesus mal atun wogõ yen bun, idi ĩ irounẽya kisi feleya sã. Idi ĩ solof iron anĩ bunem terefeit de fen, foro delen.