Luk 20:15-26

¹⁵Ra det sugut pirso ru i tagun a kinobot, ma det um doko ru i. “Asau mo a taman a kinobot na wain in pami un det?

¹⁶In nanpat ma in um doko ru a taro na pinapam, ma in pitar tar a kinobot torom lako taro gisen, sur det in tamtamabati.” Ra a taro det longoro a wasiso ri, det watungi lena, “Awu, ken lenra!”

¹⁷Ikut o Iesu i nas det, ra i watungi lena, “Asau mo a kukurai ina wasiso ri ra di sa tumus tari una Buk Tabu? ‘A wat ra a kum tene pam rumu det lakro ru tari, i ut ra, i wanpat a wakak na wat ra i udekdek a rumu.’

¹⁸Det rop ra det puku taru una wat ri, det in tiginogino, ma osi ra a wat ri in puku taru uni, in tiginogino rop elar nama kubus.”

¹⁹A kum tene ususer tagun a Warkurai ma a kum lamlabino tene etabor torom o God det sisio sur tu kisapi sur det in pam ukai pas o Iesu una du bung utra, uni det tasmani ut lena i watung a wasiso elelar ri un det. Ikut det ngaran a taro.

²⁰A kum tene ususer tagun a Warkurai ma a kum lamlabino tene etabor torom o God det tama sursuri, ma det tulu ru a kum tene torotoro ma det toro lena det a lingmulus na taro. Ra det kis na usobor sur tu wasiso ra o Iesu in watung tari ra det in takuni nami, sur det in pitar tari una warkurai ma una dekdekin a mugumugu tagun a matanitu Rom.

²¹Ra det watungi lena, “Tene Ususer, met tasmani lena i tokodos anum a wasiso ma anum a etowo. A magiram i takai kut torom a taro rop, ma u ser ususer det una kisapi anun o God nama lingmulus.

²²Pepetlai, i tokodos sur dat in pitar a takis torom a Sisa o awu?”

²³O Iesu i sa tasman ru anundet a torotoro, ra i watungi tandet lena,

²⁴“Mot in ese iau nam tu mani. In masarin osi ri, ma a tumtumus ri uni anun osi?” Det balu i lena, “Anun a Sisa.”

²⁵Ra i watungi tandet lena, “Asau ra anun a Sisa, mot in pitari torom a Sisa. Ma asau ra anun o God, mot in pitari torom o God.”

²⁶Ma ka det usobor lar pasi umatan a taro nama wasiso ra. Det kisin doko una nun a minabalu, ma katu wasiso mo anundet.